KEJADIAN 11
11
O pumbuk Babel fam o yaron witfag ane
1Indam ap kinangma welatfahon arimano obog tohowen enele misihon eneg uruk latfag. 2It arimano yali filen o eke witil eke halog til laruk lit o Babilonia kinangma tonggo misig libareg welatfag. 3Wereg lit it-it enele uruk lit, ”O wibuhuk ulug kinang huluwon tag tuhukteg indokma wirabuhukmu helep ineyon hag aruhu,” ibareg kinang huluwon wirako helep hag toho tibibareg altap toho witil laharuk lit topno rurukon fahet somug hag angge mininggi fibag. 4Mininggi fibareg enele uruk lit, ”O pumbuk suwon wituk lit o yaron eke witil lahakukteg pohol men ahandip tubuhuk. Ahandip tubuhukon fahet nit nununuk su aruhumu kema-kema linggik-longgo uruk lit nenemu-nenemu welamuhuk fug,” uruk latfag.
5Ari ibareg o pumbuk suwon wituk lit o yaron eke witil laharuk latfagma Ninikni Allahn pen isa wambimin ulug wambik watfareg 6ele uruk lit, ”It aruma ununggul unuk misihon eneg wereg lit enele misihon eneg uruk. Iren wenggeltuk ane ketiya eneg ak turuk lit fobik mun ane man ane iren tul peruk ane inine roho turuk lamuhup. 7Ari fahet An wambiminteg enele enemu-enemuwap tebeminmu ekeyen eke ele holuk fug teg laruhu,” ibag. 8Ari ibareg Ninikni Allahn it arimano kinang atogman atogma lawag ulug yanggaloho pilili-palala isibagma o ino wituk ane lin isalug libag. 9Ninikni Allahn ap enele enemu-enemuwap teberuk lit yanggaloho pilili-palala isibag ambeg ulug o pumbuk ino Babel suwalfag.#Babel: Ibrani enele fam o unuk Babel ino men pilili-palala isibag urukon men ambi reg.
Sem inowen endetfahonen ondohowon fahet ibag ane
10 #
1Taw 1:24-27
Hun Sem inowen ondohowonen ondohowon ununuk tuma haharoho imbibag. Sem indag tibag sali mo ilig am wirig am turukmen teng uhan 100 atfagma amloho Arpakhsad indag tibag. Indag tibag sali ik humon yenggeltil lahibagma welatfareg mo piren atfagma indag tibag. 11Welatfareg mo ilig am wirig am turukmen teng num fuman 500 atfagma war atfag. Sem inowen ap umaliket hilani umaliket indag enepfag. 12Arpakhsad indag tibag sali mo ilig am wirig am turukmen teng misigmen nubam hilag likinen 35 atfagma amloho Sela indag tibag. 13Welatfareg mo ilig am wirig am turukmen teng nuwal fuman 403 larukmu Arpakhsad inowen ap umaliket hilani umaliket indag enepfareg war atfag. 14Hun Selah indag tibag sali mo ilig am wirig am turukmen teng misigmen nubam hilag hinahan 30 atfagma amloho Eber indag tibag. 15Welatfareg mo ilig am wirig am turukmen teng nuwal fuman 403 larukmu Sela inowen ap umaliket hilani umaliket indag enepfareg war atfag. 16Eber indag tibag sali mo ilig am wirig am turukmen teng misigmen nubam hilag sabiren 34 atfagma amloho Peleg indag tibag. 17Welatfareg mo ilig am wirig am turukmen teng nisanggo fuman 430 larukmu Eber inowen ap umaliket hilani umaliket indag enepfareg war atfag. 18Peleg indag tibag sali mo ilig am wirig am turukmen teng misigmen nubam hilag hinahan 30 atfagma amloho Rehu indag tibag. 19Welatfareg mo ilig am wirig am turukmen teng likin 209 larukmu Peleg inowen ap umaliket hilani umaliket indag enepfareg war atfag. 20Rehu indag tibag sali mo ilig am wirig am turukmen teng misigmen nubam hilag fuwaben 32 atfagma amloho Serug indag tibag. 21Welatfareg mo ilig am wirig am turukmen teng likin 207 larukmu Rehu inowen ap umaliket hilani umaliket indag enepfareg war atfag. 22Serug indag tibag sali mo ilig am wirig am turukmen teng misigmen nubam hilag hinahan 30 atfagma amloho Nahor indag tibag. 23Welatfareg mo ilig am wirig am turukmen teng sabiren 200 larukmu Serug inowen ap umaliket hilani umaliket indag enepfareg war atfag. 24Nahor indag tibag sali mo ilig am wirig am turukmen teng misigmen nubam hilag piren 29 atfagma amloho Terah indag tibag. 25Welatfareg mo ilig am wirig am turukmen teng uhan 119 larukmu Nahor inowen ap umaliket hilani umaliket indag enepfareg war atfag. 26Hun Terah indag tibag sali mo ilig am wirig am turukmen teng pirenman nubam hilag nanggolop fuman 70 atfagma umalikisi Abram men Nahor men Haran men indag enepfag.
Hun Terah umalikisi fahet ibag ane
27Hun Terah umalikisi ununuk tuma emberuk lahe: Terah umalikisi ununuk Abram, Nahor, Haran welatfag. Haran inowen amloho Lot indag tibag. 28Haran ino ikni oluk weregma ibam o Ur Babilonia kinang famen war atfag. 29Abram inowen uhe Sarai hilibagma Nahor inowen Haran ahaloho Milka hilibag. Haran inowen amloho eke unuk Yiska indag tibag. 30Sarai ino ibili atuk lit malik indag ta fug angge welatfag.
31Terah inowen amloho Abram men amloho Haran inowen indag tibahon Lot men Abram uhe Sarai men hondog eneplug o Ur Babilonia kinang fam werehon ino embeselug libareg o Kanaan lul pibag angge famen o Haran libareg welatfag. 32Wereg lit Terah indag tibag sali mo ilig am wirig am turukmu teng sohowen 250 atfagma o Haran inowen war atfag.
Currently Selected:
KEJADIAN 11: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018