Juan 18
18
Mzen xaa Jesús
(Mt. 26:47-56; Mr. 14:43-50; Lc. 22:47-53)
1Gorna ngulo mdizhno Jesús Dios, Jesús mroo kwaan re nu, xaa mseed lo xaa, zee mded xaa tub barank kwaan le Cedrón zee ya nu yi Olib. Baa nzob tub yilo, pa mrep Jesús kwaan re nu. 2Noka Judas, xaa kwaan zaa xaa lo re xaa nak zhiin, nlabeyy baa, nel zyen welt mdop Jesús kwaan re nu naz baa. 3Zee lee Judas mzhin baa kwaan tub partid soldad, nu kwaan lak polisi, xaa nkanap yidoo, xaa kwaan mxaal re ngwleyy non, nu re fariseo. Re xaa ne nzeno yiib, nu nzeno xaa xbruj xaa nu yerbal. 4Per Jesús nela cho kwaan gak, zee mroo xaa nu mnabdizh xaa lo re xaa:
—¿Cho xaa nkwaan gu?
5Lee re xaa mkeb nzhé:
—Lee nu nkwaan Jesús xaa Nazaret.
Jesús nzhé:
—Na nak xaa zee.
Judas, xaa zaa Jesús nze lo re xaa ba. 6Gorna lee Jesús nzhé lo re xaa: “Na nak xaa zee”, mbii re xaa naz tras zee nguchin re xaa lo yo. 7Jesús mbare mnabdizh lo re xaa stub welt:
—¿Cho xaa nkwaan gu?
Lee re xaa mbare nzhé:
—Nu nkwaan Jesús, xaa Nazaret.
8Jesús nzhé lo re xaa stub welt:
—Niila na lo gu, na nak xaa zee. Chelee gu nkwaan gu na, laa gu nya re stub naz xaa ne.
9Kwaane mded zee mbarlo kwaan nzhé leeka Jesús: “Xuz, lee re xaa mzaa lu lo na namluxt nik tub xaa ba”. 10Zee lee Simón Pér, xaa nkano tub espad, mlooya nu mchoog xaa lad li nzha tub xaa le Malco, xaa nak mos cheen ngwleyy non doo. 11Jesús nzhé lo Pér:
—Blochaw espad. Chelee Xuz na nzhekla deed na bid ne, nzhaal deed naya.
Jesús nzo lo Anás
(Mt. 26:57-58; Mr. 14:53-54; Lc. 22:54)
12Zee lee re soldad nu xaa nabeyy lo xaa nu noka re polisi, xaa nkanap yidoo, mzen Jesús nu mkado xaa xaa. 13Yilotlaka mbe xaa xaa garli Anás, nel xaa ne nak xuzhap Caifás, xaa nak ngwleyy non doo liin zee. 14Leeka Caifás ne nak xaa nzhé lo re xaa sawlazh nu, mas wen yet tubka xaa kwent cheen dubse yezh ke dubse yezh lux.
Pér nzhé nanlabeyyt xaa Jesús
(Mt. 26:69-70; Mr. 14:66-68; Lc. 22:55-57)
15Lee Simón Pér nu na nzhake tich Jesús. Nlabeyy na ngwleyy non doo, nu snee mrep na kwaan Jesús leen yoo; 16per lee Pér mlake naz jwer roo yoo. Kwaanzee ngunii na lo xmos ngwleyy non doo, me nkanap roo yoo, zee mrep Pér naz leen. 17Lee me nkanap roo yoo mnabdizh lo Pér, nzhé:
—¿Che nanot lu nak tub re xaa kwaan kaseed lo Jesús?
Pér mkeb nzhé:
—Nanakt naya.
18Nu nel nze nal, lee re mos nu re polisi, xaa nkanap yidoo, mzee tub bal, nu kazhe re xaa. Noka Pér nzob kwaan re xaa kazhe lo bal.
Lee ngwleyy non doo nabdizh lo Jesús
(Mt. 26:59-66; Mr. 14:55-64; Lc. 22:66-71)
19Lee ngwleyy non doo mzelo mnabdizh lo Jesús cheen re nu, xaa mseed lo xaa, nen cho kwaan nseed xaa.
20Jesús nzhé:
—Lee na ngunii delant lo rese xaa; tubka nseed na re xaa pa nseed be xtizh Dios, nu lach roo yidoo, pa nkasa re sawlazh be; nu nik tub kwaan namlut na xlaan. 21¿Chozhiin nabdizh lu lo na? Bnabdizh lo re xaa mbin kwaan ngunii na, zee re xaa né re kwaan nzhé na, nu nzho mod zaa xaa kwenta lo lu.
22Gorna nzhé Jesús kwaane, tub polisi, xaa nkanap yidoo, mgazya ta garlo Jesús, nu nzhé lo xaa:
—¿Che sbaa mkeb lu lo ngwleyy non doo?
23Jesús mkeb nzhé:
—Chelee na ngunii na tub kwaan nawent, né lo na cho kwaan ngunii na; nu chelee kwaan ngunii na wli, ¿chozhiin mkee lu yek na?
24Nu seetaka nkadoo xaa, mxaal Anás xaa lo Caifás, xaa nak ngwleyy non doo.
Pér nzhé stub welt nanlabeyyt xaa Jesús
(Mt. 26:71-75; Mr. 14:69-72; Lc. 22:58-62)
25Nu lee Pér nzobaka baa kazhe lo bal. Zee mnabdizh re xaa lo xaa:
—¿Che nanakt lu tub xaa mseed lo Jesús?
Pér mkeb nzhé:
—Nanakt naya.
26Zee mnabdizh tub mos cheen ngwleyy non doo, sawlizh xaa mchoog Pér nzha, nzhé:
—¿Che nangunet na lo lu kwaan Jesús, leen yilo?
27Pér nzhé stub welt:
—Nalet naya.
Nu gorzee lee gaay mrazhe.
Jesús nzo lo Pilat
(Mt. 27:1-2, 11-14; Mr. 15:1-5; Lc. 23:1-5)
28Mloo xaa Jesús garli Caifás, nu mbe xaa xaa naz palas cheen Pilat, xaa nabeyy Judea. Nu merla yani yizhyo. Lee re xaa sawlazh nu namzeebt leen palas, nel snee nzho mod lake nzhul xaa lo Dios nu nzho mod gaw xchee xaa cheen Paskwa, gorna nselazh re nu xomod mloo Dios re xey nu Egipto. 29Kwaanzee Pilat mroo ngunii lo re xaa, nzhé:
—¿Cho re kwaan ngaazh gu tich xaabyi ne?
30Lee re xaa non lo re xaa sawlazh nu mkeb, nzhé:
—Chol nanakt xaa tub xaa nakap, nangiidnot nu xaa lo lu.
31Pilat nzhé:
—Be gu xaa, nu bnaab gu kwent lo xaa, mod nak ley cheen gu.
Lee re xaa mkeb nzhé:
—Per lee re nu, xaa Israel, nanzeyalt gu gut nu tub xaa.
32Snee mbarlo kwaan nzhé Jesús, leezha mzaa xaa kwent xomod yet xaa. 33Pilat mbare mrep leen palas stub welt, mrezh xaa Jesús, nu mnabdizh xaa lo xaa:
—¿Che lu nak Rey cheen re xaa Israel?
34Jesús nzhé:
—¿Che nabdizh lu kwaane nel sbaa nzak lu, o nel nguné stub xaaya lo lu?
35Lee Pilat mkeb nzhé:
—Nanakt na xaa Israel, lee re xaa sawlazh lu nu re ngwleyy non mzaa lu lo na. ¿Cho kwaan mle lu?
36Jesús mkeb nzhé:
—Lee Pa Nabeey na nanakt lo yizhyo ne. Chol yizhyo ne nabeey na, lee xaa kwaan nkee zhiin lo na dil, zee nangzaat re xaa na lo re xaa non lo re sawlazh na. Per lee Pa Nabeey na nanakt lo yizhyo ne.
37Zee lee Pilat nzhé lo xaa:
—A, lu nak rey.
Jesús mkeb nzhé:
—Wli kwaan né lu, na nak rey. Kwaanzee ngol na nu myal na yizhyo zee za na kwent cheen kwaan wli lo re myet. Nu rese xaa ngwii lo kwaan wli nzhon xtizh na.
38Pilat nzhé:
—Nik tub xaa nanet cho kwaan nak kwaan wli.
Naab re xaa yet Jesús
(Mt. 27:15-31; Mr. 15:6-20; Lc. 23:13-25)
Gorna ngulo nzhé xaa kwaane, Pilat mroo mdizh kwaan re xaa sawlazh nu, nu nzhé xaa lo re xaa:
—Nik tub kwaan nawent mle xaabyi ne. 39Per lee re gu nkano kostumbr nsela na tub xaa nzho lozhyib lo yalni cheen Paskwa. ¿Che nzhekla gu sela na xaa nak Rey cheen re gu?
40Re xaa mbare nzhé:
—¡Naselat lu xaa ba! ¡Bsela Barrabás!
Nu Barrabás nak tub wann.
Currently Selected:
Juan 18: zpo
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.