YAHAYA 61
61
Na lii pa-nggaüru eti rukuna na pahàla
1Na kuaha-na i MIRI Mahupu-jangga ninya lai nyungga;
Nyuna napindi-ka dàngu na-palewa-ka nyungga
la pangàndi lii hàmu la mamila
dàngu la pa-pamàlaru-ya na ma-làjaru etina;
la pa-bobaru-ya la tau pa-tahangu
ba rengga-nanyaka na pahàla-ha,
hamanai da tau la uma kapàtangu
ba marandeka-danyaka napa.
2Na-palewa-ka nyungga la pa-bobaru-ya
ba toma-nanyaka na rehina i MIRI la pa-pamànangu;
la pa-panggaüru-ya mbuu ndàba na ma-handuka,
dàngu la patungu hilu hanggangu la papada nyuda;
3la pawua-nya hanggela hawola
na tau na ma-hawina dàngu na ma-punangu wai mata;
la pa-pambeli-ya na hawina-da
ka nalua-ya la ludu wotungu.
Hama tuna pingi ai
pa-pamula wikina i MIRI-ha nyuda napa.
Napa dawunda-ya na mahàmu dàngu na ma-deningu,
tàka hi pa-mangunju-ya i MIRI.
4Napa da-pahada-nja da paraingu da mambàda mandai pa-tanyungguru
dàngu hi da-pandolaku-ha da pa-ngiangu mambàda mandai pa-malinggitu.
5Ha dimi banjaru-nggu, na tau hangàdangu napa nalumu-nggai nyimi;
napa dapawa-nja da bandami
dàngu daràma-ha da woka mara lupa da woka angguru-mi.
6Nyimi napa atana i Ala wàdanggai
dàngu ratuna na MIRI-nda wàda-mbunggai.
Napa mipàda-nja da pawulu-da da ba - banjaru
dàngu napa mi-hamemu wànja da malanja-da.
7Rukuna ba dua ndàni-naka na makia pambàda ngalami,
dàngu ba mbàda nduma-minyaka na kamakihu dàngu na paakangu,
jia-duyaka hi dua ndàni-mbunai
na kangeha na pangala-mi la tanami hi mangu-minya na hawola ma-palupangu.
8Napanii i MIRI, “Nyungga kumbuha-nya na ma-deningu
dàngu huda-manggunya na pa-kapidihu dàngu na akatu.
Napa ku-patutungu-ma duku la pawua-nggai wundami,
dàngu la patura lii pa-njanjingu ma-palupangu dàngu nyimi.
9Da wàlami patanda-ha la nggi - nggini,
da-kawulangu la honga banjaru mbuu ndàbada.
Jia-duyaka mbuu ndàbana na tau na maita-ya napa dapeka,
ba ku-pakanyuru-ya na banjaru yiana,” wàna.
10Na Yeruhali napanii, “Na-nggaüru na etinggu rukuna i MIRI,
kanjupu mbaha etika rukuna i Ala.
Hama tuna na bidi papa mini kawini
ba ma-manandangu ndàbaha da paki pawotu-da,
tuna numbu i MIRI ba na-panggàna-ngga
kalembi pamàna wàngu dàngu patalu wàngu.
11Hama tuna wini na pa-hàbarungu
ba nalua-ya napa la patumbu,
tuna numbu i MIRI Ala ba na-patumbu-ya na mànangu
hi dawotu-nya napa paraï mbuu ndàba banjaru,” wàna.
Currently Selected:
YAHAYA 61: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
