YAHAYA 60
60
Na Yeruhali napa na-bunjuku
1Hadangu-wa dàngu njadiwa harii ha Yeruhali,
nadu ba nàmu-nyaka na hariina na mànangu-mu;
i Ala na pa-handaraku wànggau mangarangu-na.
2Na pinu tana na-panggàbalu-nya kapàtangu,
da ba - banjaru na-palumburu-nja kanjidingu;
tàka na nyuna hunga-nanggauka dumu hariina i MIRI,
na handaraku-na ba ninya lohangu-nanyaka lai nyumu.
3Dapaju - jurungu da banjaru pamai la hariimu,
na-payila eti hanggangu la hanganji - hanganji na handaraku na mahunga-nggau nyumu.
4Tàngaru-ya nggàraya na manjadi la winggiru-mu;
na-pauhi na rayatu la pabeli lai nyumu.
Welingu la mamarau ba damai da anamu mini,
da anamu kawini ba wàngu palunggu-ha.
5Bau itaya nuna hangàtaru-munyaka hi na-hawelaru na matamu;
nyumu mu-maratangu hiu bàkulu eti wànya.
Da banda da banjaru-ka dangàndi-ha lai nyumu,
da pawulu wàngu welingu la hapapa tehiku da bundu làndangu lai nyumu.
6Na tanamu na-karunggi-ya ota dangu,
welida la Mindiangu dàngu Epa.
Welingu la Heimba nangàndi àmahu rara na tau dàngu kaminyangu,
ba dàngu wotu-danya na paraï rukuna i MIRI.
7Da mbimbi welingu la Kendàru dangàndi-ha lai nyumu
da mbimbi bumbu welingu la Nembayutu pa-payemangu-ha ndumana na lumungu-mu.
Nuna na kameti maraku naliya na etina i MIRI
na-pahangganggiru-ya na Umana na ma-kanjupu bunjuku.
8Nggàraha nàmu ba hama karumangu lindingu-ya
hama kulundiha ma-hawurungu ba nabeli?
9Kapalu-ha da mamai papuha labuda
mangàndi-ha da banjaru-na i Ala mabeli welingu la tana marau.
Dangàndi pa-kariangu àmahu marara mabara
la pawotu wànya i MIRI Alamu;
ndumana i Ala Ihirailu Mahupu-matua,
na ma-pawiti-nya hi tembiya na banjaru-na.
10I MIRI napanii-nya na Yeruhali,
“Napa na tau hangàdangu na-pahada belinya na kangeli-mu,
dàngu da hanganji dalumu-nggau.
Àmangu kuhuku-nggau ba kuhàngga-nggau,
tàka nàhu ku-orangu-ka pamila-nggau eti.
11Lodu rudungu da pindu bokulu-mu napa da-tabunggahu,
ka peku ngàndi-nggauha nyumu da pawulu ba - banjaru,
dàngu da hanganji-da ba tanawangu-ha.
12Na banjaru dàngu na pa-hanganji na manda ata lai nyumu,
napa na-tàlaru hi namohu molungu.
13Da pa-hamemu wàna na omangu Limbanongu
pa-palaungu-ha napa lai nyumu
nu da ai mbaranga, kajiu dàngu eru
ka na-hanggangiru na Umanggu,
dàngu ka pa-mananda-nya na lata wihinggu.
14Da anada da ma-kapidihu-kau damai pa-maràbaku,
da ma-paaka-nggau làti napa da-karuduku,
‘Paraingu-na i MIRI’,
‘Hiungu Paraingu-na i Ala matua Ihirailu’ wàdanggau ba datunggau tamumu.
15Nyumu nda pa-dunjaku dàngu nda pa-paumbi-anggau-pa,
nda pa-pahiangu-akaupa pa-malinggitu kahàna.
Kutukau pa-hamemu wàngu ma-palupangu,
pangia pa-hanggela hawola lundu nu - nu.
16Napa na-kulipu-kau paraï da banjaru dàngu da hanganji,
hama tuna ina ma-kabubulu anana.
Ka pi-dumu-nyaka ba Nyungga MIRI, ma-pamàna-nggau,
dàngu ba i Ala Ihirailu ma-kapàru ma-pahàla-kau.
17Nyungga kungàndi àmahu rara hilu wudu,
dàngu àmahu bara hilu bàhi.
Ku-wuangu wudu hilu ai,
dàngu bàhi la pahilu-ha da watu.
Na paraimu napa nangudu dàngu na-mànjaku,
dàngu pa-pareta wànguya ma-padeningu.
18Nda hilu ningu-apa lii langu ruku pa-janggilu la tanamu,
rukuna na kabu dàngu na tanyungguru la ngaba tanamu.
Hama kangeli-ka Nyungga ba ku-katindi-kau napa,
dàngu napa muwotu-ngga ba Nyungga ma-pamàna-nggau.
19Nda nggàra uihi wàngu-apa ka na hariinggau mata lodu la lodu,
dàngu nda nggàra uihi wàngu-mbupa ka na hariinggau wulangu la rudungu.
Nadu Nyungga, MIRI, jia-makaka ma-handaraku pa-lupangu ndumamu nyumu,
ku-paharii wànggaunya na bunjuku-nggu.
20Napa ningu mata lodu manda ana tama ndumamu nyumu,
dàngu wulangu manda ana wawa.
Nadu ba Nyungga MIRI jia-makaka ma-handaraku pa-lupangu ndumamu nyumu
da lodu hawina-mu kanjupungu-danyaka.
21Napa jàka da-paluangu limada da ma-mandapu-nggau ma-deningu-maya,
napa damangu-nya na tana lundu nu - nu.
Hama tuna kahanga pa-kulipu-ha nyuda na pa-pamula wikinggu,
ka pawuwa-ya na mangunju-nggu.
22Jiapa na kuru uma kudu na mangia wawa
napa nanjadi-ya banjaru bokulu dàngu ma-kapingatu.
Nyungga MIRI, napa ku-paluangu limanggu,
la rehi ma-pajàngapungu,” wàna.
Currently Selected:
YAHAYA 60: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
