YAHAYA 59

Na wunangu naràtu-nja da njalana na banjaru

1Àmbi kaka-duya i MIRI ba lalu maluputu-na la pa-pamàna-nggai nyimi, jàka ndia ba lalu kawanga-na la parongu-ya na warami. 2Rukuna na akatu-mamika hi nda na-patingi-nggai nyimi bai hamaya-nya Nyuna. Da njala-mamika da ma-padira-nggai nyimi welingu lai Ala. 3Nyimi minjala bai kambàliku dàngu bai palapingu, ba wàngu mbana etimi la pawunda-mi dàngu bai pameti tau.

4Mi-patàkangu palakara-mi dàngu nda pa-latangu, dàngu mi-patandangu ngera wàngu nda pa-deningu. Mi-kambàliku dàngu mimonu-nya na manda lingu; miuna-nya na pa-pakaka-mi ka pa-hanggàmaru tau hawiangu dàngu miwunda ma-akatu. 5-6Da pa-pakaka-mi da ma-akatu pameti wànguha hama tilu kataru ma-paupahungu. Jàka mi-tutuku-ha, luhu-nanyaka na kataru-na. Na nyuna nuna na pa-pakaka-mi nda ningu ndoku linguna lai nyimi, hama-maana na paki na pa-tinungu wàngu lulu ngginggi! 7Nutakungu-maminya nyimi la pa-pakakangu ma-akatu, dàngu patikingu-maminya la pawunda parengga-nya. Dàngu nda kanodaru-mi ba pameti-ya na tau manda njala. La nggi bia milaku ningu, na pabànjalu-mi ma-kanànda-ya dàngu pa-molungu wànguya. 8Ndai pamukarungu-a ka na-lànyapu na panggolu-mi, dàngu nda na-padeningu-a mbuu ndàba na pawunda-mi. Na àndami na pawi - wikitungu dàngu na tau na maliya na ànda nuna, oha-angguka nda wàna-a.

Na banjaru napeka njalana

9Napanii nuna na banjaru lai Ala,

“Nàhu pi-manyaka

nggikina hi ndau pahàla-kama

welingu la tau - tau na ma-kapidihu-kama.

Nyuma ma-monungu ma-handaraku,

tàka jiaya na kapàtangu-ma-a na maninya.

10Hi lupa dàmangu - dàmangu-ma hama tuna na tau poki;

la harii lodu tunjuru bia-manya hama tuna la padua rudungu;

la honga tau luri hama tuna tau meti-kama.

11Ninggama la mangàdatu dàngu la hawina;

mahimbu-ya na ma-padeningu tàka nda ningua;

mamonu-nya ka pahàla-kama, tàka kahewa-maana.

12Langatàka dadangu-maka da njalama lai Nyumu;

da njalama da-panjala-kamaka.

Langata - tàkama mapàda-manya duma na akatu-ma,

dàngu mapi-manja da njalama.

13Mbàda kandulingu-maka dàngu ma-patula ngganggangu hanggangu lai MIRI,

dàngu nda ma-mbuhangu pakiku-nya na Alama.

Nyuma ma-kapidihu-ka tau hawiangu dàngu hi ma-hiliru;

na kanandingu-ma na-njàrangu, dàngu ma-kambàliku-maaha da papanii-ma.

14Na uku na ma-deningu pa-pahinggilu-yaka,

dàngu na ma-deningu mbàda pamarau-yaka.

Na ma-kunduhu nda pakawela-anyapa la ngia pa-pamàtungu,

dàngu na matànji la halinggi-yaka.

15Nda ningu-apa tau ma-patutungu,

tàka jàka nggamu ma-wiliru-nya na ma-akatu,

nalua-ya la kameti ma-akatu,” wàna.

I MIRI ba na-rimangu pa-pamàna-nya na banjaru-na

Naita-ya paraïna i MIRI, dàngu nda nahàmu na etina ba nda ningu ndokupa mabota wàngu ma-deningu. 16Na-hangàtaru wànya ba nda ningu ma-ndàharungu dàngu nda ningu ma-pakahiri. Jia-duyaka hi nawàngu kuaha wikina la pa-pamàna-nja nyuda dàngu la pawua-nja patalu wàngu. 17Napa Nyuna nahauya na ma-deningu dàngu natuya na mànangu beri kalembi bàhi-nanya dàngu nggubi waja-nanya. Kita-mananya na etina la patuu beliya na mahàmu dàngu la pa-palimba-nya na manda pa-deningu. 18Na palimba-nja da muhuna pa-namatu-nya na pawunda-da nyuda. Dàngumbu da ba - banjaru la nu - nuha mamarau nda damara-a welingu la huku-nanja nyuda. 19Na kuaha dàngu na mangunju-na napa na-mangàdatu ndàbanya tau piti welingu la pahunga lundu la patama. Napa natàka hama tuna luku ma-mbangatu na pa-tàndalu ngilu mbangatu.

20Napanii i MIRI la banjaru-na, “Napa Nyungga kumai la Yeruhali la pa-pamàna-nggai nyimi mbuu ndàbami ma-pambelingu weli la nja - njalami. 21Napa Nyungga kutura lii pa-njanjingu dàngu nyimi: Nyimi kuwua-nggainya na kuaha-nggu dàngu na lii papekangu-nggu lundu nu - nu. Papeka-wànjawa da anami ka màtai duda nyuda ka da-papeka wànja da ana umbuku-da nàhu lundu nu - nu,” wàna.

Currently Selected:

YAHAYA 59: KAM

Highlight

Copy

Compare