YAHAYA 57
57
Na lumungu marapu pa-ràtungu-ya
1-2Ba nameti na tau hàmu na ma-karàngi la huri lumungu, nda ningua mapinya dàngu ma-ihili-nya. Ba dameti-ka, hinggilu-danyaka duda welingu la hanggàmaru hi da-hangahu mànjaku.
3Tàka nyimi, la kolaka tau mawunda njala, maiwa ka patanda-nggai ngera! Ndai rihia pahàmu welingu la tau ma-kawanangu alimuu, ma-ndàmangu pa-njuraku dàngu ma-pahunda! 4Nggamuya na pariki-mi? Nggamuya na pa-payudi-mi? Ka nda wàla wua ma-kambàliku dàngu ma-katadaku-akai nyimi? 5Nyimi mi-marubuku-nja da marapu kamboka dàngu bai pa-jàmangu wikimi la pa-itiru-na na tolumi la lumbu ai mambiha-mi. Da anami bai taninja la mondu dàngu la panga watu. 6Bànungu-duka hi mi-pauhingu watu kamilihu welingu lai nu. Nuna-yaka na ndumami! La watu nudamai bai piliri-nja wai angguru tàka hi miwua-nja uhu nggàndumu ma-ngejingu. Bai rekiya kumbuha ndàbanja nuda nu? 7Milua la pinu - pinu palindi la pawotu kameti maraku dàngu ba lundu hodami la itirungu-mi kawini. 8Mi-bànjalu-ha da kahala hada kajari-mi la patenga pindu umami. Mbàda dunjaku-minggaka Nyungga. Mi-pahàla-nja da pakimi tàka hi mihei la ngia pa-katuda pa-panggailaru dàngu kawini yorami na pambàda wuami wunda la pa-katuda angunggau, ba tuna palundu-dimi-nyaka na pa-itirumi. 9Nyimi mitungu mina dàngu mbii kati, hàla hi milua pa-marubuku la marapu Moluku. Mi-paràhangu papalewa la paraingu mamarau, jiapa la parai mameti-mbu. 10Dàngu nda kambotahu-na na monungu-mi ba buha - buhami pahimbu-ha da marapu - marapu. Bai kakaya nyuda damàka pawua-nggai ringgitungu mabidi ka àmbi maluputu.
11Napanii i MIRI, “Nggamu-haka nu da marapu da ma-pamangàdatu-kai, hi lupa mi-kambàliku dàngu ba ndai namuka Nyungga? Màla ndai hili lumu-anggapa Nyungga ba dira mandaika ba pàdi wànggu? 12Na nyuna nàhu ka kupeka-nggai; na-karàngi-mi la ngera lumungu ma-kapilandu-ya, dàngu da pawundami nu mbuu ndàbada nda ningua linguda lai nyimi. 13Jàkai kaladaku, màtawa nuda da kahala hada ka da-pamàna-nggai! Napa nyuda damohu ba na-hawuru ngàndiha ngilu hi da-molungu wàngu handàka kayeku-a! Tàka na tau ma-handera lai Nyungga napa da-kangeha-nya nuna na tana hi da-marubuku-ngga la Umanggu,” wàna.
I Ala na-paràndingu pa-ndula-ya dàngu pa-pamàlaru-ya na banjaru-na
14Ningu mapanii,
“Pandoi-wa dàngu pa-yemangu-wa ànda nduma banjaru-nggu,
pa-hinggilu-ha mbuu ndàbada da ma-pahambarungu,” wàna.
15Nadu ba tuna yia na paniina i Ala Mahupu-jangga dàngu na ma-matua,
na ma-kuaha lundu nu - nu,
“Nyungga ku-ngiangu la pangia majangga dàngu ma-matua,
tàka na nyuna la honga tau mawawa eti-mbu
da ma-paura-ha da njalada,
ka ku-pajia beliya na ringgitu dàngu na monungu-da.
16Nda ku-panjala pangala-anya na banjaru-nggu;
nda na-palupangu-a ba kumbeni,
ka àmbu namàli na ringgitu-da,
tàka hi Nyungga pàkudui ma-paluri-ha nyuda.#Nda ku-panjala ... nyuda; jàka ndia: Nda lundu nua na panjala-nggunya na banjaru-nggu; nda nuangu-ana na hàngganggu, tàka ba Nyungga pàkudu ma-paluri-ha.
17Jiaya na njala malumbangu-da hi kumbeni,
jia-duya hi kuhuku-nja dàngu hi ku-dunjaku-nja.
Ba tuna nyuda da-malihu katiku-da
dàngu hi daingu biana ba dahimbu ànda wikida.
18Mbàda ita-nggunyaka na huri lurida,
tàka nyuda napa ku-pamàlaru-mbuha.
Napa Nyungga ku-kapipi-ha dàngu kundula-ha
hamanai ku-panggaüru-ha da tau da ma-handuka etida.
19Napa Nyungga kuwua-nja pa-mànjaku wàngu mbuu ndàbada da tau,
ka ma-mareni-ha ka mamarau-hakai.
Napa Nyungga ku-pamàlaru-ya na banjaru-nggu.
20Tàka na tau akatu hama tuna na tehiku
na ma-ngalingu na manda handàkangu pa-mandangu.
Na arihu-na nangàndi kamàparu dàngu kapihaku.
21Nda ningua mànjaku nduma tau manjala,”
wàna i MIRI.
Currently Selected:
YAHAYA 57: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
