2 TIMUTIU 1
1
1-2Oi Timutiu, na ananggu na pambuha-nggu! Nyungga, Paulu, ku-tulihu-nggaunya yiana na huratu, dàngu ku-monungu mili àru i Ala Ama dàngu na Mirinda i Karitu Yehu ka nawua-nggau nyumu kanyuru, màjangu dàngu mànjaku.
Ruku pawuku-na i Ala, pawotu-ka nyungga ka pa-pahurungu-na i Karitu Yehuka tàka hi palewa-ka pa-bobaru-ya rukuna na luri na paràndi-na i Ala. Nuna na luri tangala-nya rukuna ba ta-pambulu dànya i Karitu Yehu.
Na pa-malangungu dàngu na pa-monungu
3Ku-pamalangu-nya nyungga i Ala na palumu-nggu wàngu eti yahangu-nggu, hama tuna na pawàda da boku la mangilu-nggu. Ku-pamalangu mànunya i Ala handàka namu - handàka namu-nggunggau la hamayangu-nggu, la lodukai ka la rudungu-kai. 4Ku-pangàda-nya na hawina-mu. Jiaya hi ku-rinjungu langatàka pa-pahàmburu dànggau, ka peku nggaüru hàmuna na etinggu. 5Ku-pangàda-nya na pawaimu na ma-langatàka lai Karitu, hama tuna na pawaina na àpumu i Lowihu dàngu na inamu i Euniki. Na-màndungu-ma nyungga la etinggu na pawai tungu nu ba nimbunya lai nyumu. 6Jia-duya nu hi ku-panamu hahanggau, kau pa-miripu-ya na pawua jua-nanggau i Ala ba jiaya na pa-dambaku-nggunggau lima la katiku-mu. 7Nadu na Ngahu na pawua-nanda i Ala, nda Ngahu mawua-nda pa-mangàdatu wàngua. Tàka hauya duna, nu na Ngahuna i Ala na ma-pakapànduku-ta, ba napinu wànda mbuhangu dàngu hi tamàka pa-roputu wikinda.
8Jia ba tuna àmbu makia-du pa-hakahii-nya na rukuna na Mirinda, dàngumbu àmbu makia wa-dungga nyungga pa-patamangu la uma kapàtangu lumuna Nyuna. Tàka hauya duna, màtawa nyumu wànya na màka welingu lai Ala, kau mayila karia-nggama lumuna na Lii Mànangu. 9I Ala na-pamàna-nda nyuta dàngu napaau-nda ka banjaru-na Nyunata. Hi tuna nu Nyuna nda palata-nanya jàka nggàraya na pambàda ràmanda, tàka palata-nanya na pambàda pakaka-mana duna dàngu na pa-namungu-na. Nyuna nawua-ndanya na pa-namungu-na rukuna i Karitu Yehu, ba ndedimbu pa-padika-nya na pinu tana yiana. 10Tàka nàhu, i Ala paita-nanyaka na pa-namungu-na lai nyuta ba namaika na Hanganji Pa-mànangu-nda i Karitu Yehu. I Yehu natalu-yaka na kuaha meti dàngu hi nangàndi-ya na luri pa-lupangu rukuna na Lii Mànangu.
11Ka bobaru-ya na Lii Mànangu nuna-duka hi nawotu-ka nyungga i Ala la panjadi pa-pahurungu dàngu ngguru. 12Nuna-duya na pakiri-na hi kupàda hàlanya na mayila yiana, ba tuna na-màndungu-ma duku na etinggu, nadu ba pi hàmu-manggunya jàka nggamuya na pawainggu. Màndungu-mananya nyungga la etinggu, jàka nggàraya na pambàda patanggu-nangga,#jàka nggàraya na pambàda patanggu-nangga; jàka ndia: jàka nggàraya na pambàda patanggu-nggunya Nyuna. namaka-ma duna Nyuna pamangga-nya lundu la Lodu Hupu Njàpuna. 13Tundu weli eti-manya na lii pa-ajaru na ma-deningu na pambàda pakata-nggunggau. Dàngu màtawa kau yàpa padàinya na pawai dàngu na mbuhangu na pamangu-nda ba ta-pambulu dànya i Karitu Yehu. 14Wàngu pa-ndulangu-na na Ngahuna i Ala na maluri daa lai nyuta, màta nyumu kau mangga pahàmu-nja da hangia - hangia ma-pawilingu da pambàda pa-tanggungu-kau nyumu.
15Bau pi-madunya nyumu mbuu ndàbada da tau la kaliungu Ahia ba mbàda dunjaku-danggaka, jia hàla-mbuhaka i Pinggiluhu dàngu i Herimunggenihu. 16Tàka da kuru umana i Onihiporu nda na-pambirangu biapa la pa-panggaüru-ya na etinggu. Mili àru i Miri ka na-orangu pa-paita-nja mila etina lai nyuda. Jiapa-kai ka la uma kapàtangu-ka nyungga, tàka nyuna i Onihiporu nda na-makia wa-anya na ngeranggu nyungga. 17Ba nataka-kaka la Roma, ailulu himbu-ma-anangga nyungga hi lupa na-patàbuku dàngga. 18Tàka bau pi-madunya nyumu ba kanjupu danguya na ndula-nangga la Epihu. Mili àru i Miri ka na-paitangu mila etina lai nyuna la lodu patanda-nanya ngera i Miri mbuu ndàbana na banjaru tauka.
Currently Selected:
2 TIMUTIU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
