1 TIMUTIU 5
5
Na wai ngera hanggangu la angu papawai
1Àmbu hanggàritu-du bau hàngganja da tau da marihi matua welingu lai nyumu, tàka màta kau wàndaha ka da-patingi-nja da kareuku-mu, nyuda ka beri hama tuna ama-munja. Ingaha da bidi mini ka beri hama tuna eri aya-munja, 2dàngu da ina matua ka hama tuna ina-munja. Da bidi kawini kau ingaha hama tuna eri-munja, wàngu huri yahangu-mu.
3Tembiha da kawini meti lei da maluri pameha pa-langatàkangu. 4Tàka jàka ningu anana jàka ndia umbuku-na na kawini meti lei, nyudaka bàdi da pa-kawunga panaungu ka dapinya ba wai ngera-danya la painga-ha da tau kuru umada, ka da-himbalu-ya na hàmuda da ina amada dàngu da boku àpuda. Nadu ba jia-mayaka na matuna nu na pahàmu wàna na etina i Ala. 5Na kawini meti lei na ma-pamehangu ailulu, dàngu nda ningumbu ngga - nggamu na ma-anggaraa-ya, jia-maaya i Ala duna na pamonu-na. Lodu rudungu hani-mana la pa-hamayangu, ba na-kamahi-nya na pa-ndulangu-na i Ala. 6Tàka na kawini meti lei na ma-mbuhangu paluri borakungu, nu mbàda meti-naka jiapa ka dàngu lurina. 7Patàka-nja da panaungu yiada lai nyuda, màta ka daluri dàngu nda ningu nyurangu. 8Tàka jàka ningu tau manda inga nua kalembi-na, ri - rihi da kuru uma wikina, na tau nuna pahini-nanya na pawaina; nyuna narihi nda hàmupa welingu la tau nda pawai.
9Mbulungu da kawini meti lei da matutu-ha da kalaratu yiada tiangu da pa-patamangu la kirada da kawini meti lei: na umuru-na ba nda la wawa nomu kambulu ndaungu-na, àmangu ba na-handàkangu-a pa-mangoma,#na-handàkangu-a pa-mangoma; jàka ndia: na-tuturu la mini leina. 10patanda-ya nyuna ba kawini mawunda-ya na mahàmu - mahàmu la hangia - hangia, hama tuna ba mbàda pa-matua dàngu hàmu-nanjaka da anana, ba nahàmu jàka ningu tau mali patodu la umana, ba nainga-ha da tau da mapawai, nandula-ha da tau da-mahanduka, dàngu weli eti-mana pawunda-ha da paràma mahàmu.
11Àmbu patama-dunja la kira da kawini meti lei bidi kawini. Nadu jàka na-mbangatu-maka na itirungu-da, hilu mangoma-danyaka duda, dàngu ka dunjaku-danyaka i Karitu. 12Njala-danyaka, nadu ba da-pahàla-nya na pa-ràndingu na pambàda pa-katangu-ha. 13Dàngumbui nyuda ba da-padima-nya na rehi kalongga-da ba da-nggumangu patama luhunja da uma tau. Tàka na marihi iraku, nyuda ba da-pakiringu la papulu-nya na tau hawiangu dàngu ba datama korunya na pa-paloku haàtu hamanai ba da-pabanjaru wànya na hangia - hangia na manda ràkana pa-pabanjaru wànya. 14Nunaya na ma-pawitingu, da bidi kawini meti lei màta ka da hili mangoma hi kiri wànggu, ka da-ngalangu ana dàngu ka da-paloku kuru umada ka àmbu ningu pekuna da muhunda la pamari - rihaku-ha da tamunda. 15Nadu ba mbàda ninjaka da kawini meti lei da mambàda njàrangu pa-tundungu wàndi akatu. 16Tàka jàka ningu kawini Karitu maningu angu kuru umangu mambàda meti lei, màta nyuna ka nandula-ha da kawini meti lei; àmbu ilu biaya na kabungguru ba natanggu-nja nyuda. Nu ba tuna nu peku-naka na kabungguru pandula-ha da kawini meti lei da manda ningu ndoku nua kalembingu.
17Da liku uru kabungguru da ma-paloku pahàmu-nya na wai ngerada, ràkana jàka pandua wundangu patembi-ha, ri - rihi nyuda da ma-maràna pa-pabobarungu pulungu dàngu da ma-ajaru tau. 18Nadu la Huratu Matua ninya na pa-tulihu, “Na hapi na ma-talànga tarohaku uhu nggàndumu, ka da-alingu da karohu-da welingu la wilida, àmbu katanga ngora-duya,” wàna, nimbunyai: “Na tau na maràma, hàku-mananya pakei wundana,” ba wàna. 19Àmbu kataku-duya na pulu tau ma-panjala haàtu liku uru kabungguru, hinggilu-na jàka na-jorutu-ya hakahii tau madua jàka ndia rihi welingu lai nukai. 20Na tau na mawunda manjala, hàngganya kanyàngi-nya bàdi la hangga kabungguru nggubulu-na, ka peku mangàdatu wànguda hawiangu.
21La hanggana i Ala, i Karitu Yehu, dàngu da papalewa papindi, kukarai pambana-kau màta yiada da panaungu kau nunjuha dàngu nda ningu ngga - nggàmu pa-pakaka-mu la eti, dàngu ndau lua papa. 22Àmbu jia rengga-dumu la pa-padàmbaku-nya lima na haàtu na tau la pa-pakada-nya na wai ngerana la palumu-nya i Miri. Jàka nanjala na tau hawiangu, àmbu kikungu-du panjala dànya. Manggangu-ma wikimu kau yahangu mànu.
23Àmbu mbulungu wai-a paunu-mu; unungu-mbu hawutu angguru, ka napeku wàngu na kambumu, nadu nyumu bau kàli hidu mànu.
24Na njalana hawiangu na tau, ba ndedi pa-rapatu-ya, mbàda wuwa lohangu-naka. Tàka na njala tau hawiangui hàla-yaka bàdi hina hi pinya. 25Tuna numbu da pawunda da mahàmu pangalangu wuwa-ma-adanya. Dàngu da manda mudambu la paita-ha, nda jia kawiningu pangalangu-ada.
Currently Selected:
1 TIMUTIU 5: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
