Yakobus 5
5
Ap ’gain ena’ge a’bik a’ge enesa’go weregei wene
1His ap ’gain a’ge narilak. Pobuk Allah en wiagap henebisoam di obotut yu obotut hogu lorogup ai en, nge togwi modok wolorogup oluk mo’gulhentegis ai henesa’go hwelit o. 2#Mat. 6:19Hena’ge di a’ge yu a’ge a’bik eba muk agalat, honosum a’bik eba elaluk a’ge en ’berlegat nasulat, 3his ena’ge emas emin, perak emin, ik morlil tagalat, tegeimu orogole wiak eba re! Henebe o ologun hwerli pam welarat de, di a’ge yu a’ge honu’gwarek paget odoksogo pagathorloluk welegep ai en, pobuk Allah en wene henebam pasuam, ik morlil ’balegei a’ge ai enat,
“Is enebabut asogo o,” oluk, enak a’ge selakma pasuam di a’ge yu a’ge odouk en nasu ai ’gela’ge, henebe ik morlil ’belak a’ge ai enat wiagaphonobua o. 4#Ula. 24:14,15Honosi henepenen enat gandum e’gen ’balhontouwagoluk yo’go enebegepma ’balogwi a’geat de, ene’gik o’go wogonto erlakma en heniak agam togu legep ai en, is en e,
“Nene’gik o’go woknonto a’ge!” oluk eniak loksogo ogwi ai yethemit! Asogo togu legepma is eniak ai nenaik ’gain Onuk Logo anni a’bik a’ge ano esa’go hwelegeitik oruak o. 5’Gwiangma yema hena’ge di a’ge yu a’ge henilmu ’bullak welat, honogola henagaisogo honogum ningsogo horlogwi modok welegep yema re! Wam woru hegit lau wagoam ebe lok agalat esei ’gwelabuagoluk so’boru loksogo dakho wogogwi ’gela’ge, his henebe wiagaphonobua a’ge horok lau wagokhwe, honu’gwarek en henebe dakhorlogu legep eba re! 6Is logon hegitsogo togwi a’ge ai, is en o’go his wathonobu erlakmayat wene enebam poluk enebe waronobogu legep eba re!
“Henepe mosogo welat se’ban ogu lomup o,”
oluk mo’gulentesi wene
7Ai en e, narilak norokhwi. Nonue ’gain Onuk Logo a’ge ebe owan wom erlak oruakhwe, honogola ’bugom erlakma en henepe mosogo yetharok wolomup o. Aphwami en yabuk wogoma so’boru agarli yogo poluk welagai ai henede eberit o! Asogo agarli yogo poluk oruakhwe moru o mo ligagokhwe nasulat, ’bisokhwe nasulat, pobuk naduk nasukhwe onogola ’bugom erlakma enat,
“Pobuk so’boru hurle agoam en de, ebe lok a’ge dakhwerlaik,” oluk enepe mosogo yetharok welagai ai ’gela’ge, 8nonue ’gain Onuk Logo a’ge ebe perleneat wema oluk henede hurlesogo welat, henepe mosogo yetharok wolomup o. 9Narilak norokhwi. Asogo yetharok welat e, Allah en wene henebam pou wano oluk, his-his nak ogulat,
“Nare ai ebabut tago ai re, nebit o,” oluk onobok ’balogwi erlagat wolomup o. At Allah enat wene aphwami enebam pasulat, no’gorliselat, tua ai, ’godukmu horok lau waga ai yethemit! 10Narilak norokhwi. Pageat is ap Allah iak mo’gulontogu legesa a’ge ebano en e,
“Nenaik ’gain Onuk Logo a’ge en egei a’geat mo’gulhontogu lege o,” oluk mo’gulontogwiam, is aphwami logon en enebe wiagabonobogukhweat, enede ’bugom erlakma en, enepe mosogo welegesa a’ge ai enebabut womup o! 11#Ayu. 1:21-22; 2:10; Mzm. 103:8Wiagabonobogukhwe, enepe mosogo welegesa ai en, nis en onobok op ogulat,
“Is op egesarik onogola enagai hogwi,” oluk ogu lege ai o. At Ayub ede ’bugom erlakma en epe mosogo welaga ano pam, Nenaik ’gain Onuk Logo a’ge ebabut op en loksogo edeabenebiso a’ge ano en, ologun pam obaptegei ai obok henesa’go hologu legebat o.
12 #
Mat. 5:34-37
Narilak norokhwi. An wene logo a’ge mesik yu mo’gulhentaik. Allah en wene henebam pou wano oluk e, his en ’bogorl pam a’ge mesik onuk ’balogulat, ’gwiangma a’ge mesik onuk ’balogulat, mu a’ge mesik onuk ’balogulat, ho’buk ’balogu lorogup no yo. We,
“I o,” uogoluk holuk e, ’garoksogoat
“I o,” u o. Ye,
“Erlak o,” uogoluk holuk e, ’garoksogoat
“Erlak o,” u o.
13His logon henede wiak welegep holuk e, se’ban ogu lomup o. Ye, his logon honogola henagai hogu legep holuk e, weni Allah paget worogu lomup o. 14#Mrk. 6:13His logon henebam obotut ago holuk e, se’ban ogulat, nonue ’gain Onuk Logo a’ge onuk ’balogo minyak henebam egilhogulat, tuagoluk is ap Allah eiyagai tenentarok welagai a’ge yo’go onobogu lomup o. 15Is en enede Allah pam he’berik poluk, se’ban ua ai pam, nonue ’gain Onuk Logo a’ge en henebam obotut a’ge ai erlak emagoluk obaphenebiselat, his mesik wiak tigep a’ge oruak holuk, erlagapsogo ukpasulat, tua o. 16Asogo tua ai en, his logon henebam obotut a’ge erlak emagoluk e, wiak togu legep a’ge his-his ’baktogulat se’ban ogu lomup o. Is aphwami Allah ogola agai epasu a’ge hegitsogo togwi a’ge en se’ban demat ningsogo ua ai, anni a’bik oruakma re, Allah en obabonobuayat o. 17#1Raj. 17:1; 18:1At Elia ai re, ebe nis ’gela’ge aphwami a’ge enat, moru nasu erlak modok welemagoluk se’ban egeimu re, mo ligom ’bugom osokhwe tahun henagan welagarik nin pobuk dugwi hebarligen eminat moru ’gwiangma ’buom erlakma en o hebi modok welaga. 18#1Raj. 18:42-45Asogo oruakma, se’ban pobuk egeimu re, moru ’bu agama di a’ge yu a’ge pobuk ’gwiangma en ’baksogo e’gen egei ai.
19Narilak norokhwi. Henarilak honorokhwi logon dem wene ukpoluk ’gwi-’gwani nal lai lagai holuk, his logon en pobuk togolik Allah e’bek woluk worogup ai paget, 20#Ams. 10:12; 1Pet. 4:8wene yu henede eberu o. Sa en wiak tagalat, u’gwarek en ’gwi-’gwani nal lai lasuam e, at mesik en pobuk togolik Allah e’bek woluk wago holuk e, ebe warom hegit a’geat deliselat, wiak logat tegei a’ge ano erlagapsogo ukpasulat, tua o, oluk, oruak ai henede eberogu lomup o.
Currently Selected:
Yakobus 5: Wul
Highlight
Copy
Compare
Share
Want to have your highlights saved across all your devices? Sign up or sign in
