Ulangan 33
33
Musa en e, “Allah en obaphenebise lemak o,” oluk aphwami Israel a’ge ena’gul onuk lo’bok mo’gulentesi wene
1Asogo mo’gulesimu, at Musa Allah en yo’go pesi a’ge ano ebe owan warom erlak welat, aphwami ena’gul onuk Israel a’ge Allah en obap enebise lemagoluk wene disogo egei,
2“Nenaik ’gain Onuk Logo a’ge dom Sinai pam en waga. Wagarik e, o mo yegelogo liplau wago ’gela’ge, o Edom eba hegit waga. Wagarik, ebe dom Paran pam en eiyagai yo’go onobou waga. At is malaikat enebe 10.000 a’ge enemin, e’gik ’bekhit akhit odouk ’gwielak welago yo. 3Demat Nenaik ’gain Onuk Logo a’ge eiyagai ede hwedik welago yo. Aphwami at en wogenebegei a’ge nak enebe lo’bok ’berlegat tenentarok welago yo. Nis at eragam nondogorlu pam hurotluk erliktogulat, at en,
Disogo togu lomup, asogo togu lomup, oluk mo’gulnentesi a’ge wene ai hwelak poluk hegitsogo togulat, togu lomok o. 4His en e,
Wene at Musa en,
Disogo togu lomup, oluk mo’gulnentesi a’ge ai hwelak poluk hegitsogo togu lomup o. Aphwami nena’gul onuk nis a’ge nena’ge di a’ge yu a’ge abel akhit a’ge wene ’gela’ge a’geat de, lok logo re, nonowene aiyat o, oluk egep ai o. 5Asogo ogwiam his aphwami Israel a’ge honuelak enemin odoktigep ai erlige re, at his henaik ’gain Onuk Logo a’ge aga ai o,” oluk mo’gulentesi.
6Asogo mo’gulentesirik, aphwami ena’gul onuk Ruben a’ge paget wene Allah disogo mo’gulesi,
“Is ena’gul onuk Ruben a’ge enebe weiyat a’geat de, modok erlak om erlakma en welemak o,” oluk mo’gulesi.
7Asogo mo’gulesirik, aphwami ena’gul onuk Yehuda a’ge paget wene Allah disogo mo’gulesi,
“Nenaik ’gain Honuk Logo a’ge Allah, naik. Aphwami Yehuda a’ge en honuk ’balogu lema a’ge ai hesa’go hwelise lomup o. Is enematekma agai holuk e, pobuk ena’gul Israel a’ge mesigarat welemagoluk, is Yehuda a’ge ai enemin la’bulogo onobomup o. Is enebaget onoweim ebip o, naik. Eneselei a’ge en waronobuogoluk togumu delenebip o, naik,” oluk Allah mo’gulesi.
8 #
Kel. 17:7; 28:30; Bil. 20:13 Asogo mo’gulesirik, aphwami ena’gul onuk Lewi a’ge paget, wene Allah disogo mo’gulesi,
“Is ap hat heragam a’ge ena’gul onuk Lewi a’ge hat hemin hwedik welat, hebe eiye welagai o. Asogo welat, enemik pam wantogwi a’ge onuk Urim emin Tumim emin, ebam hat hede epasu legen a’ge paget hin wasuam se’geksogo mo’gulnontuagoluk mo’gulnentasu legen ai o. O onuk Masa eba en enebabut ’baliselat, ik Meriba elarukmu eba en henemin wene ’balogulat, tigep ano pam en, 9enebabut hat hebam lo’boksogo welat, enielak enaiklak enebaget emin, onuelak onosi enebaget emin, eneiyagai enebaget emin abel pamat poluk, hat hebaget nak e, logo pegesa ai o. Hat en e,
Disogo togu lomup, asogo togu lomup, oluk mo’gulnentigen wene ai, is en hwelak poluk hegitsogo togulat, ye, hat en e,
An en wene wusogo wokhenebegis o, oluk egenma, is en,
Nis at eiyagai, oluk egesa ai o. 10Holuk e, pobuk is en e, hat en,
Disogo togu lomup, asogo togu lomup, oluk mo’gulnentigen a’ge wene ai ’berlegat is heiyagai en enebit erlaksogoat togu lemagoluk mo’gulentasulat, wam di a’ge yu a’ge emin, e’ben op a’ge emin, hat hebaget wusogo narlhogumu ebano narlhogulat, togu lemak o. 11Naik, aphwami ena’gul onuk yu a’ge enanni oruak a’ge emagoluk opsogo lerentasu lomup o. Is en yabuk hat hebaget togwiam hebam lo’buk ese lomup o, naik. Is eneselei a’ge ’berlegat pobuk waronobuogoluk weim obok ogumuno oluk, hat en erlagap pasu lomup o,” oluk mo’gulesi.
12Asogo mo’gulesirik, is aphwami ena’gul onuk Benyamin a’ge paget wene disogo egei,
“Aphwami ena’gul onuk Benyamin a’ge yu re, hat nenaik ’gain Honuk Logo a’ge hede hwedik a’ge o. Holuk e, hat hebe is ene’gerlakma modok welat, hup erlige tenentarok modok wolomup o,” oluk mo’gulesi.
13Asogo mo’gulesirik, is aphwami ap Yusuf en dogo’gwe a’ge paget, wene Allah disogo mo’gulesi,
“’Bogorl pam en moru en is ono’gwiang pam sakhorak pasulat, ik a’bosu ’gwiang ogola akhit en wogentarlu agalat, taga lomup o, naik. 14Di a’ge yu a’ge owi yogo a’ge e’gen egesiso erlige lo’bok, e’gen modok op a’ge edip pam en momi ago a’ge ebam louksogo ikhasu lemak o, naik. 15Is onodom pageat hat en walhegenma welago a’ge ebetne re, di a’ge yu a’ge e’gen modok op a’ge ese lemak o, naik. 16At Yusuf ebe, at uelak, osi, onue ’gain aga ai en, eiyagai ono’gwiang pam en e, di a’ge yu a’ge yogo a’ge op modok a’ge nak ebam louksogo wogentasulat, hat hebe e houtak a’ge e’gerlakma en odouk magale ’gwialiselat hiak mo’gulnigen ano hebabut op en obap pasulat, taga lomup o, naik. 17Yusuf e, wam sapi ierak anni a’bik ano ’gela’ge emak o. Wam sapi ierak e’gelema a’ge iak a’gul pam oruak ai ’gela’ge re, ap Manasye a’ge esan, modok a’bik ribuan ’gela’ge emak o. Ye, ap Efraim a’ge esan, modok a’bigat puluhan ribu ’gela’ge emak o. Wam sapi naduk dogo ierak a’ge a’gul pam en dainsogo warenebiso ’gela’ge, at Yusuf en dogoma a’ge ap esan a’bik ai en, aphwami logon ena’gul onuk a’bigat a’geat de, wusogo o di owi yu owi hwerli ’bogorl edip-edip eba peragonobogu lemak o,” oluk mo’gulentesi.
18Asogo mo’gulesirik, is aphwami ena’gul onuk Zebulon a’ge emin, Isakhar a’ge emin, enebaget wene Allah disogo mo’gulesi,
“Aphwami ena’gul onuk Zebulon a’ge en ebela modok no’gulat di a’ge yu a’ge o’go ’balogulat, saborogulat, togulat e, opsogo welemak o, naik. Ye, is aphwami ena’gul onuk Isakhar a’ge re, onowi sum owi werikmu modok welat, onogola enagai hogulat op modok welemagat o, naik. 19Asogo welat e, aphwami ena’gul onuk mesik mu a’ge yo’go onoboma, is Zebulon a’ge onodom pam odoktu omtik, wam di a’ge yu a’ge hat hebaget narlik hobogulat, tu hegitsogoat demat narlhosu waga lemak o. Ye, is e, di a’ge yu a’ge op a’ge ik laut ye’gelakma a’ge horlogulat, ik al laut esa’go’gwe welago a’ge horlogulat, togulat, enilmu oruak a’ge ema o,” oluk mo’gulesi.
20Asogo mo’gulesirik, is aphwami ena’gul onuk Gad a’ge enebaget wene disogo egei,
“Nenaik Allah hat en is aphwami ena’gul onuk Gad a’ge onowi eba logap pasu ai en, erliktogu lomok o. Is aphwami ena’gul onuk Gad a’ge enebabut e, mene orlomene ebabut wiak a’ge onuk singa di a’ge yu a’ge wagoma werigoluk pangtak wolomtik libagalat, e’gik de a, agap a’gul pam a’ge de a, derlelogo weriso ai ’gela’ge welemak o. 21’Gwiang modok op a’ge is onu’gwarek enebaget eiye emak o. Ye, onuelak ’gaindek eiye ema a’ge is a’geat welemak o, oluk ap is a’ge edigenebasu lemak o.
Aphwami Israel a’ge onuelak ’berlegat enemin enebe mesikmu odoktak poluk, Allah en,
Disogo tip, asogo tip, oluk egei wene ai, is emin en ’berlegat togu lemak o,” oluk egei.
22Asogo egeitik, is aphwami ena’gul onuk Dan a’ge enebaget wene disogo egei,
“Is aphwami ena’gul onuk Dan a’ge enebabut e, mene orlomene ebabut wiak a’ge onuk singa emalik ’gela’ge, o onuk Basan en da’golek-ya’golek liplau wagai o,” oluk egei.
23Asogo egeitik, is aphwami ena’gul onuk Naftali a’ge paget wene disogo egei,
“Is aphwami ena’gul onuk Naftali a’ge Nenaik ’gain Onuk Logo a’ge enedeap onoboluk e, di a’ge yu a’ge ebam louksogo wogentasu lomup o. Ye, onowi re, ik Galilea ye’gelakma en ’bekhit hwerli ik o’but hegit welemak o,” oluk mo’gulesi.
24Asogo egeitik e, is aphwami ena’gul onuk Asyer a’ge paget, wene Allah disogo mo’gulesi,
“Aphwami ena’gul onuk pema akhit, we, wei logon miasogo ’gela’ge obabenebiselat e, is aphwami ena’gul onuk Asyer a’ge nak e, modok loksogo ’gela’ge obap enebasu lomup o. Is enarilak onorokhwi en isat enede ’gela’ge welemak o. Ye, is eniabukmu e zaitun esei op a’ge e’gen a’bosu a’bik a’ge porluktaga lemak o, naik. 25Is enelaluk welat, op lo’buksogo welemagoluk, is onowi kota ’berlegat, leget pakleget emde ’belak o’gwe re, ’goduk tembaga a’ge emin, ’besieme’gen a’ge emin, hele’gik welemak o,” oluk mo’gulesi.
26Asogo mo’gulesirik, aphwami Israel a’ge la’bulogo enebaget e, disogo egei,
“His aphwami Israel a’ge yu, aphwami en mu a’ge paget de,
Nenaik ebe aiyat o, oluk ogwi a’ge ai, nis nenaik Allah ’gela’ge mesik modok erlak o. Holuk e, at ebe erliktogukhwe ’bogorl pam wagalat, his lethentaigoluk o hena didelna wagalat, tago yo. 27Allah en e, tenhentarok modok welat, e’gik anni a’ge ai pam lethentasu modok welema o. At en his honorogolema heneselei a’ge mukho lebik enebasulat,
His en is modok erlagap enebemit, oluk mo’gulhentasu lemak o. 28His ap Yakub en dogoma a’ge yu, pobuk o opma lil ’bogorl pam en a’bosu ’gwiang pam sakhorak pasukhwe, gandum emin, anggur e’gen a’bosu emin, a’bikmu welat e, op lo’buksogo wolorogup o. 29His aphwami Israel a’ge yu, honogola henagai hogu lomup o! Nis Nenaik ’gain Onuk Logo a’ge en his delhenebegei ai ’gela’ge, is aphwami ena’gul onuk lo’bok logon delonobu erlak o. Nis Nenaik ’gain Onuk Logo a’ge ai, ebe his oruak o’gwe otluk, heneselei a’ge mabenap onoboluk, henanni emagoluk takhenebasulat, tagalat ebe re, ’garok weim obogwi a’ge ai emin, aphwami en waronobuano oluk sing ’buktogwi ai ’gela’ge emin, ai ’gela’ge welemak o. Aphwami heneselei a’ge ai en,
Henedeap nenebemit o, oluk mo’gulhentau wagaiam e, his en is ai mabenap onobogu lorogup ani o,” oluk mo’gulentesi.
Currently Selected:
Ulangan 33: Wul
Highlight
Copy
Compare
Share
Want to have your highlights saved across all your devices? Sign up or sign in
