Ulangan 32
32
1An weni ’bele’gik ai, hat ’bogorl hesa’go opsogo hwelip o.
Hat ’gwiang hesa’go opsogo hwelip o.
2An en mo’gulentasu legi a’ge ai, moru ’gela’ge ’bumak o.
Niak eselegi a’ge ai lil ’gela’ge ye’ge lemak o.
Moru lebe-lebe e’gela-herle’gela pam ’bu ago ai ’gela’ge emak o.
Moru ’gwiangma di a’ge yu a’ge yogo’gwe
sakhoap til lasu ai ’gela’ge taga lemak o.
3An en Nenaik ’gain Onuk Logo a’ge erliktaga legi o.
His en, Nenaik Allah obok opsogo woluk lit o.
4Nenaik ’gain Onuk Logo a’ge anni a’bik ai pam erlele wokhenebiso yo.
At en di a’ge yu a’ge ’berlegat ’garoksogo nak tiso yo.
Hegitsogo nak tiso yo.
Nenaik Allah ebabut e, ’goboksogo uknonobo erlakma en,
mesik dagan tiso erlak o.
At op nak tiso yo. Demat a’ge nak tiso yo.
5Asogo tiso a’geat de, his hena’gul onuk yu a’ge,
at emin hwedik wolom henebit o.
Henebe at eiyagai wolom a’ge henebabut erlak o.
Hena’gul onuk yu a’ge re, dagan nak togu legep a’ge o.
Wiak nak togu legep a’ge o.
6Nenaik ’gain Honuk Logo a’ge en obapnenebiso a’ge ai paget,
his en o’go asogo, tu a’ge togu legep a?
His henebabut uo a’ge ’gela’ge,
henede eberu modogat mia o. His henaik at erlak no?
At en walhentesi erlak no?
His hena’gul onuk mesigat welemagoluk,
at en polikhonoboluk wokhenebegei erlak no?
7Aphwami naduk welegesa a’ge enebam eberit o.
Henaiklak en mo’gulhontuagoluk,
enebam hin logon wokhomup o.
8 #
Per. 17:26
At ’bogorl abel likho a’ge en ’gwiang so’burentasulat,
aphwami ena’gul onuk lo’bok, onowi lo’bok wogentesi o.
Ena’gul onuk lo’bok enebaget, at ot ’bogorl pam a’ge en,
anni pam senentarok welemagoluk eiye tagenebesi o.
9Asogo a’geat de, aphwami Yakub en dogoma a’ge,
Nenaik ’gain Onuk Logo a’ge u’gwarek eiyagai welemagoluk,
enebe wogenebegei o.
10O da’gwil ya’gwil no’gumu enebe wogenebegei o.
O leimu aphwami enebe erlak o’gwe no’gumu,
wogenebegeitik erlele wokho, tenentarok welago yo.
Enil e’gen horluktu ano oluk,
alnano togwi ’gela’ge,
at en opsogo tenentarok welago yo.
11Tuewatni ’gela’ge emalik darak nese lemagoluk mo’guleselat,
agapsaburl langtak a’ge pam yarukho woluk lasu o.
12Ai ’gela’ge Nenaik ’gain Onuk Logo a’ge u’gwarek enat,
eiyagai wogonoboluk denago yo.
Aphwami logon en nenaik ebe aiyat oluk ogwi a’ge ai en e,
at Allah en lerentasu ’gela’ge lerentasu erlak o.
13At en e, eiyagai o dom eiye welemagoluk enebesi o.
Is onso’boru eniabukmu a’ge no’gulat,
is ’gin parema a’ge dom petne welago a’ge a’bosu no’gulat,
is minyak e zaitun e’gen a’bosu,
helep petne yogo a’ge no’gulat, togwi o.
14Onuam sapi kambing domba agamu a’bosu a’bik a’ge welat,
is onuam a’ge nak e, op modok welaga.
Is en a’ge gandum e’gen anggur e’gen a’bosu,
op modok oruakhwe no’gulat, welegesa o.
15Nenaik eiyagai ebano, ena’ge a’bik tenak welegesa o.
Asogo a’geat de, Allah ebe nenebit o,
oluk homi peberigisa ai o.
Is onso’boru ningsogo noluk, enebe enesei a’bik welat,
nenaik Allah walnentesi a’ge, is en ukpoluk libegesa o.
Enaik anni a’bik welat, delnenebegei a’ge ebe ukpegesa o.
16Is en dogwi asua erliktogumu re, Nenaik ’gain Onuk Logo a’ge en ebirap enebesi o.
Is wiak tigisa ai pam, at modok olot het egei o.
17 #
1Kor. 10:20
Is en onuam wusogo, Allah paget pogu legesa erlagat.
Mu’gat ebabut wiak a’ge akhit nak pogu legesa o.
Is aphwami mu a’ge logon en, Nenaik ebe aiyat,
oluk ogwi a’ge ano paget nak pogu legesa o.
Is enebe eneperlak a’ge,
ai paget de, obogu legesa o.
Ene’balak en hau do’goksogo woru erlak a’ge,
ai ebaget pogu legesa o.
18Is en nenaik Allah nenebe delnenebiso a’ge ano,
is en ebe ukpegesa o.
Is enelalugap enebegei a’ge ano, ebe memerak pegesa o.
19At Nenaik ’gain Onuk Logo a’ge en,
is asogo togukhwe il ontoluk,
olot het agalat,
Is an neiyagai erlak o, oluk enebe ugenebesi o.
20Asogo ugenebesirik disogo egei,
Is ena’gul onuk ai a’ge ena’gul helep ’gela’ge o.
An nemin hwedik wolom puk o.
Ai en pobuk leronto nebit o.
Is en asogo togulomtik,
ologun pam no’gosogo ema o.
An nil weleik o.
21 #
Rom. 10:19; 1Kor. 10:22 Is enedemu a’ge pam, he’berik poluk erliktigisa o.
Anat erliknobu a’ge oluk, nolot het aga o.
Is onodogwi enasua anni erlak a’ge ai pam, nolot het pegi o.
Ai ’gela’ge re, an nebe isat tenentarok wolom o.
Aphwami ena’gul onuk erlak a’ge wogonobumu,
neiyagai onolot het ema o.
Aphwami modok uo a’ge, an en is wogonobumu,
neiyagai en enebirap onobua o.
22Odouk magale lobuk-lebak nasu ’gela’ge,
is enebam an nolot het otluk,
odouk nil-nil hwerli opma pam ’bua o.
O ’gwiang ebe nasulat,
di a’ge yu a’ge ebam yogo a’ge nasulat, ’berlegat nouwa o.
Dom ebe nasulat, edip emin modok nouwa o.
23An en di a’ge yu a’ge wiak a’ge onogorlok a’ge,
an en e, enebam pou wago modok weleik o.
An nogodok ’berlegat a’ge pam, is ’besingentasu modok weleik o.
24An en ou onogorlok a’ge is enebam paik ai en e,
is enebam aganhan enat, enebe warema o.
So’boru nele en warema o.
Is wam maro iak anni a’bik a’ge en lebilonobuagoluk,
’gosu herlegetie aphwami warenebiso a’ge,
iak en lebilonobuagoluk, perakpaik ani o.
25Is enebe odip o’gwe lagaimu weim obogulat waronobua o.
Is enebe o pam welat, onogorlok a’bik houwa o.
Ap souwe a’ge emin, hwelani emin,
enebe modok erlagap enebaik o.
Is malik pou a’ge emin, is logon sebal a’ge emin,
enebe modok erlagap enebaik o.
26Is aphwami mu a’ge en enebe eberak erlak,
memerak onoboluk welemagoluk,
an en is enebe modok erlagap enebaik o.
27Asogo a’geat de,
aphwami Israel eneselei a’ge ai,
eniak esegen wiak ai re, nebit o.
An en tisokhweat de,
is enede wiak eberogulat,
is Allah eiyagai a’ge ai, nis en mi-miarak pege,
enede opouwano oluk Allah enat tegei o.
28Aphwami ena’gul onuk Israel a’ge ai,
enede modok erlak a’ge,
enede modok ’gagalak erlak a’ge o.
29Is enede ’gagalak wellepma re, pobi telip a’ge o.
Nis pobuk disogo omul hegi, oluk epelep a’ge o.
30Ap ebe mesigat a’ge en,
enebe 1.000 a’ge no’gosogo mugentesi o.
Ap enebe ’biren a’ge en,
enebe 10.000 a’ge no’gosogo mukho lebigenebegesa o.
Nenaik ’gain Onuk Logo a’ge is enebe o’go ’balenebegeimu,
Allah anni a’bik ano en is enebe ugenebesi o.
31Aphwami Israel a’ge, eneselei a’ge en ogulat e,
Nis sennentarok welago a’ge ai,
is aphwami Israel a’ge tenentarok welago a’ge,
Allah ai ’gela’ge erlak o.
Emin hegit e, erlak, oluk, is enaluk oruak o.
32Is aphwami ai enebabut e,
aphwami Sodom Gomora,
enebabut ’gela’ge modok wiak o.
Enebabut e, anggur e’gen eseik wiak,
aphwami warenebiso a’ge ’gela’ge o.
33Is enegeik anggur a’bosu ai, ’gosu herlegetie a’ge,
aphwami warenebiso a’ge ’gela’geat o.
34Nenaik ’gain Onuk Logo a’ge en e,
eiyagai eneselei a’ge en tagenebegesa a’ge ai,
ede eberak modok oruak o.
Asogo eberak welemarik en,
o agauwa elit ema erlige holuk en,
wene enebam pouwa a’ge oruak o.
35 #
Rom. 12:19; Ibr. 10:30 Is en tigisa a’ge o’go,
wene enebam poluk waronobua o.
Agauwa wolom erlakma enat enebe alemarema o.
Is wiagap onobua ano arat horok lau waga o.
36 #
Mzm. 135:14
Nenaik ’gain Onuk Logo a’ge en eiyagai delenebiselat,
is aphwami at eragam a’ge enanni erlak emarik oruakma,
is en tu mia en e,
at en il ontoluk edeap onobua o.
37Nenaik ’gain Onuk Logo a’ge en eiyagai hin wogentasulat,
His en e, aphwami en mu a’ge paget de,
Nenaik ebe aiyat, oluk ogwi a’ge ai,
elirat anni modok a’bik, oluk opogu legep a’ge ai,
enebe o ’geba oruak, oluk hin wogentasu lema o.
38Wam di a’ge yu a’ge his en enebegep a’ge ai esei is ne’gesa o.
Ik anggur e’gen a’bosu enebegep a’ge ai is enat ne’gesa o.
Is en perlene delhonobumagoluk ononuk ’balhemit o.
Is en his tenhentarok wolom a’ge emak o.
39Yethemit, Allah an nemategat o.
At mu a’ge mesik ebe modok erlak o.
An en enebe warenebiselat, enelalugap enebiselat tago a’ge,
eniebil lok emagoluk warenebiso yo.
Enebe selang uagoluk obap enebiso yo.
An en tisoma, is mu a’ge en niak sagalu mia o.
40An Allah nu’gwarek nemategat nelaluk modok welago yo.
An ne’gik lagabak poluk ho’buk ’balise legi a’ge o.
41An ne’garok amolit a’bik a’ge ai e’gat merak poluk,
wene enebam pil laik o.
An neselei a’ge warenebik o.
An nebe modok enapseri a’ge ai ’berlegat wene enebam paik o.
42Is enemep an nogodok petne lo’bok ua o.
An watnobuogoluk ogwi a’ge ai,
ne’garok pam warenebik o.
Aphwami an neselei a’ge dok werak, ene’gik herle werak,
enelaluk ugenebaik erlakma en, warenebik, oluk egi o.
43 #
Rom. 15:10; Wah. 19:2 Nenaik ’gain Onuk Logo a’ge eiyagai warenebiso a’ge,
at en wene enebe ’berlegat enebam pouwa o.
At eiyagai ena’gulmu eselei a’ge ai waronobua o.
Waronobua a’geat de, is aphwami ena’gul onuk lo’bok en,
nenaik Allah ’gain Onuk Logo a’ge eiyagai ai erligenebit o.
At en at eiyagai wiak togwi a’ge ai erlagapsogo ukpasu o,
oluk is en weni worogu lemagoluk mo’gulentigisa. 44At Musa emin, Yosua ap Nun omlogo ano emin, emin en weni ai is Israel a’ge ’berlegat mo’gulontogukhwe, enesa’go hwelak welegesa.
At Musa en, “Disogo tu, asogo tu,” oluk ologun pam mo’gulentesi wene
45At Musa en wene at Nenaik ’gain Onuk Logo a’ge en nenesa’go weregei a’ge aphwami ena’gul onuk Israel a’ge arat mo’gulentesirik, 46mesik disogo mo’gulentesi,
“Wene an en,
Disogo togu lomup, asogo togu lomup, oluk yogodak mo’gulhentegis a’ge ai ’berlegat henedemu pomup o. His heneiyagai en wene Nenaik ’gain Onuk Logo a’ge en,
Disogo togu lomup, asogo togu lomup, oluk mo’gulnentesi a’ge wene ai, at emin hwedik welat enebit erlaksogoat togu lemagoluk e, mo’gulentasu lomup o. 47Wene nenesa’go weregei wene ai yogun a’ge eniak esei a’ge puk. Demat henelalugaphenebiso a’ge o. Agauwa wolom erlakma enat, o ik Yordan ’balogo ’goluk sebeli ’gogupmu eba ’goluk, henebe umur yatsogoat wolorogup en e, at en,
Disogo togu lomup, asogo togu lomup, oluk nenesa’go weregei wene ai ’berlegat hwelak poluk togu lomup o,” oluk mo’gulentesi.
48 #
Bil. 27:12-14; Ula. 3:23-27 Asogo mo’gulentesimu, ai erligeat, at Nenaik ’gain Onuk Logo a’ge en Musa disogo mo’gulesi,
49“O kota Yerikho en liplau wagaimu, o Moab de, dom Abarim petne eba lak o. Laguntik e, dom onuk Nebo pam ligoroguntik, o Kanaan an en aphwami ena’gul onuk Israel a’ge agauwa wolom erlakma enat wogentaikmu eba hil yethomup o. 50Asogo yethasuam e, hat hue Harun dom onuk Hor pam waraga ano ’gela’ge, hat dom Nebo ai pam hebe warorogun o. 51His hemin en e, o Zin leimu o kota Kadesh eragam ik Meriba elarukmu eba en, an niak hwelak wolom erlakma en, aphwami ena’gul onuk Israel a’ge enilem an nebe degelak a’ge hau do’goksogo watnebigep erlak ai o. 52Asogo tigep ai en, hat hebe o an en aphwami ena’gul onuk Israel a’ge wogentaikmu eba ’gogun modok erlak o. We, hebe walekma en hil yethagun ai o,” oluk mo’gulesi.
Currently Selected:
Ulangan 32: Wul
Highlight
Copy
Compare
Share
Want to have your highlights saved across all your devices? Sign up or sign in
