Ulangan 31
31
At Musa en at ebalema Yosua edikpesi wene
1At Musa en asogo mo’gulentesirik, mesik aphwami Israel a’ge disogo mo’gulentesi,
2 #
Bil. 20:12
“Yogodak an nebe umur 120 tahun arat agarikmu re, an en his wokhonoboluk lo re, mia aga o. Ye, at Nenaik ’gain Onuk Logo a’ge en e,
Hat ik Yordan ’balogo liborogun modok erlak o, oluk mo’gulnesimu re, mia o. 3At Nenaik ’gain Onuk Logo a’ge ebe enat a’gulapsogo his wokhonoboluk libotluk e, aphwami ena’gul onuk o eba welagai a’ge wollo’gen dagalogo waronobumu re, is onowi pam eba his sebelo ’gogup o. Asogo ’gogulat, at Nenaik ’gain Onuk Logo a’ge en egei a’ge hegitsogoat, at Yosua ebe en ebela a’gulapsogo, wokhonoboluk libemarik ’guayat o. 4#Bil. 21:21-35At Nenaik ’gain Onuk Logo a’ge en, ap ’gaindek aphwami Amori a’ge onuelak ononuk logo a’ge Sihon emin, Og emin, enebe mi-miarak onoboluk waronobogulat, onowi eminat modok wollo’gen dagalogo erlagap enebegei ai ’gela’ge, aphwami ena’gul onuk eba a’ge modok wollo’gen dagalogo erlagap onobuayat o. 5Nenaik ’gain Onuk Logo a’ge en e, his en is aphwami ai mi-miarak onoboluk, henanni emagoluk takhenebasuam e, an en mo’gulhentasulat,
His en is aphwami ai disogo tagonobomup, oluk mo’gulhentegis a’ge ai modok emin hegitsogo tagonobogu lomup o. 6Holuk e, his henede ha’buksogo welat, honogorlok erlaksogo wolomup o. At Nenaik ’gain Onuk Logo a’ge Allah ebe en his lethontouwa ai en e, is honogorlok hagup o. At en e, his ’goboksogo ukhonobo erlakma en tenhentarok welema o,” oluk mo’gulentesi.
7Asogo mo’gulentesirik, at Yosua worlhasuam wagama re, aphwami Israel a’ge ’berlegat enil pam disogo mo’gulesi,
“Yosua, nomlogo yo. Hede ha’buksogo welat, hogorlok erlaksogo wolomup o. Hat en aphwami yema onueat oroguntik, wogonoboluk o Nenaik ’gain Onuk Logo a’ge en nene’balak wogentaigoluk wene weragenebesimu ebano sebelo ’gogun o. 8#Yos. 1:5; Ibr. 13:5Asogo sebeli ’gwigoluk ’gwisoma re, at Nenaik ’gain Onuk Logo a’ge ebe en hat hebe ’goboksogo ukhobo erlakma en tenhiarok modok welat, lethiouwa o. Ai en e, hat en,
Nogorlok o, oluk hede perik togun o,” oluk mo’gulesi.
Allah en enesa’go weregei wene ano tahun hebarlik a’ge pam wolomtik, mesik sabit lai lasu holuk, onuk tualogu lemagoluk mo’gulentesi wene
9At Musa en asogo mo’gulesirik, wene Allah en,
“Disogo togu lomup, asogo togu lomup,” oluk enesa’go weregei wene ano ’berlek pelal wokho pesi. Asogo wokho pesirik e, is ap Allah eiye a’ge ena’gul onuk Lewi a’ge peti Allah en wene wusogo woknenebegei oluk hele’gik a’ge ano woluk no’gu lemagoluk yo’go enebegesa a’ge ebano emin, aphwami Israel a’ge onuelak logon emin, wogentesi. 10#Ula. 15:1-2; 16:13-15Asogo wogentesirik, disogo mo’gulentesi,
“Tahun hebarligen wolomultik, mesik sabit a’ge pam, di a’ge yu a’ge is logon wogontogwi a’ge enebam ’belak oruakma,
Arat. Weat hwerlegen, oluk ogwi ano pam, tahun ai erlak eigoluk tagoma, seni o tabo e e’gela ’balogo werik poluk togulat, 11is aphwami Israel a’ge, Nenaik ’gain Onuk Logo a’ge Allah erliktuogoluk, o at en polik pouwema eba odokti loluk oruakma, wene nenesa’go weregei wene pelal wokho pegi a’ge ai, is enebaget heniak loksogo onuk mo’gulogulom o. 12Asogo onuk mo’gulogwiam, henebe ap emin, hwami emin, henemalik emin, aphwami ’bok a’ge his honowi lo’gwe kota lo’bok welema a’ge emin, enebe ’berlek en Nenaik ’gain Onuk Logo a’ge Allah en e,
Disogo togu lomup, asogo togu lomup, oluk mo’gulnentesi a’ge wene ai, hwelak poluk hegitsogo enebit erlaksogoat togulat, Allah eniak erlebesogo hau worogulom a’ge ai mo’guluagoluk, enebe odoksogo onoboluk enesa’go hwelak oruakhwe onuk mo’gulogu lomup o. 13Asogo togu lorogup holuk, agauwa wolom erlakma enat, ik Yordan ’balogo libotluk, o wolomma eba welat, his heneiyagai eba en wene Nenaik ’gain Onuk Logo a’ge Allah en,
Disogo togu lomup, asogo togu lomup, oluk mo’gulnentesi ai wene eneperlak enesa’go hologwi erlak a’ge ai elirat enesa’go hologulat, Nenaik ’gain Onuk Logo a’ge Allah eniak sakhosogo erliktogulom a’ge ai mo’gologulat, togu lema o,” oluk mo’gulentesi.
Nenaik ’gain Onuk Logo a’ge en, “Disogo togu lomup, asogo togu lomup,” oluk ologun pam Musa mo’gulesi wene
14Asogo mo’gulentesimu, pobuk at Nenaik ’gain Onuk Logo a’ge en wene Musa disogo mo’gulesi,
“Hat agauwa logon eminsogo helaluk wolorogun erlak o. Holuk e, an en at Yosua en tagalom a’ge mo’guleik en e, at ebe worlholuk, an nowi sum owi werikmu woluk manup o,” oluk mo’gulesi. Asogo mo’gulesimu, at Musa en Yosua worlholuk woluk, o Nenaik ’gain Onuk Logo a’ge owi sum owi werikmu woluk laga.
15Asogo woluk lasuam e, Nenaik ’gain Onuk Logo a’ge ebe o hena edik a’ge ano ’goduk ogola en o sum owi werikmu ano horoksogo eba en onorogolema inaga.
16Asogo inagarik, Musa disogo mo’gulesi,
“Hat hebe warorogun a’ge arat horok aga o. Waragoam e, aphwami ena’gul onuk Israel a’ge en e, an ’goboksogo uknobogulat, an en wene wusogo wogenebegismu, is en e,
Nis hat heiyagai wolomul, oluk egesa a’ge ano, ukpoluk e, agauwa logon emin wolom erlakma en, o is en sebelo ’gumu eba welat, is aphwami eba a’ge en mu a’ge paget de,
Nenaik ebe aiyat, oluk erliktogwi a’ge ai erliktogu lomogoluk, an ’goboksogo uknoboluk libema o. 17Is asogo togwiam an nolot het a’bik otluk, ’bekhit ’golokho enebam eik o. Asogo toluk, enebe arat ugonoboluk, enebe modok erlagap enebaik o. Asogo erlagap enebasulat, di a’ge yu a’ge onogorlok a’ge a’bik enebam wiagapsogo pasuam is en e,
I, ai re, Nenaik ’gain Onuk Logo a’ge Allah sennentarok welago ’gela’ge sennentarok oruak erlak en hegi, oluk pobirak pouwa o. 18Ai erlige wiak asogo togukhwe an en delonobu modok nebit ema ai re, is en mu a’ge erliktogulat, wiak togulat, togu lema ai enat o.
19Yogodak hat en weni ’get a’ge yu, pelal wokho poluk, aphwami en wene enebam pogwiam ’bele’giselat, is logon enaluk a’ge en,
Demat asogo tigisa, oluk ogwi ai ’gela’ge, is en e,
Demat asogo tige, oluk eberak welat weni worogu lemagoluk mo’gulontomup o. 20An en e, o ’gwiang moli op di a’ge yu a’ge modok a’bikmu his hene’balak wogentaigoluk wene weragenebegisogo eba wogonoboluk ’gwik o. ’Gwisoam, is o eba di a’ge yu a’ge nenagai opogu lema a’ge modok a’bik no’gulat, is enebe enelaluk modok op welema o. Asogo a’geat de, an en wene wusogo wogenebegismu, is en e,
Nis hat heiyagai wolomul, oluk egesa a’ge ai ukpoluk, pobuk an nebe uknoboluk libotluk e, is aphwami muon en, mu a’ge paget de,
Nenaik ebe aiyat oluk erliktogwi a’ge ai erliktogu lema o. 21Asogo togukhwe, an en di a’ge yu a’ge onogorlok a’ge wiak a’ge a’bik enebam paik o. Asogo a’geat de, weni yu nak e, aphwami en wene enebam pogwiam ’belo’gogulat, is logon enaluk a’ge en,
Demat disogo tigisa, oluk ogwi ai ’gela’ge, is en e,
Demat disogo tige, oluk eberak welat weni ai worogu lemak o. An en o is wene weragenebegimu eba owan wogonoboluk ’gwilo erlakma en, welegi a’geat de, is enede eberogwi a’ge ai an naluk o,” oluk mo’gulesi.
22Asogo mo’gulesimu, at Musa en o ai erligeat weni ano odo ’balegeirik e, is aphwami Israel a’ge mo’gulentesi.
23 #
Bil. 27:23; Yos. 1:6 Asogo mo’gulentesimu, at Nenaik ’gain Onuk Logo a’ge en Yosua ap Nun omlogo ano disogo mo’gulesi,
“Yosua, hat hede ha’buktak poluk hogorlok erlaksogoat wolomup o. An en, o aphwami Israel a’ge wogentaigoluk wene weragenebegimu ebano hat en is wogonoboluk ’gwisoam an en lethiasu leik o,” oluk mo’gulesi.
24Asogo mo’gulesimu, at Musa en wene Allah en,
“Disogo togu lomup, asogo togu lomup,” oluk nenesa’go weregei wene ai tuesi’ga mesigat a’ge pam, wene edip pam en ’bekhit ede’bimu modok ’berlegat ’beli’gogo pelal wesi. 25Pelal asogo arat wesirik e, is ap Allah eiye a’ge ena’gul onuk Lewi a’ge peti Allah en wene wusogo woknenebegei, oluk hele’gik a’ge ano woluk no’gu lemagoluk yo’go enebegesa a’ge ebano disogo mo’gulentesi,
26“Allah en wene nenesa’go weregei a’ge pelal wogo yu, peti at Nenaik ’gain Onuk Logo a’ge en wene wusogo woknenebegei, oluk hele’gik a’ge yu eragam pema po a’ge modok oruakma re, aphwami en wene enebam pogwiam ’belo’gogulat, is logon enaluk a’ge en,
Demat disogo tigisa, oluk ogwi ai ’gela’ge, Allah en e,
Demat disogo henesa’go weregis o, oluk osolom ’gela’ge peti lolumu eba modok welemak o. 27Is enebabut e, ena’gul modok helep ’gela’ge welat,
Nenebit oluk homi pebironobogulom ’gela’ge nak enagai welema ai, an naluk o. An nebe nelaluk oruakhwe re,
Nenaik ’gain Onuk Logo a’ge nenebit, oluk homi peberigisa a’ge asogo takma re, an waromma re, ebenagaikmuat tua o. 28Yogodak e, aphwami ena’gul onuk yu a’ge onuelak emin, ’gaindek logon emin, enebe ’berlegat an neragam odoktu agaiam wene yu mo’gulentaik en e, worlentemit o. Worlentagupmu wagaiam e, wene ai, is ’bogorl emin, ’gwiang emin, enilem wene mo’gulontogwiam enaluksogo welemagoluk yo’goat enebegi o. 29An nebe arat waragoam e, is aphwami yu enebabut modok wiak otluk, wene an en is mo’gulentegis a’ge ai, is en e,
Wene ai nis nenebit o, oluk ukpouwa ai, an naluk o. Asogo ukpogulat, nenaik olot het emagoluk, wene at en,
Togup, oluk egei a’ge togwiam wene logat enebam pouwa o,” oluk mo’gulentesi.
Musa en weni mo’gulentesi wene
30Pobuk at Musa en weni di aphwami yu aphwami ena’gul onuk Israel a’ge enesa’go hwelak oruakhwe edipmu en ’bekhit ologun wusogo mo’gulentaigoluk tegeirik, weni ebe disogo mo’gulentesi,
Currently Selected:
Ulangan 31: Wul
Highlight
Copy
Compare
Share
Want to have your highlights saved across all your devices? Sign up or sign in
