Ulangan 30
30
Nenaik ’gain Onuk Logo a’ge en e, “Neiyagai. Henebabut heberlogup a’ge holuk, obaphenebik o,” oluk mo’gulentesi wene
1At Musa en asogo mo’gulentesirik, wene mesik disogo mo’gulentesi,
“Yogodak Allah en obaphonobouwagoluk ai a’ge pulhwerlagup a? At e, heman honobouwagoluk pulhwerlagup a. His enat pulhwerlagup en mo’gulhentasu legi o. An en, wiak disogo hagup, asogo hagup, oluk mo’gulhentegis ai, his Nenaik ’gain Onuk Logo a’ge en mukho honobouema aphwami ena’gul onuk mu a’ge ene’gerlakma eba welat, asogo wiak ’berlegat hogulat e, an en,
Asogo pulogo wenakhorlomup, oluk mo’gulhentegis a’ge ano henede eberogup o. 2His henebe emin, his en dogo’gwe a’ge emin, Nenaik ’gain Onuk Logo a’ge e’bek togolik worogup holuk, at en wene nenesa’go wusogo,
Disogo tip, asogo tip, oluk mo’gulnentesi a’ge an en yogodak mo’gulhentegis a’ge ai, henedemu enat hwelak poluk togu lorogup holuk e, 3Nenaik ’gain Onuk Logo a’ge Allah enedeaphonobua o. Asogo edeaphonoboluk, o henebe ’bogulogo aphwami ena’gul onuk mu a’ge ene’gerlakma perakhonobouwema ebano en togolik honobu otluk e, naduk op wolorogup ’gela’ge welemagoluk takhonobua o. 4His henebe asogo ’bogulogo o di owi yu owi ’berlegat loluk wolorogup a’geat de, Nenaik ’gain Onuk Logo a’ge en henebe odoktak honoboluk e, togolik wokhonoboluk wema o. 5Asogo wokhonoboluk wagoam, o nis nene’balak welegesema eba hisat eiye oroguptik wolorogup o. Asogo eiye agaiam e, Allah en nis nene’balak weiyat ’gela’ge op welemagoluk tagenebesi a’geat de, his nak e, op modok welemagoluk takhenebasulat, nene’balak enebe wei nak welegesa ai ’gela’ge erlak o. We, henebe modok a’bik takhenebasulat, tua o. 6Asogo takhonoboluk, his henebe emin, his en dogo’gwe a’ge emin, henagap hene’gerlimu a’ge ’balhonobu ’gela’ge, henede degelogo takhonoboma, henede emin, honogola emin, mesigat oroguptik, Nenaik ’gain Onuk Logo a’ge Allah henede hwedik welat, henebe henelaluk welat honowi pam eba wolorogup ani o.
7Asogo takhonoboluk e, heman ’berlegat ai, aphwami his heneselei a’ge en henebe enapseri welat, sebelogo honobuogoluk di wiak yu wiak takhonobogu lema a’ge ai enebam pouwa o. 8Asogo enebam pouwema re, his en togolik henaik ’gain Onuk Logo a’ge iak hologo togulat, at en,
Disogo togu lomup, asogo togu lomup, oluk mo’gulnentasu a’ge, an en yogodak mo’gulhentegis a’ge yu ’berlegat til lagalat, togu lomup o. 9Asogo togukhwe, Nenaik ’gain Onuk Logo a’ge Allah en e, his di a’ge yu a’ge ’berlegat togup a’ge ai ologun pam a’bik sabuthontouwa o. Asogo sabuthentasukhwe re, heneiyagai a’bik dagonobogulat, honuam a’bik agalat, tua o. Asogo wokhentasulat, heniabuk o’gwe di a’ge yu a’ge owi yorogup a’ge ebe modok a’bik ebam louksogo wokhentasu lema o. Asogo wokhentasulat, at Nenaik ’gain Onuk Logo a’ge ogola agai hasulat, hene’balak op welemagoluk tagenebesi ai ’gela’ge, his op welemagoluk takhonobua o. 10Asogo a’geat de, his e, Nenaik ’gain Onuk Logo a’ge Allah iak hologo togulat e, at en,
Disogo togu lomup, asogo togu lomup, oluk nenesa’go weregei wene pelal wogo a’ge yu hwelak poluk hegitsogo togu lomup o. Asogo togulat, honogola emin, henede emin, mesigat oroguptik e, at e’bek togolik manup o.
11Wene an en,
His disogo togu lomup, oluk mo’gulhentegis ai re, his en togulom mia puk. Walekma oruak erlagat o. 12#Rom. 10:6-8Wene ai ebe ’bogorl pam oruak puk. Neneminat oruakma re, his en e,
Nis en wene ai nenesa’go hwelak poluk e, hwelak poluk tuagoluk sa en wai ligomtik woknenta ’buom no, oluk hin wo no? Erlak o. 13Wene ai ebe ik laut ye’gelak a’ge ’balogo etle akhit oruak ogo pugat o. Asogo oruakma his en e,
Nis en wene ai nenesa’go holholuk e, hwelak poluk hegitsogo tuagoluk, sa en wil lebemarik woknentau wom o, oluk hin wo no? Miayat o. 14Wene ai his hene’bek horogat oruak ai en e, his en asogo hin wo modok mia o. We, his henedemu wegeptik henalukmu re, ebe ’bekhitsogo togulom aiyat o.
15Holuk e, henelaluk welat op wolom a’ge ai pulhorlo a? At e, wiak wolomtik warom a’ge ai pulhorlo a. His en o yogodak ya pamat, polik pagathwerlemit o. 16His agauwa wolom erlakma enat Nenaik ’gain Onuk Logo a’ge Allah en o eba wokhonoboluk ’gwi laguptik obap henebisokhwe, henebe eba opsogo welat, hena’gul onuk lok agalat, togup en e, o yogodak yayat Nenaik ’gain Onuk Logo a’ge iak hwelak poluk ebe henede hwedik welat, at en,
Disogo togu lomup, asogo togu lomup, oluk nenesa’go wusogo mo’gulnentesi wene ’berlegat ai hwelak poluk hegitsogo togu lemis o, oluk yogodak yayat mo’gulhentegis o.
17-18Asogo a’geat de, his en wene ai henesa’go hologo hegitsogo tu henebit welat, is aphwami logon en, mu a’ge paget,
Nenaik ebe aiyat. Nenemin erliktogu lomok o, oluk lalhonobogwiam,
Onomuat, oluk ugonobo erlakma en eniak hologo erliktogup holuk e, his ik Yordan ’balogo libotluk, o eba ’gwilotluk agauwa a’bik welat, umur yatsogo wolom, erlakma enat, Allah en henebe wollo’gen dagalogo demat wathonobua o, oluk yogodak ’baksogo mo’gulhentegis ai, henede eberak wolomup o. 19Yogodak e, his henelaluk wolom a’ge pulhwerlagup a? Warom a’ge pulhwerlagup a. Allah en obaphonobuagoluk pulhwerlagup a? Heman honobuagoluk pulhwerlagup a. His en polik pagathwerlemit o. His en e,
Nis di a’ge pulhorlul, oluk ogwiam ’bogorl emin, ’gwiang emin, enil yetharok welemagoluk e, worlentegis o. Holuk e, his en e,
Nenelaluk wolom nenagai, oluk pulhwerlemit o. 20#Kej. 12:7; 26:3; 28:13Nenaik ’gain Onuk Logo a’ge Allah henede hwedik welat, at emin lo’boktak welat, iak hologo modok togu lomup o. Asogo togup holuk, Nenaik ’gain Onuk Logo a’ge en o nene’balak Abraham emin, Ishak emin, Yakub emin, wogentaigoluk wene weragenebesimu eba his henebe emin, his en dogo’gwe a’ge emin, henelaluk welat henebe umur yatsogo wolorogup o,” oluk mo’gulentesi.
Currently Selected:
Ulangan 30: Wul
Highlight
Copy
Compare
Share
Want to have your highlights saved across all your devices? Sign up or sign in
