Ulangan 29
29
Tugulom a’ge ’get poluk mo’gulentesi wene
1Dom Horeb pam at Allah en tugulom wene ologun ’balogo aphwami Israel mo’gulentesi a’ge ebano emin, la’bolik poluk tugulom wene mesik, is aphwami Israel, o Moab oruakma, Musa emin en hwalogo pouwagoluk, at Allah en di wene yu wene Musa mo’gulesimu mo’gulentesi ano yuat o.
2At Musa en aphwami Israel a’ge enebe ’berlegat odok tumak oluk, worlentesimu wagaiam, is ebano mo’gulentasulat. “At Allah en o Mesir eba ap Firaun emin, at emin yabuk tagalat welago a’ge emin, aphwami o eba welagai a’ge ’berlegat emin, tagenebasu a’ge ano henil ontogulat, 3is enebabut ’baligoluk, walhegeik tagalat, enaluk emak oluk, onogorlok a’ge mesik emin, elalin tu puk a’ge emin, modok nogorlok a’ge tago ano henil enat pobisogo hogulat, tigep ani o. 4Asogo henil hegep a’geat de, at Allah en his elit pobi tuagoluk, henede ’get a’ge wokhentasulat, henil dokhumsogo hagup en e, henil obap pasulat, opsogo hologu lemagoluk, henesa’go obapsogo henebasulat, tu erlakma en, o yogodak yu hwerliat welegep o. 5Ye, tahun 40 pam an en ebela o lei o’gwe wokhonoboluk wagokhwe, honosum ’buktak a’ge derlep eselat, honoyuk owi ’buktak a’ge dakpak eselat, 6Roti emin, anggur a’bosu emin, a’bosu anni a’ge emin, nagup en wokhentasulat, tu erlak o. A’geat de, at henaik Allah at nak, henaluk emak oluk di a’ge yu a’ge erlak holuk e, at enat wokhonoboluk waga laga ani o.
7 #
Bil. 21:21-35
Ye, nis o yema arat waga legerikmu en ap o Hesybon a’ge onuk logo a’ge Sihon emin, o Basan a’ge ap onuk logo a’ge Og emin, is en watnonobuak oluk, libegesa a’geat de, nis en agamsogo is wusogo enebege ani o. 8#Bil. 32:33Asogo wusogo onoboluk ono’gwiang wokho ap Ruben a’ge emin, Gad a’ge emin, a’gul onuk Manasye a’ge ado me’gerik emin, ani enemining a’ge ’gela’ge eiyetak pagathorlouwagoluk wogentige o.
9-13At henaik Allah en hene’balak Abraham, Isak, Yakub enemin wene ologun arat ologun ’balogo ho’buk ’balogo mo’gulentasulat, his ogo re, wene hwalogo mo’gulhentasulat, tegei ano ’gela’ge, his at eiyagai pulik henebasulat, ye, at his henaik Allah at agalat togup en e, olot het o yogodagat at henaik Allah henemin wene ologun ’balogo poluk ho’buk ’balogup en henaiklak tenhentarok welagai a’ge emin, weim wene ’balogwi a’ge honuelak emin, his Israel ap nak ’berlegat emin, honugwami emin, heneiyagai emin, ap ’bok henemin welat e ’gelogwi a’ge emin, ik nil lagai a’ge emin, ’berlegat odoktu egep at henaik Allah il pam yogodak edik oruakma re, di a’ge yu a’ge til laga legep a’ge op nak et til lasukhwe hagup en e, tugulom a’ge di wene yu wene ologun ’balogo hwelak a’ge yu, modok opsogo wik-wok til laga lomup o. 14Wene ologun ’balogo ho’buk ’balogwi a’ge yu, his henematek nak henebaget ogup no yo. 15A’geat de, o yogodak odoktu egep a’ge at nenaik Allah il pam edik welagai a’ge his yu ’berlegat emin, aphwami o yogodak yu pam henemin welagai erlak a’ge pobuk dagema a’ge ebano emin, ’berlegat henebaget tu o,” oluk, mo’gulentesi.
Allah opsogo motluk lagai erlak ano pam tagonobo a’ge mo’gulentesi wene
16Mo’gulentesirik, wene mesik emin mo’gulentasulat. “His o Mesir ebano en ’gesogo welegep no oluk emin, di aphwami yu aphwami eba welagai a’ge nak oruakhwe, no’gosogo ’gela’ge wegep a’ge, ebano emin ’berlegat his nagat henalugat ani o. 17Asogo til wagalat, is ondogwi enasua ogut hele’gik onogorlok a’ge emin, Allah erliktogwi a’ge ebalema asua e a’ge pam, helep a’ge pam, emas perak a’ge pam, hele’gik a’ge ebano emin, henil hegebat ani o. 18#Ibr. 12:15Asogoatma re, is ene’gerlakma yema ap emin, hwami emin, heneiyagai emin, his hena’gul a’ge emin, is enede en o yogodak ya pam at henaik Allah hono’borlma ukpoluk, di aphwami yu aphwami onodogwi asua Allah ebalema erliktogumu re, enemin til lo modok mia o. Asogo tu ano re, e e’gela erle a’ge no’gwi holuk waragai ano a’ge yogo a’ge ’gela’ge atma re, his en tu mia o.
19Ap mesik en wene ho’buk ’balogwi a’ge yu esa’go hwelise lemarik, Allah ede aganhan an nebamat welema opoluk an nede ’buk otluk tu a’ge eberiso a’ge ano motluk nak lasu legi a’geat de, op nagat at welema o, oso holuk at en ede epasu ai pam his wiak tugwi erlak a’ge emin, is wiak togwi a’ge emin, ’berlegat erlagapsogo honobouwa o, 20ye, ap asogo tua a’ge ano re, at Allah en o wiak erlagapsogo pouwa modok erlagat o. A’geat de, at Allah en ap ai nebit o, oluk, olot het en odouk magale ’gela’ge at ebam pasu lemarik hweim obo wene buku yu pam odo pelal wogo oruak a’ge ebano ’berlegat at ebam pasu lemarik onuk o ’gwiang pam yema en erlagapsogo pouwa o. 21At Allah en wene ologun arat daksogo ’balogo mo’gulnentasulat, hweim onobo wene ano tugulom wene Buku yu pam odo ’belak a’ge ebano hegitsogo ap ai ena’gul onuk Israel a’ge ’berlegat ene’gerlakma en pulogo poluk wiagap pouwa o.
22Asogo takpasuam e, his hene’balak pobuk dagetil lagai a’ge emin, aphwami ’bok a’ge o walekma en hene’bek wagai a’ge ebano a’ge logon emin, Allah en o yu wiagapsogo pasulat, e’gin-pe’gin enebam pasulat, tago a’ge ebano enil hogu lema ani o. 23#Kej. 19:24,25Ye, at Allah olot het odouk magale ’gela’ge inagalat, o Sodom emin, Gomora emin, Adma emin, Zeboim emin, ’gwiang abat lagak-’bagaksogo pasulat, erlagapsogo pesi ano ’gela’ge his hono’gwiang yu ’berlegat odouk en wollo’gen dagalogo e’gerlal nak ’gaboktak pasulat, tago ai ’gela’ge, pasulat, odouk en asogoat takpasulat, tegeimu oruakma re, yabuk wokho yorogulat, yogo a’ge e’gen baktagalat, di a’ge yu a’ge omuat libagalat, tu erlakma enat welema o.
24Asogo tak oruakma re, di aphwami yu aphwami ’berlek at en ogulat e, edip no pam at Allah olot het odouk magale ’gela’ge lobuksogo inagalat, ’gwiang yu wiagapsogo pesimu welago epegep? ogwi holuk, 25at wene o’go mo’gulontogulat, erlak o. Is aphwami yu, ene’balak enaik at Allah o Mesir en wogonoboluk liplau wagarik, emin wene ologun ’balogo polik pesi a’ge ano sagalogo pogwi en, takpesi o. 26At Allah en e his, asogo tip o, oluk eiyerak po erlakhwe, asua is eneperlak a’ge Allah erliktogwi a’ge ebalema erliktugulat, tugu legesema re, 27-28At Allah olot het odouk magale ’gela’ge inagarik hweim onobo a’ge wene hwalogo buku yu pam odo ’belak oruak a’ge ano is aphwami ai enebam pasulat, ono’gwiang yu pam en lisogo aphwami mu ono’gwiang pam perak enebesimu, yogodak enebe erlak ai at o, oluk, mo’gulontoguema o.
29Di wene yu wene ado pema re, at Allah ogola hisogo edemu welago a’geat de, di wene yu wene selakma mo’gulnentasu a’ge ebano nage e, modok-modok togu lemagoluk, mo’gulnentasumu re, tugulom a’ge wene pelal wogo a’ge yu nis emin, neneiyagai emin, modok pobirak poluk tugu lomok o,” oluk, mo’gulentesi.
Currently Selected:
Ulangan 29: Wul
Highlight
Copy
Compare
Share
Want to have your highlights saved across all your devices? Sign up or sign in
