Ulangan 28
28
Enesa’go hwelak Poluk opsogo togwi holuk enede aganhan enebam pogulom wene
1 #
Ula. 11:13-17
Mo’gulentesirik, mesik mo’gulentasulat,
“His enat henaik Allah iak opsogoat hologulat, disogo tip, asogo tip oluk, wene an yogodak mo’gulhentasu legi a’ge yu opsogo wogu loroguptik, til lagalat, togwi holuk, at henaik Allah en di aphwami yu aphwami o ’gwiangma yema welagai a’ge ebano ’berlegat oruakhweat de, his honomu nagat logo henebaik ani o. 2His en e, at henaik Allah iak mo’gulhentasu a’ge ano opsogoat hwelak poluk togwi holuk at ede aganhan henebam pasulat, obap honobouwa a’ge re, yuat o.
3Honowi kota ma oruakhwe emin, heniabuk yogoma oruakhwe emin, obapsogo henebasulat.
4Honugwami enemalik dak onobogumu obapsogo enebasulat, di a’ge yu a’ge owi yorogumu eba obapsogo pasulat, honuam lembu sapi emin, kambing domba emin emalik doruak oluk, obapsogo pasulat.
5E’gen ’belak a’ge yagarogwi a’ge honosum ano obap pasulat, so’boru werarogumu honowi ule’genma obapsogo pasulat.
6Ye, his libagalat, ’guagalat, tugukhwe, nede aganhan henebam pasulat, togolik o.
7Henselei a’ge en wathonobuok oluk ebela mesigarap poluk, wema a’geat de, henil oruakhwe at Allah en Sebelak enebasu holuk, his heneragam en ebela babut 7 pam pou wama enematek lo’bok hweiye ’bogolil louwak oluk takpasulat.
8Hono’gwiang wokhentasumu ebano oruakhwe, at henaik Allah ede aganhan henebam pasulat, di a’ge yu a’ge togumu eba emin, e’gen ’balogo pogumu ebano emin, obapsogo pasulat,
9At henaik Allah en e, wene disogo tip, asogo tip, oluk, mo’gulhentasu a’ge ai, opsogo ’gi’gennesogo tenak welat, tuagoluk mo’gulhentasu a’ge ano motluk lagai holuk, at Allah en wene arat daksogo ho’buk ’balogo mo’gulhentesi ano ’gela’geat at eiyagai omu degelak wolorogup en takpasulat, tik o.
10Asogo takpasu holuk di aphwami yu aphwami o ’gwiang pam yema welagai a’ge ’berlegat en is aphwami yu at Allah eiyagaiat hege o, oluk, onogorloksogo enil yet-hontogu lema ani o. 11At Allah en hene’balak ’gwiang wokhentaik o,” oluk, wene ologun ’balogo mo’gulentasumu ebano wokhontouwama eba oruakhwe, honugwami malik dak onobogumu obapsogo pasulat, honuam doruak oluk obapsogo pasulat, di a’ge owi yu a’ge owi yarogupmu ebano ebam e’gen e’gen harlet bi-’besing lik-luksogo takpasulat, asogo tagalat, a’bigat modok ebam louksogo wokhentasulik ani o, ningtak poluk
12Di a’ge yu a’ge til lagaihwe obapsogo henebasulat, di a’ge yu a’ge owi yorogup a’ge e’gen peruak oluk, at Allah ene ebam en peialogo woknentasumu ’bogorl pam en ’goduk husogo moru ’belakpou wagalat tagoam hena’ge a’bigat, di aphwami yu aphwami ena’ge enebam ’gonu, mo’gulentagup erlak ani o. A’geat de, is en ’gonu mo’gulhentau wagai holuk nak e, wogontogu lomup o. 13At henaik Allah en disogo tip, asogo tip, oluk wene ’belak a’ge an en yogodak mo’gulhentasu legi a’ge yu opsogo wik-wok togwi holuk e, at Allah en his we, eragam ogodima ’gela’ge erlak, modok lekho o’borl pam ereiya ’gela’geat logo henebasulat e, sebelogo aphwami eneragam a’ge ’gela’ge erlak, lekho eria pamat onuelagat takpasulat, tik o. 14Asogo takhenebaikmu re, disogo tip, asogo tip, oluk wene werak an yogodak mo’gulhentasu legi a’ge yu sagalogo poluk, Allah erliktogwi a’ge ebalema, dogwi asua erliktil lagalat, honolukhwe legeik po ’belakpo tu modok mia o,” oluk, mo’gulentesi.
Enesa’go hwelak poluk togwi erlak holuk, hweim onobo wene
15Mo’gulentesirik, mesik mo’gulentasulat, asogo a’geat de, his en at henaik Allah iak hwelak poluk opsogo tu erlakma en ukpogulat, wene disogo tip, asogo tip, oluk wene werak ano emin, wene le’gel lak a’ge paget emin, motluk opsogo yogodak an mo’gulhentasu legi a’ge yu, motluk lagai erlak welat, togwi holuk, arat hweim henebesi a’ge henebam pou wom a’ge ano yuat o.
16Honowi kotama oruakhwe emin, heniabuk yogoma oruakhwe emin, hweim henebasulat.
17E’gen ’belak a’ge yagarogwi a’ge honosum ano eminat hweim pasulat, So’boru werarogumu honowi ule’genma hweim pasulat.
18Honugwami enemalik dak onobogumu hweim pasulat, di a’ge yu a’ge owi yorogwi a’ge pam hweim pasulat, honuam lembu sapi emin, kambing domba emin, enemalik wiak a’ge dak emak oluk, hweim pasulat.
19Ye, his libagai ’gu agai, tugukhwe, hweimat yaro’gwik weleripogoluk takhenebasulat, tagalik o.
20His en at henaik Allah ukpoluk wiak togwi holuk e, aphwami en hweim honobogulat, henede ing-ding takhonobogulat, di a’ge yu a’ge togwi a’ge ebano demat oluk opsogo balu erlakma en we heniak nak eli orluk ogu lemagoluk, takpasulat, takpou wagoluk, at Allah en perakpou wagoam takhenebil wagokhwe, o agauwa mesik erligeat waretil lagalat, hena’guluak erlak aga lorogup ani o. 21O his eiye otluk wolomma ebano laguptik eba oruakma, at Allah en di ou yu ou henebam perakpouma ano pam waretil lagaihwe hono’gwiang ai pam a’ge aphwami ’berlegat erlagat ema ani o. 22At Allah en ou obotut e’gin-pe’gin a’ge perakpou wagoam henebam agalat, henebe edip ’belakpasulat, henebe pam aganhan a’bigat takhenebasulat, sogwei-sogwei takhenebasulat, henagap pam pit-pat takhenebasulat, mo orlouk enaganhan puttak pasulat, So’boru obouk lok a’ge henebam agalat, hena’ge yogo a’ge e’gela pam o hebi en, e nirl-narl takpasulat, sogwei en pun-pan takpasulat, asogo tagokhwe henebeat erlak aga lorogup ani o.
23-24At Allah en ’bogorl his hena’gul hegit welago a’ge ano helep tembaga ’gela’ge takpasulat, hono’gwiang emas perak ’gela’ge ’bugap pasulat, ye, moru ’belakpou wagoma no oluk ul emin, sip-sip nak ’belabil wagokhwe, henebeat erlak agalat, togu lorogup ani o.
25His en heneselei a’ge wat onobuok oluk ebela mesigarap poluk lagaimu, at Allah en sebelak henebasu holuk heneselei a’ge en wathenebil wagaihwe his ebela babut 7 pam henematek lo’bok ’bogolil lagup ani o. ’Bogolil lagaihwe is di aphwami yu aphwami eneragam onobogumu o ’gwiangma yema welagai a’ge enebe ’berlegat en enil yethontogu lemarik yu tagenebesimu ’bogologwi yema yet o, oluk, honobok ’balogu lema ani o, 26ye, henebe werak ’gaboktak ai, di tue yu tue darak no’gwi a’ge emin, wam seiye parema a’ge emin, is en a’ge onso’boru at emarik, lebilogo no’gwimu re, ap mesik en silogo lebikpouwa erlagat o.
27At Allah en aphwami Mesir a’ge enagap pit-pit a’ge tagenebesi ano a’ge takhenebasulat, yebil aik ’belak henebasulat, henagap pam yebil hwena’go ano en henesei horlu takhenebasulat, henagap petne hene’gik ogop en ’gwakho mep soluk takpogu lemagoluk takpasulat, asogo takpesimu re, erlak om pukmu en otok modok modogat welema o. 28At Allah en henede ’belak henebasulat, henil hopnik henebasulat, henede nelak pasulat, tuama re, 29Aphwami enil hepnik a’ge en o hiktak o’gwe dapak lagai ai ’gela’ge, his henil obat a’geat de, o erlige hweat de, dapak no’gu lorogup ani o. His mesik tak pagathorlouwok oluk togup a’geat de, ebe demat selakma ’balogo no’gwi erlakma en e, o loruk hupmu mi-miarak honobogulat, hene’gikmu a’ge delogo horlogulat, tugukhwe, ap mesik en edeaphonoboluk lethentasu lema modok erlagat ani o.
30His en e, honugwami wogonobuok oluk, aiksogo pagathorlogukhwe at de, ap mu a’ge mesik en e’birek nogogulat, honowi ’get ut horlogu legep a’ge at de, ebano nogo nogou erlakma en ukpogulat, heniabukmu anggur owi yorogu legep a’ge at de, e’gen ’bal horlo erlakma en ukpogulat, 31Henil pam at aphwami en honuam lembu worogularat de, ’bal honto erlakma en ukhonobogulat, honuam Keledai tenak oruakhweat de, hene’gikmu a’ge daluk horloluk lagalat e, wokhentauwom erlakma en ukhonobogulat, honuam kambing domba ebano heneselei a’ge wogontogukhwe at de, ap mesik en ogo eli u erlakma en ukhonobogulat, asogo takhonobogu hweat de asogoat, takhonobogu lemagoluktak paik o.
32Heneiyagai Logomalik emin, hwelani emin, mikho aphwami ena’gul onuk mu a’ge wogontogwiam wogonoboluk lagai a’ge ebano, wagaimu yerontul a, erlak a, oluk, henede hwedik welat, loruk hupmu henil ebela ’ba’butmu wolorogup a’geat de, wagai erlak holuk e, his en e, mesik tu a’ge miayat hagup ani o. 33His yabuk set hoposogo hono’gwiang pam di a’ge yu a’ge owi yorogu legep a’ge ebano aphwami heneperlak a’ge en e’gen ’balogo no’gulat, e’gin henebam pogukhweat de, sebelagat welat, waretil laga lorogup ani o. 34Di a’ge yu a’ge takhenebasu a’ge ebano henil hogu loroguptik, his en tu a’ge mia ago holuk e, we, henil dim onobogulat, weat wolorogup ani o. 35At Allah en e, ou ’bot obotut wiak a’ge ano honoyuk pam en ’bekhit hena’gul hwerli erle takhonobouwa ani o.
36At Allah ene his emin honue ’gain edikpagup a’ge emin, is aphwami ena’gul onuk mu a’ge hene’balak enemin en heneperlak a’ge ebano a’ge oruakma re, wokhonoboluk henebei lasu holuk eba welat, Allah erliktogwi a’ge ebalema e pam emin, helep pam emin, henasua ogut heli’gogo edikpoluk onuk logo pil lagalat, 37is di aphwami yu aphwami welagaimu wokhonoboluk henebei laikmu ebano en enil hontogu lemarik, disogo tagenebil noso yu yet o, oluk, mimiasogo takhonobogulat, eida tak honobogulema ani o.
38Heniabukmu di a’ge yu a’ge a’bigat yetil lagup a’geat de, ho’bukhak en ’berlegat nil louwama re, we, wei nagat ’balhorlogulat, 39E, anggur owi a’bigat yogo poluk hogol egesogu legep a’ge at de, ina’ge en nouwama re, e’gen ’balogo no’gwi a, at e, a’bosu na’gogo no’gwi a, asogo tu erlakma enat welat, 40e zaitun owi hono’gwiangma a’bigat yogo oruak a’geat de, e’gen egeik a’ge ebano omuat lol-lol ’buama re, his en e, a’bosu ’berelogo nang horlo erlakma en welat, 41heneiyagai ap logomalik emin, hwelani emin, a’bigat dak onobogu legep a’geat de, aphwami pema mu a’ge en di daluk horloluk laga lemama re, his henemalik henemin erlagat welat, 42his henagan yogoma emin, hena’ge di a’ge yu a’ge owi yogoma emin, ’borlue nak e’gerlik poluk oruakma hogulat, tugu lorogup ani o.
43Is aphwami ’bok a’ge henemin oruak a’ge ebano en adiane-adiane lagaihwe, his eneragam sebel otluk wogulat, 44is ene’gik oruagatma re, his en e, pobuk ebalema pouwok o, oluk, ’gonu mo’gulentagupmu wokhontouwa a’geat de, is en his ’gonu mo’gulhentau wagai holuk nak e, hene’gikmu erlagatma re, wogonto a’ge miayat agalat, is eneragam a’ge agalat, togu lomup o.
45His en at henaik Allah iak hwelak poluk opsogo tu erlakma en ukpogulat, disogo tip, asogo tip, oluk wene werak a’ge ano emin, wene le’gelak a’ge ano emin, at en mo’gulhentesi a’ge ano pobirak poluk motluk lo erlakma en ukpogulat, togwi ano pam hweim nenebesi wene yu ano mukhonoboluk henebam aga lemarik takhenebasulat tisokhwe, henebeat erlagapsogo henebasu leik ani o.
46Asogo ’berlegat takhenebasu lema ano re, his emin, heneiyagai hene’balak dagetil lagai a’ge emin, his en nonogorlok a’ge tu puk a’ge elalin tago yu, at nenaik Allah en nenaluk emagoluk taknenebasu hege o, oluk, modok honogola eberogu lomup o. 47At henaik Allah en di a’ge yu a’ge ebam louksogo wokhentasuam op nak welat, Nenaik Allah en taknenebasumu re, wa, oluk, honogola henagai en eragam welat, at ebaget tugulom nenebit o, ogwi holuk e, 48at en henselei a’ge perak onobou wago a’ge ebano eneragam a’geat otluk, so’boru nele, ik nele, honosum ’buktak erlak, hena’ge di a’ge yu a’ge modogat erlak we, henage ’golomat welat, enebaget togu lorogup ani o. E e’gin a’ge sapi o’gorlop pam pogwi ai ’gela’ge, at Allah en Besi e’gin ’gela’ge a’ge henebam e’gin louk takhenebasuam e’gin a’ge louktak welat, henebeat erlak aga lorogup ani o,
49tue watni wagalat tue wei a’ge mukho perak enebasu ai ’gela’ge aphwami o ’gwiang edip-edip walegat welagai a’ge eniak his heneperlak a’ge ebano en henebaget perakpoumagoluk, Allah en takpasu holuk waga lemarik, 50ap enebe lok a’ge onogorlogapsogo hau werak onobogulat, heneiyagai enedeap onobogulat, tu erlakma en onorogole haro takpoluk, 51Honuam emin, di a’ge yu a’ge yogo a’ge emin, is en erlagapsogo nil laga lema ani o. Gandum emin, e anggur a’bosu ’gerat ne’gak a’ge emin, zaitun a’bosu ’get a’ge ne’gak emin, lembu, sapi, kambing, domba, is enemalik emin, his en no a’ge henebaget mesik ukpo erlakma en ’berlegat a’gul onuk erlagapsogo nil lagaihwe, his no pukmu en welat, henebeat erlak etil lagalat, 52ye, henaik Allah en di owi yu owi ebale wokhentasumu ebano honowi wei o’gwe lok o’gwe o kota-kota ’berlegat leget tenak na a’ge helep pam edip ’belebak poluk siatle yarap poluk annisogo pak wogo poluk, henede ai pam nak he’berik welegep a’ge ebano ’berlegat tenak poluk welemagoluk tugulat, ’boluksogo togolik pogulat, togu lorogup ani o.
53Hwedik asogo nak takpoluk henebam pou wagokhwe henebam e’gin-pe’ginsogo takhenebasukhwe welat, honoso’boru no a’ge erlak lail lasu holuk at henaik Allah en wokhentasu a’ge logomalik hwelani dak onobogu lorogup a’ge ebano wusogo no’gu lorogup ani o. 54-55Heneselei a’ge en his honowi kota-kota, eba ’berlegat pak werik a’ge dung tu agai modok welat nak tugulat, di a’ge yu a’ge mesik his no a’ge henebaget ukpo erlakma en is ’berlek enat no’gwi ano pam e’gin-pe’ginsogo welat, so’boru nele en ap mesik ede modok erlebetak welat, aphwami edeap enebasu ano en emalik modok wusogo nasulat, at arilak enemin, at uge ede hwedik modok a’ge emin, eiyagai enelaluk welagai a’ge ebano emin, wogonto erlakma en nalong en nomuat ne’gi o, opo a’ge at de, emalik ’belak a’ge ’gorik ebano ado logon is so’buronto erlakma en omuat nasulat, 56-57#2Raj. 6:28,29; Rat. 4:10ye, ano o agauwa ai erlige, hwe mesik ede modok erlebetak a’ge aphwami edeap enebiselat e’gikmu oruak a’geatma re, ebela togolik lasu erlak a’ge ano so’boru nele en emalik ’gerat deriselat, a’buk emin, emalik ebe emin, hisakho nasulat, at ogun ede hwedik a’ge emin, emalik logomalik hwelani pema emin, ’balu onto erlakma en nalong en nomuat ne’gi o, opoluk, ede wathorlo ’gela’ge emategat nasulat, togu lema ani o.
58Ye, his en tugulom a’ge wene werak a’ge tuesi’ga pam pelal wogo oruak a’ge yu ’berlegat henede opsogo pobirak poluk motluk lagalat, at henaik Allah onuk modok logo a’ge aphwami en lok logoat o, oluk, opogwi a’ge yu, onogorlok hogulat, tu erlakma enat, wolorogup holuk, 59his emin, heneiyagai hene’balak dak enebil laga lema a’ge emin, at Allah en tu puk a’ge henebam pasulat, e’gin-pe’gin, mu ebelesogo henebam pasukhwe modok o momuat mesik lasulat, ou modok onogorlok oruak a’ge mesik tagenebasukhwe modok o etlebaat lai lasulat, taga lema ani o. 60Asogo tagalat, ou obotut mu a’ge o Mesir en tagenebasukhwe his honogorlok hegep a’ge anoat, takhenebasukhwe henebam erlak ago erlakma en e’gerlik modogat welemagoluk perakpou wagalat, 61ye, tugulom wene buku yu pam ado ’belak erlak a’ge di ou yu ou mu a’ge pam wathenebiselat, e’gin henebam pasulat, takhenebil wagokhweat, henebe erlak aga lorogup ani o. 62His naduk e henebe a’bik hwesagal ’bogorl pam welago ai ’gela’geat welegep a’geat de, at henaik Allah iak henesa’go opsogo hwelak poluk tu erlakma en wolorogup holuk e, ap henebe we, ’biren nagat wolorogup ani o. 63At Allah en his op nak til lagalat, henebe a’bik modok wigal etil lagalat, togup en e, ede pamat takhenebesi ano hegitsogoat his o ’gwilaguptik eiye otluk wolomma eba en lisogo lebik henebasulat, henebe modok erlagap henebasulat, takhonobouwa ano re, ede pamat takhonobouwa ani o.
64At Allah en his o ’gwiang edipmu en ologunmu di aphwami yu aphwami welagai a’ge ene’gerlak o’gwe eba’bulogo perak enebaikmu o eba welat, his emin, hene’balak emin, asua heneperlak a’ge ogut e pam a, helep pam a, hele’gik poluk Allah ebalema edikpogu loroguptik, erliktogu lorogup ani o. 65His di aphwami yu aphwami ene’gerlakma eba welat, henede we, lielak welat, honuak set hwalogo o heratogulat, togu lorogup erlak o. A’geat de, henede perik nak welat, henil ’gwelap ho a’ge e’gin takhenebasulat, henede wathwerlil lagalat, togu lorogup ene at Allah en takhonobouwa ani o. 66Asogo takhenebasu holuk, henebe wathonobogumu no, oluk, o erlige en hup en honogorlok en henede perik no’gulat, henagap erle’gi takma en henagap alip-alip no’gulat, asogo tugulat, 67takhenebil lagaihwe, henil hogu loroguptik honogorlok nak honogola ’betesogo ’gwi lasulat, o hubet ago holuk, o perleneat hup emak logwe, eige, oluk, ogulat, ye, o hup ago holuk e, o perlenesogo dakha uak logwe, ogulat, tugu lorogup ani o. 68An en mo’gulhentasulat, honoyuk edipmu togolik o Mesir lo mia o, oluk, mo’gulhentegis a’ge ano oruakhwe, at Allah ene ik so pam o Mesir wokhonoboluk lasu holuk, his en e, heneselei a’ge mo’gulontogulat e, nis ap emin, hwami emin, heneragam a’ge ’gela’ge wolomok oluk nenebe o’go ’bal nenebit o, oluk, mo’gulentagup a’geat de, is en ogo re, o’go ’bal honobua modok erlagat o, oluk, at Musa en aphwami Israel a’ge mo’gulentesi.
Currently Selected:
Ulangan 28: Wul
Highlight
Copy
Compare
Share
Want to have your highlights saved across all your devices? Sign up or sign in
