Ulangan 27
27
“Allah en wene werak a’ge ano helep pam ’balu o,” oluk, mo’gulentesi wene
1Pobuk, Musa emin, Ap Israel onuelak ebano emin, is en aphwami Israel a’ge mo’gulontogulat e,
“Disogo tip, asogo tip, oluk, wene ’berlegat nis yogodak mo’gulhontogu lege a’ge yu his en modok tenakho welemis o. 2#Yos. 8:30-32Tenak welat, ik Yordan ’balogo abel etle akhit liplai lotluk, at henaik Allah en, hono’gwiang wokhentesimu ebano ’gwi laguptik helep lok a’ge nak wokho uak wusogo ’gaboktak poluk, 3at henaiklak enaik Allah en wene mo’gulhentesi a’ge ano hegitsogo, hono’gwiang me’gebil a’bosu emin, ’gin a’bosu emin, ik elaruk ’gela’ge, houwalogo libagoma at henaik Allah en wokhentasumu ebano ’gwi lagup ene ik ano ’balogo liboroguptik holuk e, tugulom wene, werak a’ge yu ’berlegat helep ai pam odo ’balogo pomup o.
4Ik Yordan arat ’balogo etle akhit liplai lotluk helep mesik-mesik wokho uak werik po a’ge an yogodak mo’gulhentasu legi a’ge yu, dom Ebal pam uak wusogo orluktak poluk pogu loroguptik, 5#Kel. 20:25at henaik Allah ebaget wusogo odouk narlogulomma, ebale hele’gik pogulat, Besi wa’gun pam helep ’gagalogo hele’gu mia o. 6A’geat de, at e helep modok-modok uak wusogo lagabak a’ge pam nak at henaik Allah ebaget wusogo odouk narlogulomma ebale heli’gogo poluk e, at henaik Allah ebaget wusogo wogoum a’ge emin, 7Allah emin la’bolik welemagoluk at ebaget po a’ge emin, odouk narlogulat ebam poluk henede aganhan pam at henaik Allah il pam eria enat honso’boru no’gu lomup o. 8Ye, helep uak wusogo oruak a’ge ai pam en, tugulom a’ge wene werak pelal wogo a’ge yu ’berleksogo telakmasogoat pelal wokho pagup ani o,” oluk, mo’gulentegisa.
9Mo’gulentigisarik, at Musa emin, is ap Allah eiye Lewi a’ge emin, is en aphwami Israel a’ge ’berlegat mo’gulontogulat, Nue nari Israel a’ge yu logwe! Heniak erlak henesa’go opsogo hologu lemis o. O agauwa yogodak yu pamat at henaik Allah eiyagaiat egeptikmu re, 10his en e, at henaik Allah iak aiat henesa’go opsogo hologulat, disogo tip, asogo tip oluk, wene werak a’ge emin, wene le’gelak a’ge emin, o yogodak yu pam nis en mo’gulhontogu lege a’ge yu, modok hegitsogo nagat til lagalat, tugu lomup o,” oluk, mo’gulentegisa.
Enesa’go hwelak poluk opsogo togwi erlak holuk, hweim onobo wene
11Mo’gulentigisarik, o agauwa ai erlige Musa en wene mesik emin lekelogo aphwami Israel a’ge mo’gulentasulat e,
12 #
Ula. 11:29; Yos. 8:33-35 “His ik Yordan arat ’balogo liplai laguptik ena’gul onuk Simeon, Lewi, Yehuda, Isakhar, Yusuf, Benyamin, is ’berlegat en aphwami yu enede aganhan enebam pouwagoluk, dom Gerizim pam edik welat, 13ye, ena’gul onuk Ruben, Gad, Asyer, Zebulon, Dan, Naftali, is en aphwami hweim onobou wak oluk, dom Ebal pam edik welat, asogo tugukhwe, 14ap Lewi a’ge en eniak lok pam aphwami Israel a’ge ’berlegat mo’gulontogulat,
15 #
Kel. 20:4; 34:17; Ima. 19:4; 26:1; Ula. 4:15-18; 5:8 At Allah erliktogwi a’ge ebalema dogwi asua ogut at ebit epasu a’ge ano a’ge is aphwami ene’gik a’bosu pam helep a’ge a, e a’ge a, ebano a’ge pam hele’gik poluk pogulat, besi a’ge pam ebelogo pogulat, takpoluk hisakho erliktogwi holuk e, hweim yaro’gwik a’geat welemak o, ogwi holuk, is aphwami ’berlegat en demat o, ogulat.
16 #
Kel. 20:12; Ula. 5:16 Ap enialak-enaiklak onogorloksogo wolom erlakma en mi-miarak onoboluk welagai a’ge ai enebam hweim yaro’gwik a’geat welemak o, oluk, ogwi holuk, is aphwami ’berlegat en demat o, ogulat.
17 #
Ula. 19:14
Ap mesik are o’gwiang siok oruakhweat de di dagan momu pasu holuk at hweim yaro’gwik a’geat welemak o, ogwi holuk, is aphwami enebe ’berlegat en demat o, ogulat.
18 #
Ima. 19:14
Is at enil wiak a’ge ebela eneperlagapsogo pogwi a’ge ebano is ap ai hweimat yaro’gwik welemak o, ogwi holuk, is aphwami enebe ’berlegat en demat o, ogulat.
19 #
Kel. 22:21; 23:9; Ima. 19:33,34; Ula. 24:17,18 Is aphwami ’bok a’ge emin, malik se’bin a’ge emin, hwami tugwe a’ge emin, onowene opsogo hwalogo pogwi erlak a’ge ai hweimat yaro’gwik welemak o, ogwi holuk e, is aphwami ’berlegat en demat o, ogulat.
20 #
Ima. 18:8; 20:11; Ula. 22:30 Ap mesik aik il Salogo poluk aik ugwe emin nogogwi holuk, ap ai hweimat yaro’gwik welemak o, ogwi holuk, is aphwami ’berlegat en demat o, ogulat.
21 #
Kel. 22:19; Ima. 18:23; 20:15 Ap mesik en mene wam tenentasulat, tago holuk e, ap ai hweimat yaro’gwik welemak o, ogwi holuk e, is aphwami ’berlegat en demat o, ogulat.
22 #
Ima. 18:9; 20:17 Ap mesik en enaik mesigat, enialak mu muat a’geat de, hwele ai erei a’ge at de e’birek nogoso holuk e, hweimat yaro’gwik welemak o, ogwi holuk e, is aphwami ’berlegat en demat o, ogulat.
23 #
Ima. 18:17; 20:14 Ap mesik en hwe ugwe ia a’geat de emin nogoso holuk, hweimat yaro’gwik welemak o, ogwi holuk e, is aphwami ’berlegat en demat o, ogulat,
24Ap mesik en are hisakho wusogo pasu holuk, hweimat yaro’gwik welemak o, ogwi holuk e, is aphwami ’berlegat en demat o, ogulat,
25Ap mesik wiak tu erlakhweat de, ap mesik mu a’ge en woruak oluk uang o’go ’balogo nasu holuk e, hweimat yaro’gwik welemak o, ogwi holuk e, is aphwami enebe ’berlegat en demat o, ogwi o.
26 #
Gal. 3:10
Ap mesik tugulom a’ge wene ’belak a’ge yu opsogo tenakho welat opsogo tago erlak holuk e, at ai hweimat yaro’gwik welemak o, ogwi holuk, Is aphwami ’berlegat en demat o, ogulat, tugu lemak o,”
oluk, mo’gulentesi.
Currently Selected:
Ulangan 27: Wul
Highlight
Copy
Compare
Share
Want to have your highlights saved across all your devices? Sign up or sign in
