Ulangan 26
26
Di a’ge yu a’ge yogo poluk, ebe naduk-naduk dorogulat, daganogulat, tu a’ge Allah paget pogu lemagoluk mo’gulentesi wene
1At Musa en asogo mo’gulentesirik, wene mesik disogo mo’gulentesi,
“His henebe o Nenaik ’gain Onuk Logo a’ge Allah en wokhentesimu eba arat loluk welat e, disogo togu lomup. 2#Kel. 23:19So’boru, di a’ge yu a’ge, owi yorogup a’ge ’berlegat ebe naduk dorogulat, e’gen daganogulat, togup a’ge ai, mul sum pam yagasogo poluk e, o Nenaik ’gain Onuk Logo a’ge Allah onuk logo pogulomma u’gwarek en pulogo pagathorlouwema eba woluk laga lomup o. 3Asogo woluk lagupmu re, henebe lo’bok en ap Allah eiye a’ge o ai erlige yabuk Allah paget togumu ene’bek loluk e, disogo mo’gulontogu lomup o,
Nis nenebe nenaik Onuk Logo a’ge Allah en o nis woknontouwa a’ge paget, is ap nis nene’balak en ho’buk ’balogo wene weragenebesimu ebano arat ’gu egirik oluk, at Allah mo’guleselegi o, oluk mo’gulentasu lomup o,” oluk mo’gulentesi.
4Asogo mo’gulentasuam e, is ap Allah eiye a’ge en e, his en Allah paget pagup a’ge mul sum yagarak a’ge ai, his hene’gikmu wik-wok e, wam di a’ge yu a’ge wusogo Nenaik ’gain Onuk Logo a’ge Allah narlogulomma eragam ebayat pogu lemak o. 5Asogo pogwiam e, his henebe lo’bok en e, Nenaik ’gain Onuk Logo a’ge Allah il pam disogo mo’gulogulom,
“Allah ’gain Honuk Logo a’ge naik. An ne’ba ebe o Aram a’ge di owi yu owi da ’gwil ya ’gwil, o da’goluk nese lagarik, o Mesir opsogo welema oluk eiyagai wogonoboluk laga ai o. Asogo laga ai, enebe we, weiyat legesa a’geat de, pobuk ena’gul onuk lok agalat, enanni a’bik agalat, enebe a’bik aga ai o. 6Asogo egesarikmu, pobuk aphwami Mesir a’ge en nis wiak modok taknonobogulat, nenebe eneragam a’ge ’gela’ge taknonoboluk, yabuk modok a’bik togu lemagoluk eniak ning-nangsogo modok mo’gulnontogu legesa ai o. 7Asogo taknonobogwiam, nene’balak enaik Honuk Logo a’ge en delnenebinogoluk neniak loksogo yo’go hebege ai o. Asogo mo’gulheigema, hat en neniak hesa’go hweligentik, di obotut yu obotut taknenebasuam hil nentasulat, set wik-wiaksogo togumu nentasulat, onogola en mi-miarak nonobogulat, sebelogo nonobuogoluk togukhwe nentasulat, tigen ai o.
8Asogo togukhwe nentigentik, hanni modok a’bik ai pam o Mesir en delogo woknonoboluk liplau wegen ai o. Asogo liplau wegentik, aphwami pobi tuagoluk tu puk a’ge tagalat, elalin a’ge tagalat, nenselei a’ge onogorlok a’bik emagoluk tagalat, til wegen ai o. 9Asogo til waga legentik e, o yema woknonoboluk waga legentik, ’gwiang moli op a’ge di a’ge yu a’ge modok a’bikmu yema woknentigen ai o.
10Ai en e, hat ’gain Honuk Logo a’ge naik. ’Gwiang hat en woknentigen a’ge ano pam di a’ge yu a’ge e’gen naduk-naduk ’baliselat deriselat, tegistik woluk wegi a’ge yema o, naik, oluk ogu lomup o.
Asogo oluk en, mul sum yagarak a’ge ano Nenaik ’gain Onuk Logo a’ge il pam poluk e, at erliktogu lomup o. 11Erliktogulat e, Nenaik ’gain Onuk Logo a’ge en di a’ge yu a’ge his henebe emin, heneiyagai emin, no’gu lemagoluk wokhentasu lema a’ge ai paget, at hau worogu lomup o. Asogo togwiam aphwami Lewi a’ge emin, ap ’bok a’ge his hene’gerlak o’gwe welagai a’ge emin, mo’gulontogulat,
Nenemin en disogo togu lomok, oluk enede ’gagalogu lomup o.
12 #
Ula. 14:28,29 Tahun his wenarogu legep a’ge ano wenarogulat, ’biren takpoluk, mesik tahun henaganak a’ge ai pam, di a’ge yu a’ge e’gen dagogulat, dorogulat togup a’ge ano hene’gik wenakho lok akhit 9 pam his no a’ge pagathorlogulat, mesigat nak 10 a’ge ai Nenaik ’gain Onuk Logo a’ge paget poluk e, ap Allah eiye a’ge ena’gul onuk Lewi a’ge emin, ap ’bok a’ge emin, malik se’bin a’ge emin, hwami sugwe a’ge emin, wogontogu lomup o. Asogo wogontogu lorogup holuk, his honowi kota wolorogup o’gwe lo’bok eba is ai en,
Nonso’boru ai a’ge nenagai o, oluk opouwa a’ge ano, elirat horloluk no’gulema ani o. Asogo arat toguptik holuk e,
13henebe lo’bok en Nenaik ’gain Onuk Logo a’ge disogo mo’gulogu lomup o,
Nenaik ’gain Honuk Logo a’ge en,
Disogo togu lomup, asogo togu lomup, oluk, Musa mo’gulnentigen a’ge hegitsogoat, an en di a’ge yu a’ge e’gen daganiselat, ebe deriselat, tegis a’ge ne’gik wenakho lok akhit 9 pam an nu’gwarek pagathwerlegirik, mesik 10 a’ge hat hebaget hobo a’ge ai, wei nak logon an nowi pam po erlakma en ’berlegat aphwami Lewi a’ge emin, ap ’bok a’ge emin, malik se’bin a’ge emin, hwami sugwe a’ge emin, wogentegis o, naik. Hat en,
Di a’ge yu a’ge hene’gik wenakho, 9 honu’gwarek pagathorloluk, 10 a’ge ai an nobomup o, oluk e’gen a’ge hegitsogoat, wene ai memerak poluk mesik hiak sagalogo tu erlakma en ’berlegat hegitsogoat tegis o, naik. 14Di a’ge yu a’ge hat hebaget pegi a’ge ai, werakma pong welat mesik no erlak, odipmu woluk libotluk, peik ’balogwi ’gela’ge nosobul horak erlakma mesik no erlagat, aphwami werakma welat nouwagoluk, mesik wogonto erlakma enat. Hat en,
Disogo tip, asogo tip, oluk ’berlegat mo’gulnentigen hegitsogoat hiak hwelak poluk hegitsogo tegis o, naik.
15Hat hu’gwarek howi ’bogorl pam welegenma eba en nis heiyagai Israel a’ge hil nentasulat, obapnenebiselat, nonowi moli opma di a’ge yu a’ge modok a’bikmu hat en nene’balak wogentaigoluk wene weragenebegen hegitsogoat woknentigen a’ge yu obap pasulat, togu lomup o, oluk mo’gulese lomup o,” oluk mo’gulentesi.
“Nenaik ’gain Onuk Logo a’ge en henebe polikhonoboluk wokhenebegei o,” oluk mo’gulentesi wene
16At Musa en asogo mo’gulentesirik, mesik disogo mo’gulentesi,
“O yogodak ya pam Nenaik ’gain Onuk Logo a’ge Allah en,
Disogo togu lomup o, asogo togu lomup o, oluk ’berlegat mo’gulnentesi a’ge ai, his en togu lemagoluk mo’gulhentesi o. Holuk e, henede honogola mesigat oroguptik, at ebam lo’boksogo welat, wene ai ’berlegat hwelak poluk henebit erlaksogoat togu lomup o. 17O yogodak ya pam,
Nenaik ’gain Onuk Logo a’ge re, Allah emategat o, oluk ’baksogo it o. Asogo ogulat,
Nis hat hiak hologo welat, hat en,
Disogo togu lomup, asogo togu lomup, oluk nenesa’go wusogo mo’gulnentigen a’ge ai ’berlegat hegitsogo togu lomul o, oluk wene weragebemit o. 18#Kel. 19:5; Ula. 4:20; 7:6; 14:2; Tit. 2:14; 1Pet. 2:9O yogodak ya pamat, Nenaik ’gain Onuk Logo a’ge en,
His henebe disogo takhenebaik, oluk wene werakhenebesi ’gela’ge, henebe at u’gwarek eiyagai emagoluk wokhenebegei o. Asogo wokhenebegeitik, disogo mo’gulhentasu,
An en,
Disogo togu lomup, asogo togu lomup, oluk henesa’go wusogo mo’gulhentegis a’ge ai, ’berlegat togu lomup o, oluk mo’gulhentesi o. 19Nenaik ’gain Onuk Logo a’ge ai en aphwami ena’gul onuk mesik walentesi a’ge ai, ena’gul onuk we, wei logon mia ’gela’ge oruakhwe, his nak e, hena’gul onuk lok a’ge takhonobua ani o. Asogo takhenebasuam, is aphwami eba en his hau do’goksogo wathonobogulat, erlikhonobogulat, togu lema ani o. Nenaik ’gain Onuk Logo a’ge en wene werakhenebesi a’ge hegitsogoat, his henebe at u’gwarek eiyagai oroguptik wolorogup ani o,” oluk mo’gulentesi.
Currently Selected:
Ulangan 26: Wul
Highlight
Copy
Compare
Share
Want to have your highlights saved across all your devices? Sign up or sign in
