1 Petrus 2
2
“Yesus ebe helep o ’bobuk pogwi ai ’gela’geat o,” oluk mo’gulentesi wene
1Ai en, his wiak togu legep a’ge ai modok ukpoluk wolomup o. Aphwami logon lalonobogulat, henede ’biren welat, ’bou togulat, heniak eseiyat aphwami logon onobok wiaksogo ’balogulat, togu legep ai, ukpogu lomup o. 2-3#Mzm. 34:8Di a’ge yu a’ge oduk nekholuk, oduk op ogwi ai ’gela’ge, nonue ’gain Onuk Logo a’ge ebabut op hegep ai en e, malik ’get dogo a’ge agamu nele en no’gwi modok welagai ai ’gela’ge, wene op wene henede ai pam hurle omma obaphonobuagoluk, wene aiat henagaisogo wogwi modok wolomup o. 4At ebe helep ’gela’ge elaluk welago a’ge oluk e, e’bek manup o. Aphwami en e,
“Helep ai wiak,” oluk ukpegesa a’geat de, Allah en e,
“Helep yu modok op a’geat o,” oluk pulogo pesi. 5Asogo pesimu, his henebe helep elaluk welago ai a’ge ’gela’ge welat, at e’bek manup o. At e’bek wagaiam, Allah en e, at u’gwarek owi wusogo honobouwak. At owi werikmu, henebe Allah eiye a’geat Yesus Kristus emin hwedik welat, Allah ede opsogo uam warogulom ’gela’ge, henede wogogu lomup o. 6#Yes. 28:16Ai a’ge paget Allah en disogo egei,
“An en, helep modok op a’ge pulogo o Sion eba o ’bobuk mesik daintak pegi yu hemit!
His aphwami henebe lo’bok henede at ebam he’berik wolorogup holuk e, hene’gerli hagup erlak o,”
oluk egeimu pelal wokho pegesa ai. 7#Mzm. 118:22His henede at ebam he’berik a’ge en e,
“At modok op,” oluk pobi togu legep ai o. A’geat de, is logon enede at ebam he’berik po erlak a’ge paget nak e, disogo egei,
“Is ap tukang o helep owi worogwi a’ge en, o ebe worogulat e,
Helep yu wiak, oluk ukpegesa a’ge ai obuleat dain egeimu o,”
oluk egei. 8#Yes. 8:14-15Ye, mesik disogo egei,
“Aphwami helep ai pam onoyuk dungsogo wathorlogulat, ’bulak horlogulat, togu lema o,”
oluk egei. Asogo ’bulak horlogu lema ai re, is en op wene ai,
“Demat,” oluk pobi tua erlak ai en, Allah en epesi hegitsogoat, wathorlogwi ai o.
9 #
Kel. 19:5-6; Ula. 4:20; 7:6; 14:2; Yes. 9:1; 43:20-21; Tit. 2:14 A’ge re, his nak e,
“At Allah en obapnenebasu,” oluk obok mo’gulentil louwagoluk, henebe o hiktakma oruakma, at ebe elalinat dakharak modok welagoma wemagoluk yo’go henebesirik, his at eiyagai emagoluk polikhenebasulat, at ebe eiye ’gain welemagoluk edikhenebasulat, hena’gul onuk at u’gwarek a’gul onuk a’ge tualogo henebasulat,
“Nu’gwarek neiyagai,” oluk henebe wokhenebiselat, tegei ai o.
10 #
Hos. 2:23
His naduk e, Allah emin ogorlirak honomu a’geat welegep a’geat de,
yogodak henebe Allah eiyagai egep o.
Ye, naduk e, his en e,
“Allah nenebe ede oruak,” oluk heneperlak welegep a’geat de, yogodak,
“Nenebe Allah ede en woknenebegeimu welege o,”
oluk henaluk egep o.
“Henebabut Allah eragam welat, Disogo togu lomup o,” oluk mo’gulentesi wene
11Narilak norokhwi. Henebe nede o. His henebe ap ’bok aphwami onowi pam ’bogulogo legeptik, eba welat e, di a’ge yu a’ge honogola en ’gagalogo orlu agalat, henede en nasuam nenagai opogu legep a’ge ai re, selei a’ge en waronobogwi ai ’gela’ge henebe wiagap henebigoluk, honogola en ’gagalogo orlu ago a’ge ai ukpogu lorogup en mo’gulhentasu legi ai o. 12Is aphwami o’borl o’gwe a’ge Allah eneperlak a’ge henemin welat, is en e, his wiak togu legep a’ge ’gela’ge,
“Is wiak togwi o,” oluk honobok wiak ogularat de, his henebabut op togwiam enil hontogu lemarik e, aphwami en at Allah ebe pobuk wagoam erliktuagoluk his henebabut hegitsogo togu lomup o.
13-15At Allah en e, his disogo togu lemagoluk ede epesi o. Aphwami enede erlak a’ge en wene eneperlak welat ogwi ai, ene’gerli agalat eniak erlak emagoluk, his henebabut op togu lemagoluk epesi ai en e, nonue ’gain Onuk Logo a’ge paget, aphwami en pemerintah a’ge ’gain welemagoluk edigenebegesa a’ge ai, enebe ’berlegat eneragam ’goluk eniak hologo togu lomup o. Asogo togulat, Kaisar onuk logo a’ge pemerintah a’ge ’gain logo ’gela’ge ai emin, at en is gubernur lak aphwami wiak togwiam wene enebam pogulat, op togwiam erligonobogulat, togu lemagoluk yo’go onoboluk peragonobou wago a’ge ai emin, eniak hwelakpoluk togu lomup o. 16Asogo welat, his en e,
“Nis wiak a’ge eragam oruakma, Allah en herle hebilogo nenematekma nenebesimu welege,” oluk, wiak mesik hisakho togu lorogup o. We, henebabut Allah eragam a’ge welat tu a’ge hegitsogoat togu lomup o. 17Aphwami ’berlegat henede nak welat heniak do’goksogo waronobogu lomup o. Asogo waronobogulat e, henarilak honorokhwi Allah eiyagai a’ge logon henede hwedik wolomup o. Welat e, Allah ebe honogorloksogo welat, ye, Kaisar onuk logo pemerintah a’ge onue ’gain ai hau do’goksogo worogulat, togu lomup o.
“His en Kristus ebabut wo yo,”
oluk mo’gulentesi wene
18His logon, honuelak eneragam welegep a’ge ai, is eneragam welat, enebabut op sakhorak a’ge paget nak honogorlok takpoluk eniak hologo togulom puk. At e, enebabut wiak a’ge eminat honogorloksogo eniak hologo togu lomup o. 19His en wiak mesik tu erlakmayat de, honuelak en di obotut yu obotut takhonobogukhwe, honogola en e,
“Allah ogola agai a’ge tu,” oluk pobirak poluk, henepe mosogo wolorogup holuk e, at en obaphonobua o. 20A’geat de, his en wiak togup pam, o’go ’go’bu wathonobogukhwe, henepe mosogo wolorogup holuk, erlikhonobu no? Erlak o. Henebabut enat u o. A’geat de, op togwiam, di obotut yu obotut takhonobogukhweat, henepe mosogo wolorogup holuk e, Allah ebabut op en obaphonobuayat o. 21At Kristus ebe his henebaget di obotut yu obotut hil-hil waraga ai en, his ogo re, at ebabut wokho di obotut yu obotut houwagolugat Allah en yo’go henebesi ai o. 22#Yes. 53:5-9At en e,
“Wiak mesik tu erlakmayat o.
Ye, iak esei osokhwe, aphwami logon enesa’go holu erlagat o.”
23Aphwami en eniak esegen wiak yagogukhweat de, at en o’go iak esegen yagonto erlagat. Is en di obotut yu obotut takpogukhweat, at en,
“An pobuk o’go mesik wathenebik o,” oluk mo’gulentasu laga erlagat o. At e,
“We, Allah en wene enebam pasulat, no’gorliselat, hegitsogo tua a’ge oruak o,” oluk, at e’gik pam poluk, iak o’go u erlakma en mo ese laga. 24Nis nenebabut wiak togu lege a’ge ai, aphwami warotluk di a’ge yu a’ge togwi erlak ai ’gela’ge, nis wiak a’ge ukpoluk, nenelaluk welat Allah agai a’ge togu lemagoluk, nis wiak togu lege a’ge no’gorlogo, at Kristus u’gwarek en ebam pesimu, ebe e pam edikpoluk werigisa ai o. At ebe lebil-lebalsogo werigisa ai pam, his obaphenebegei ai. 25His naduk e, wam domba wam ebela nelakpasu ai ’gela’ge, nal lai laga legep a’geat de, yogodak at Allah en, at henebe tenhentarok welat ’gwelakhentarok welago a’ge e’bek pobuk togolik wokhonoboluk honobou wagama welegep o.
Currently Selected:
1 Petrus 2: Wul
Highlight
Copy
Compare
Share
Want to have your highlights saved across all your devices? Sign up or sign in
