EPETUT 3
3
Aakumi endekem mendek inagap ndariyak wone kote koonak wonagagerak nogo pagak yereegerak wone
1Ti eeppinaniyak kooneegerak nogo abeke logonet, kit aakumi endekem mendek Keritut Yetut wone yokkirage nagagirak nogo paga keele maa'nabeegwaarak yime logonet, Ala mondok alut eeke minggirak o. 2At Ala nen nabuwa mbake logonet, kit obeelom eeppinagawak nduk, unde eeppaneegerak nogo ti, kit muk kineenu o. 3Wone kote kumaarak wonagagerak lalin negen aret kin eeppaneegerak liiru kuwagaluk agiinggwe mbanggiragarak nogo, 4kit pekkogo logomonggotik, an Keritut agote wone nonggop togon liippereegirak nogo kineenu arumunggup o. 5Wone kote kumaarak yokkiragarak nogo ti, it aakumi aa'nduk wonogogwaarak nogo, paganogo yoraga'lek aret wonagagerak kwe, yogondak perak, Ala nen Aberiniki nappi wagagerak nogo paga nen, it aap Ala ake leenak obeelom wone wonok, yi awi ndi awi nugu menggaarak nappiigak inom, it aap Ala nen yorage kagak wone yorogo menggaarak nabi-nabi inom, abok aret ineenu eeppiyareegerak. 6Obeelom wone waganggwi paga, it aakumi endekem mendek inom, aakumi Yakuri mendek inom, Ala apuri mban aret me, Ala nen obeelom eeppinaniyak kooneegerak nogo ndak-ndak aret kologwe, nineebe ando mogonak negen kit aret wonogwe, ndi, Ala nen Keritut eeremenggerak paga nit eeppinaniyak wone abok yo'niragagerak nogo, kit kunduk ndak-ndak aret waganggwi, eekwi nogo ti, wone kote kumaarak yogondak iluk kin agaarak nogo aret.
7Ndi, obeelom wone nogo ti, at omaawi mondok alik negen eeke menggerak neenu eeppanege logonet, yorage logowak nduk, nabuwa nen unde eeppaneegerak. 8-9It abet mbareegwaarak Ala apuri nogo apit tiyanak wonogwe iigak, an abu inabu'me tebenak tit neegak kwe, Keritut oba ngginik kagak eeppinanit wundi wage menggerak wone nogo, kit aap endekem mendek yokkirage, ndi, at yi mendek ndi mendek wakkagagerak Ala nogo nen, wone o maan koonak kote kumaapporogo wonagagerak nogo, nonggop eeppinaniyak koonogo pereegerak nogo kineenu eeppinagage, eeke logowak nduk, nabuwa mbake logonet unde eeppaneegerak. 10Ndi, wone koonak kumaapporogo wonagagerak nogo ti, nit Ala apuri yi awi ndi awi monggoorak nogo nen, wone ti wappunuk eerit nogwe paga, it mbogut paga menggaarak melaikat inoweewi inom, inawuri inom, it abok nen, ”Ala iniki mondok warak logonet, yi wone ndi wone koonogo eeppiige menggerak nogo yogondak yi aret kogo o,” yinuk, ineenu aruwak nduk, kumaapporogo wonagagerak. 11At Ala nen eereegerak nogo ti, ninowe Keritut Yetut nen eeppinanege logowak nduk, o maan togon koonogo pereegerak nogo ndak-ndak aret eereegerak o. 12Nit niniki Keritut oba panggombunuk, abet mbako mbareegu, at ninom kumbinaneegerak me, ninagabiti lek niniki teeluk aret logonet, Ala owagam unggwi noorak op aret o. 13Togop me noreewi o. An obeelom wone yokkirage nagagirak paga aaninggin noba agaarak wonage yi paga kinagabiti nen kiniki yungguppegak eerugup o. Yi ee'nakwi nogo ti, kit ambi eeppinagarak nduk, eeppanugwi me, op aret o.
Keritut ninabuwa mbake menggerak wone
14-15Togop me, it aakumi mbogut paga mendek inom, nggween paga mendek inom, ninanebunu lombok abok aret, ”Ninogoba Ala o,” yinuk, yogo monggoorak nogo, abu'me tebe yinuk, 16”Kat mondok tiyanak logonet, koba ngginik kagak kapuri eeppiige menggendak nogo ndak-ndak, Aberiniki omaawi paga iniki nu'lek eerogo piige logot o,” yinuk, kinake tamban eeke minggirak. 17Kit abet mbakwi kiinok Keritut kinikime mondok puk ari unggwage, ndi, eyo omanggen nggween kole paga wuraketak nu'lek minggi kwak, kit togop aret kiniki nu'lek logobagip nduk, aakumi kinom kiniki kunik aganakwi, eeko logobagip nduk, kinake tamban eeke minggirak. 18-19O agi-ogu irip-irip inom ti, wakkogo menggaarak kwe, Keritut ninabuwa mbake alom nogo ti, mondok nggwok lombok me, wakkoorak meek aret kwe, kit abet mbareegutak Ala apuri kinom abok aret we mbuuluk liippugwi kiinok, Ala iniki-obaabut aago menggerak abok aret kit ndak-ndak eekkinabuwak nduk, kinake Ala yoge minggirak.
20Nit eeppinanuwak nduk nggino yogwi, niniki koonggwi, eekwi nogo mban eeppinanege ti lek o. Ata, at omaawi ee'ninake logonet, niniki mbaka'lek nogo mendek inom abok aret eeppinanege menggerak me, 21nit Ala apuri yi awi ndi awi monggoorak abok aret Keritut Yetut ninom kunik logonet, yogondak inom, peebi inom, mondok-mondok alut eeko logowok o. Amin!
Currently Selected:
EPETUT 3: WNO
Highlight
Copy
Compare
Share
Want to have your highlights saved across all your devices? Sign up or sign in
