EPETUT 2
2
Kambak negen wonogogurak kwe, nineenik eeppinaneegerak wone
1-2Kit o maan aa'nduk nen it aap nggween paga mendek iniki nengge kenok mugurok nogo mengga kwak mugurok nogwe, it yi kugi ndi kugi mbogut abu'na o oolo yi menggaarak inowe, aakumi Ala wone taganggwi iinok iniki nggagangge menggerak Tile nogo nen, yokkirage kenok konenggwi, eerit nogo logonet, Ala wone taganogo punuk, yi maluk ndi maluk eeko nogogutak paga kambak negen aret wonogogutak o. 3It Ala wone taganogo punuk, maluk eeko nogogwaarak paga Ala anini inoba piyoorak wonogogwaarak nogo ndak-ndak, nit kunduk, togop aret niniki nengge kenok mugurok nogwe, maluk eeriyak ee'ninake kenok, eerit nogwe, eeko nogogurak paga Ala anini mondok ninoba pinaniyak aret wonogogurak kwe, 4-5at Ala nogo nen aakumi maluk eekwi iinok, anini nen mbet-mbet inookeelik mondok inabuwa lombok mbake logonet, yanggo yinuk torinake menggerak me, nit abok aret yi maluk ndi maluk eerit nogo nogogurak paga kambak negen aret wonogwe niigak, Ala nen ninabuwa mbake nagagirik, Keritut eenik eeppege logonet, nit kunduk ninom aret nineenik eeppinaneegerak. Ala nen ninabuwa mbake nagagirik, ninagap ndareegerak kogo o. 6Ndi, at Keritut ninom kunik wonogwe niinok, at ninom nineenik agago mippinanege nagagirik, at tiyanak mbogut paga wonage nogo ninom ndak-ndak logowak nduk, tiyappinaneegerak.
7Ti eeppinaneegerak nogo ti, ninabuwa mbake logonet, Keritut wo'niragagerak ti paga, o yogondak wonage inom, peebi logorak inom, at aakumi abok aret iniki kunik en oba ngginik kagak ngginu-ngginu eerogo wogorage menggerak nogo, mondok-mondok nineenu logowak nduk, eeppinaneegerak. 8Kit abet mba'nuk, kiniki at oba panggombugwi kiinok, kinabuwa mbake logonet, kinagap ndareegerak o. Kit ambi eekkologogutak paga eeppinagulik o. Ata, Ala nen onggo lek we aret eeppinagareegerak o. 9Kit nen ambi eekkologwe paga wogoppakwi kiyo, at nen mban onggo lek we aret eeppinagareegerak. 10Ala nen aret ogobakkigi'ninabeegerak me, nit at amendek aret ogoorik o. Nit obeelom eeko logorak Ala nen maan kooneegerak nogo, Keritut Yetut ninom kunik logonet eeko logowak nduk, ogobakkigi'ninabeegerak.
Keritut ninom kunik me nineebe ambit aret ogoorik o
11Togop me noreewi o. It aakumi Yakuri mendek nen inagabolo mbanggo menggaarak me, ”Nit ninagabolo mbanak mendek o,” yogo logonet, ”Kit kinagabolo mbanak lek mendek o,” yinuk, yokkirogo menggaarak kit endekem konenggulik mendek nda'nogogutak nogo, aa'nduk wonogogutak kiniki abeko logonip o. 12It aakumi Iterali mendek mban Ala apuri leenak wonogwe iigak, kit aa'nduk Keritut kinom ogoorak logonet, we aakumi nggiru negen aret wonogogutak me, at apuri iinok, wone abok yoragagerak nogo, kit koloorak meek aret wonogogutak. Kit aa'nduk kinogoba Ala kineenggo'lek me, kiniki ambi luunik lek 13o nda negen aret wonogogutak kwe, Keritut amiya paga Ala kinom lambunogo pinagareegerak me, yogondak Keritut Yetut kinom kunik aret wonogwe o. 14Nit aap Yakuri mendek inom, kit endekem mendek inom, at Keritut eebe paga paalungga negen warogo nineebe ambit lambumbinanege logonet, wim pak wurik pogom ninom ogoorak aret wonogogurak nogo, minogo mbo nappege, 15ndi, nit aap ninanebunu mbere wonogogurak nogo at eebe paga at apuri ninanebunu ambit a'nuk, ninom niniki lambunik logowak nduk, Muta nen, ”Yogop ee'nu, ndogop ee'nu,” yinuk, lengganogo yoreegerak wone nogo paga ninom ogoorak wonogogurak nogo kunduk, lek eerogo pege, eereegerak. 16Ti eeke nagagirik, Keritut eyo karo-karo paga kangge logonet, ninom ogoorak wonogogurak nogo, lek eerogo punuk, nineebe ambit lambumbinanege nagagirik, ti'nuk, kit ninom lambunik logowak nduk, Ala abu'me pinani wagagerak. 17Ala ninom lambumbinanikit nduk, Keritut kangge nagagirik, kit nda negen wonogogutak nogo inom, nit korok wonogogurak nogo inom, ”Paalungga muk warak me, lambuninip o,” yinuk, yo'nira wagagerak. 18Ndi, yogondak Keritut eereegerak ti paga, nit Yakuri mendek inom, kit endekem mendek inom, Aberiniki ninom kunik niniki ambit lambunik logonet, Ala owagam noorak op aret o.
19Ti kenok noreewi o. Kit aap nggiru alik mendek wonogwe lek o. Kit ninom ndak-ndak abet mbakwi paga Ala apuri aret me, mbogut paga ninaworak aret ogoorik o. 20O eyak aa'nduk wuppunuk, o eebe mondok nggilik-nggelok wuko mengga kwak, o eyak aa'nduk wurabak nogo kokwak ti, Keritut Yetut aret o. Ndi, o eebe wurit laganggwi kwak ti, it nappiyareegerak mendek inom, it aap Ala nen yorage kagak yorogo nogogwaarak nogo inom, it nogo nen obeelom wone yo'nirogwe iigak, abet mba'nuk waganeegurak nit nineebe aret o. 21Ndi, Ala nen at awi mondok alik mbeenak obeelom lombok wukkolaakit nduk, nit nineebe alitik-alitak nogo, waganogo ninowe Keritut Yetut eebe ambit nogo paga panggombunuk, oba lu'luk wurit lagangge logonet, 22kit togon, Ala eebe negen Aberiniki kinom logobagip nduk, kit kineebe nogo waganogo Keritut oba panggombinaganuk, at awi negen aret wukkolage agaarik o.
Currently Selected:
EPETUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
