KELUARAN 29
29
Nakanenetek la'eneu Harun no anan-nala nana ndo eik da'dileo imam
(Im. 8:1-36)
1“Harun no anan-nala nana ndo ein-na leoiak, fo ela ala hapu lalalau-laoono Au da'dileo imam. Ho'u-ma sapi maneanak esa ma bi'ilopo mane dua ta lu'u la'ak fa. 2Ho'i ha'desopu neulauk fo kamen, tehu boso kamen no laluteik. Ho'i-ma ha'desopuk nanakamek ndia seli, fo tao loti nenik mina setun, ma seli boso pake mina, ma ha'desopu ela-ka, taon neu kokis fo lose mina neu. 3Taon neu lepeneu esa dalek, fo tunu-hotu fen neu Au sama-sama no sapi manem-ma bi'ilopo manek-ka duak nanatunu-hotuk-kala.
4Madenu Harun no anan-nala mai leo Au Lalaa Temang-nga lelesun-na mai, fo ala safe-saa aoinan-nala. 5Pake papake imam ia-la neu Harun: ba'du, efod, ba'du manalu fo manapotiketu efod-ta, babaa fanak ma kalikee. 6Pa'a fefeo langak neu langan-na, ma lolo'e lilopilas fo nanabalias nenik dodoki-dudulak ‘Nanahele hehelik soaneu Manetualain-na’, neu fefeo langak ndia. 7Boema ho'i-ma mina feta fo po'an neu langan lain ma lose neu aon-na.
8Basa ndia soona, madenu anan-nala mai fo pakes ba'du 9ma kalikee, boema pa'a fefeo langak neu langan-nala. Harun no anan-nala ndo ein-na leondiak. Sila ma sila tititi-nonosin muse lalalau-laoono Au da'dileo imam losa dodoon-na.
10Basa soona, o muse hela meni sapi mane ndia leo Au Lalaa Temang-nga matan-na neu. Harun no anan-nala muse lalaa liman-nala neu bana ndia langan lain. 11Do'do sapi mane ndia nai Au matang, fo nai Lalaa Temak lelesun-na. 12Ho'i-ma sapi ndia daan seli, fo lose menik o limaku'um-ma neu mei tunu-hotuk-ka susulan-nala. Daak fo bei elak ndia O muse po'an leo mei tunu-hotuk-ka dae neu. 13Basa ndia soona, ho'i-ma mina teidalen-na, aten-na, boade'en duas loo minan-na, fo tao basa-basas neu mei tunu-hotuk lain fo tunus soaneu tutunu-hohotuk ba'eneu Au. 14Sapi mane ndia paan-na, loun-na ma ganggaen-na, muse tunus nai mamana oofuk-ka deak. Ndia nde da'di tutunu-hohotuk soaneu basa imam-mala sala-singon hapu do'o do ampon.
15Basa soona, ho'i-ma bi'ilopo manek-ka duak sila-la. Fo Harun no anan-nala muse lalaa liman-nala neu bana sila-langan lain. 16Soona, do'do bana sila-la fo ho'i-ma daan-nala fo pisin neu mei tunu-hotuk-ka boboan haas. 17Muse tete'te bi'ilopo ndia paan-na. Muse safe tei-aten ma sakibolon-na, fo taos leu langan lain boema neu bibia fe'ek-kala lain. 18#Ef. 5:2; Flp. 4:18 Tunu-hotu bi'ilopo mane ndia paan-na lala'en-na neu mei tunu-hotuk lain, soaneu da'di tutunu-hohotu nanatunuk. Tutunu-hohotuk ndia boon-na nandaa no Au daleng-nga.
19Ho'i-ma bi'ilopo mane esa, fo nde bi'ilopo mane soaneu feta ndo eik-ka. Madenu Harun no anan-nala lalaa sila liman-nala neu bana ndia langan lain. 20Boema do'do bi'ilopo mane ndia, fo ho'i-ma daan faaanak fo losen neu Harun no anan-nala di'idoo konan-na, neu lima ku'uina konan ma ei ku'uina konan-nala. Daak fo bei elak ndia, muse pisin neu mei tunu-hotuk-ka boboan haas. 21Ho'i-ma daak manai mei tunu-hotuk lain-na, faaanak ma mina feta fo pisin neu Harun no anan-nala, boema bua-lo'a papaken-nala. No enok ndia, Harun no anan-nala boema bua-lo'a papaken-nala nanahele hehelik ba'eneu Au.
22Ho'i-ma bi'ilopo mane ndia minan-na, iko maminan-na, mina teidalen-na, aten-na, boade'en duas no minan-na, ma sakibolo konan-na. 23Ho'i-ma loti esa neme loti mata-matak-kala neme lepeneu loti fo nanatunu-hotu basak soaneu Au so: esa nanataok nenik mina setun, esa ta pake mina fa, ma kokis esa. 24Pe'da basa nana'ak sila-la neu Harun no anan-nala liman dale, fo madenus latu'dun neu Au da'dileo tunu-hotu natutu'duk. 25Boema ho'i-ma loti ndia neme sila liman dale mai, fo tunun nai mei tunu-hotuk lain, fo nai tutunu-hohotu nanatunuk ndia lain. Tutunu-hohotuk ndia boon-na nandaa no An daleng-nga.
26Ho'i-ma bi'ilopo mane ndia sosolon-na fo tunu-hotun soaneu da'di tutunu-hohotu natutu'duk ba'eneu Au. Fo o baba'em-ma nde ndia.
27Nai feta ndo eik imam-mala dalek, muse tunu-hotu bi'ilopo mane fo paken nai feta ndia, sosolon-na, ma sakibolon-na da'dileo tutunu-hohotu natutu'duk ba'eneu Au, de pe'da fe'en soaneu basa imam-mala. 28Au nakeketung fo ta hapu nggati fan-na nde ia: Nai lelek Au anang-ngala mai fo ala tunu-hotu tutunu-hohotu mole-dame soona, bana ndia sosolon-na no sakibolon-na nde been-na, basa imam-mala baba'en-na nde ndia. Au anang-ngala tutunu-hohotun soaneu Au-a, nde ndia.
29Harun bua-lo'a makaluku-makatelen muse fes leo anan-nala da'dileo bua-lo'a pusaka, fo ela ala hapu pake nai lelek sila nana ndo eik. 30Harun anan manada'di imam nggati aman-na, fo ana masok leo Au Lalaa Temang dale neu soaneu ana tao makaluku-makatele nai Kama Malalao-malafuk dale, muse ana pake bua-lo'as ndia, faik hitu dalen-na.
31Ho'i-ma bi'ilopo mane paan-na fo nana pakek nai lelek Harun no anan-nala feta ndo ein-na dalek, fo nasu paa ndia nai mamanak esa malalao-malalafuk. 32Sila muse la'a paa ndia nai Au Lalaa Temang-nga lelesun-na no bei ela loti manai lepeneu dale. 33Sila muse la'a nana'ak fo nanatunu-hotuk nai feta sala-singok hapu do'o do ampon nai fai ndo eik-ka. Ka'da imam-mala nde bole la'a nana'ak fo nanafe hehelik soaneu Au ndia. 34Metema losa balahaa fafaik te bei ela paa do loti, soona muse hotuheni nana'a elak sila-la, fo ta bole na'a fan, nanahu nanahele hehelik so.
35Harun no anan-nala feta ndo ein-na, muse taon faik-katemak 7 dalen-na, sama leo Au paleta basan neu o so. 36Tunga faik, muse tunu-hotu sapi mane esa soaneu sala-singok hapu do'o do ampon. No tutunu-hohotuk ndia, mei tunu-hotuk nanatao nalalao-nalalafuk. Boema o muse lose mina neu mei tunu-hotuk ndia nenik mina setun, fo ela nanafe hehelik soaneu Au. 37Tao leondiak tunga faik, nai faik hitu dalen-na. Soona mei tunu-hotuk-ka aoinan-na lala'en-na da'di malalao-malalafuk; su'di beek fo la'e mei tunu-hotuk ndia soona, muse fen neu Manetualain, ma su'di see fo ana koila'en soona, neukose ana hapu soe, nanahu mei tunu-hotuk ndia malalao-malalafun bei-balakain.”
Tutunu-hohotu tunga faik-ka
(Bil. 28:1-8)
38“Tunga faik soaneu losa dodoon-na, muse tunu-hotu bi'ilopo dua teuk beke esak nai mei tunu-hotuk ndia lain. 39Esa soaneu tutunu-hohotu fafain-na, ma esak-ka soaneu tutunu-hohotu le'donoson-na. 40Bi'ilopo soaneu tutunu-hohotu fafain-na, muse tunu-hotun sama-sama no ha'desopu neulauk kilo 1, ma sese'dok-kana no mina setun isik litel 1. Fe'ek neme ndia mai boe, sese'dok-kana no angol litel 1. 41Bi'ilopo soaneu tutunu-hohotu le'donoson-na, tutunu-hohotun muse sama no tutunu-hohotu fafain-na, fo sama-sama no ha'desopuk, mina setun ma angol. Tutunu-hohotu nanatunuk ndia boon-na, nandaa no Au daleng-nga. 42Basa soona, soaneu tepo-lelek lala'en-na, tutunu-hohotuk nanatunuk ndia muse nanatunu-hotuk nai Au matang-nga, fo nai Au Lalaa Temang-nga lelesun-na. Nai ndia nde, neukose Au atongo o Au anang-ngala, ma Au kokolak o o. 43Nai ndia nde, neukose Au atongo o leoina Israel-la, ma Au ndela-sa'ang neukose taon-na mamanak ndia da'di malalao-malalafuk. 44Neukose Au tao-a Lalaa Temak ma mei tunu-hotuk ndia da'di malalao-malalafuk. Harun no anan-nala, neukose Au hele fe'es leme fe'ek-kala mai, fo ela lalau-laoono Au da'dileo imam. 45Neukose Au leo nai leoina Israel-la tala'da heon, fo da'di sila Manetualain. 46Neukose ala bubuluk lae Au nde Manetualain fo sila Manetualain-na fo mana no sila kalua leme Masir mai, fo ela Au hapu leo nai sila tala'daheon. Au nde sila Manetualain-na.”
Currently Selected:
KELUARAN 29: twu
Highlight
Copy
Compare
Share
Want to have your highlights saved across all your devices? Sign up or sign in
