Jakobe 3
3
A lirimi.
1Vamakabye va mina, a linyingi la nwina ngha mu nga xuvi a kuva vagonzisi, na mu tiva lezaku hina lava hi nga vagonzisi hi ta amukela a kulamulwa ka hombe. Mat. 23:8
2Hakuva hontlhe ha khubeka hi zilo zinyingi; loku munhu a nga khubeki hi kuwulawula, yaloye i munhu a mbheleleko, loyi a zi kotako ku khoma ni miri wakwe wontihe hi matomu. 1 Tih. 8:46; Mat. 12:37
3Loku hi enghenisa matomu milonwini ya mahaxi, kasi ma fela ku hi ingisa, ha fambisa ha wona a mimiri ya wona yontlhe. Tis. 32:9
4Langutani, ni mataru kambe, hambu lezi ma nga ya hombe, ma kukuletwa hi timheho leti ta ntamu, ma fambiswa hi lemi yi tsongwani ni kwihi a nduna yi ranzako kona.
5Hizalezo ni lirimi, xirwana xi tsongwani, kanilezi la ti kukumukisa hi zilo za hombe. Langutani, a nzilwana wu tsongwani wa hisa a khwati ga hombe. Tis. 73:8, 9
6Na lona lirimi i nzilo; a lirimi i tiko ga kubiha xikari ka ziro za hina; li nyenyezisa a miri wontihe, li dzivela a ndlela yontlhe ya kuhanya ka hina, lona wutsumbu li dzivelwa hi nzilo wa Gehena. Mat. 15:19; Mar. 7:15
7A tixaka tontlhe ta zihari ni tinyanyani, ni ta zikokakoka, ni zihari za lomu bimbini, za gonziswa, ina zi fuywa hi vanhu,
8kanilezi a lirimi, a ku na munhu a li kotako; xilo xa kubiha xi nga hluliwiko, li tele hi wutsulu gi dayako.
9Ha khesa ha lona a Hosi ni Dadani; kambe hi rukatela ha lona vanhu lava va mahilweko hi mufananiso wa Nungungulu.
10Ku huma hi ka nomu walowo wa munwe a kukhesa ni kurukatela. Vamakabye va mina, a zi faneli a kuva lezi zilo zi hi nghaho.
11Xana a hlowo ya humesa a mati yo nanziha ni yo bava wutshamu ginwe ke?
12Vamakabye va mina, xana a nkuwu wu nga pswala maoliva ke, kutani a vina wu pswala makuwu ke? Hambu ni hlowo yo dzunga a yi hunzuki yi humesa mati yo nanziha.
A wutlhari gi tako hi le hehla.
13Himani a tlharihileko a tivako xikari ka nwina ke? Ngha a kombisa a mitiro yakwe hi mahanyela yakwe yo saseka na hi ni kurula ka wutlhari. Gal. 6:4
14Kanilezi loku mu hi ni xiluse xa mona ni kuhambana timbilwini ta nwina, mu nga ti kulisi, mu hembela zinene. Rom. 2:17, 23; 13:13
15A wutlhari ga kunghaho a giti hi le hehla, kanilezi ga misava, ga mahanyela, ga madimoni. Fil. 3:19; Juda 19
16Hakuva laha ku nga ni xiluse ni kuhambana, hi kona ku nga ni pfilupfilu ni mitiro yontlhe ya kubiha. 1 Kor. 3:3
17Kanilezi a wutlhari legi gi tako hi le hehla, a kusangula gi basile, kambe gi na ni kurula, gi nene, ga ingisa, gi tele hi wuxinji ni mihanzu yo saseka, a gi na kukanakana ni kuxengetela. 1 Kor. 2:6; 1 Ped. 1:22
18A mihanzu ya kululama yi byaliwa kuruleni hi vona lava va mahako kurula. Hos. 10:12; Mat. 5:9; Fil. 1:11
Currently Selected:
Jakobe 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
