Jakobe 2
2
A kuva ni xihlawulela.
1Vamakabye va mina, a kukholweni ka nwina hi Hosi ya hina Jesu Kristu, a Hosi ya kungangamela, mu nga hlawuli vanhu. Deut. 1:17; Mat. 22:16; 1 Kor. 2:8
2Hakuva loku kuta munhu mutlhanganweni wa nwina, loyi a nga ni phera ya nzalama, a ambeleko tinguwo to saseka; kuta kambe a munhu a vumalako, a ambeleko tinguwo ti nga ni chaka;
3mu khatalela loyi a ambeleko tinguwo to saseka, muku kakwe: Tshama laha mahlweni; mu wuya muku ngalo ka loyi a vumalako: Wena yima lahaya, kutani muku: Tshama lahasi mikonzweni ya mina.
4Xana a mu mahi xihlawulela xikari ka nwina ke, muva Valamuli va nga ni maalakanyo ya kubiha ke?
5Ingisani, vamakabye va mina va ranzekako; Xana Nungungulu a nga hlawulangi lava va vumalako hi za tiko, lezaku vava lava va fumileko kukholweni, ni kuva zigatshomba ya mufumo lowu a wu tsumbisileko vona lava va mu ranzako ke? Ekso. 20:6; Joh. 7:48; Kuv. 2:9
6Kanilezi nwina mu kanyisa loyi a vumalako. Xana lava ya fumileko a hi vona va mu xanisako ke, a hi vona va mu kokoviselako tihubyeni ke? Miti. 13:50; 17:6
7Xana a va rukateli a vito legi gi nene mu vitanwako ha gona ke?
8Kanilezi mu maha khwatsi loku mu tatisa a nayo wa wuhosi, kota lezi Mitsalo yi nge ngalo: U ta ranza wakelene na wena kota lezi u ti ranzako wena. Levi 19:18; Mat. 22:39
9Kanilezi ma onha loku mu hi ni kuhlawula vanhu, ma koniwa hi nayo lezaku mu vahambunyeti.
10Hakuva loku munhu a hlayisa nayo wontihe, kanilezi a khunguvanyeka hi mhaka yinwe, i na ni nanzu ka wona wontihe. Deut. 27:26; Mat. 5:19
11Hakuva loyi a ngaku ngalo: U nga bhayi, i ngalo kambe: U nga dayi. Makunu loku u nga bhayi, kanilezi u daya, wena u muhambunyeti wa nayo. Ekso. 20:13
12Wulawuleni, mu maha kota zi faneleko vanhu lava va ta nga lamulwa hi nayo wa kutlhatlheka.
13Hakuva loyi a nga mahangiko wuxinji a nga ta mahelwa wuxinji kulamuleni; kanilezi a wuxinji gi ta ti kulisa hehla ka kulamula. Mav. 21:13; Mat. 6:15
A kukholwa ku kombiswa hi mitiro.
14Vamakabye va mina, xana zi vuna yini loku munhu aku i na ni kukholwa, kanilezi a nga hi na mitiro? A kukholwa ka kunghaho ku nga mu hanyisa ke? Mat. 7:26; Xip. 1:23
15Loku a nakuloni kutani makwenu a hi ni wuna, va vumala kuga ka masiku ni masiku, Lu. 3:11
16zonake munwe wa nwina aku kabye: Fambani hi kurula, mu kufumela, mu xura, na mu nga va nyikangi lezi zi lavekako mirini, zi vuna yini lezo ke?
17Lezo ni kukholwa, loku ku nga hi na mitiro, ku file a wutsumbu ga kona.
18Kanilezi munwani i taku ngalo: Wena u na ni kukholwa, mina nzi na ni mitiro. Nzi kombe a kukholwa ka wena na ku hi hava mitiro, mina nzi ta ku komba a kukholwa ka mina hi mitiro ya mina.
19Wa kholwa lezaku Nungungulu munwe, hizona lezo; a madimoni na wonawu ma kholwa ma rurumela. Mat. 8:29; Miti. 19:15
20Xipumbu nzi wena, hikuyini u nga ranziko a ku tiva lezaku a kukholwa loku ku nga hava mitiro a ku vuni nchumu ke?
21A kokwani wa hina Abrahama, a nga hlayelwangi kululama hi mitiro ke, laha a nga nyikela Isaka a nʼwana wakwe hehla ka alati? Gen. 22:9
22Wa zi wona lezaku a kukholwa ku lo tira zinwe ni mitiro yakwe; a kukholwa ku lo mbheleliswa hi mitiro. Maheb. 11:17
23Hizalezo wu lo tatiseka a mutsalo lowu wu nge ngalo: Abrahama i lo kholwa ka Nungungulu, ku lo hlayelwa ka yena lezaku kululama; i lo vitanwa lezaku i xaka ga Nungungulu. Gen. 15:6; Isa. 41:8; Rom. 4:3
24Ma zi wona lezaku a munhu i hlayelwa kululama hi mitiro yakwe, na ku nga hi kukholwa koce.
25Hizalezo na Rahabi, a xibhayi, a nga hlayelwangi kululama hi mitiro ke, lezi a nga amukela a tihloli, a ti fambisa hi yinwani ndlela? Jox. 2:1
26Hakuva kota lezi wu fileko a miri lowu wu nga hava moya, hizalezo ni kukholwa loku ku nga hava mitiro ku file.
Currently Selected:
Jakobe 2: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
