Maheberu 12
12
Jesu a Muvangi ni Mumbhelelisi wa kukholwa ka hina.
1Hikwalaho kota lezi hi ranzelweko hi xidlemo xa hombe xa vakustumunyu, a hi hoxeni zontlhe lezi zi hi binzisako, hi tsika ni kuonha loku ku hi namarelako, hi tsutsuma hi kutiyisela a kusiyana loku ku vekilweko mahlweni ka hina, 1 Kor. 9:24; Kol. 3:8
2na hi kari hi cuwuka ka Jesu a muvangi ni mumbhelelisi wa kukholwa ka hina, loyi hi kota ya kutsaka loku a nga vekelwe kona a nga timisela a xihambano, a nga khatali hi tingana ta xona; kanilezi makunu i tshamile hi tlhelo ga xinene ga xitshamu xa wuhosi xa Nungungulu. Tis. 110:1; Lu. 24:26
3Ina, alakanyani yena loyi a nga timisela a kukanetwa ka kunghaho hi vaonhi, lezaku mu nga rereki, mu mbhela ntamu mihefemulweni ya nwina. Mat. 10:24
4Nwina a mu se ngalwa ni kuonha kala ku huma nkhata, 1 Kor. 10:13
5Xana mu rivele a gezu ga kukhongotela, legi gi wulako ka nwina khwatsi hi loku gi wuliwa ka vana? ku ngalo:
Nwananga, u nga kanyisi a kulaya ka Hosi,
U nga mbheli ntamu loku u kawukwa hi yona; Mav. 3:11
6Hakuva a Hosi yi tsayisa loyi yi mu ranzako,
Yiba a nʼwana munwe ni munwani loyi yi mu amukelako. Tis. 94:12
7Timiselani a kutsayiswa, hakuva Nungungulu i maha ka nwina khwatsi hi vana; hakuva hi wihi nʼwana loyi a raru wakwe a nga mu tsayisiko ke? 2 Sam. 7:14
8Kanilezi loku mu nga hi na kutsayiswa, loku vontlhe vanwani va avelweko kona, zonake mu minkova, a mu vana va nene. 1 Ped. 5:9
9Tlhatakumbiri, hi wa hi ni vadadani va nyama lava va nga hi tsayisa, hi wa hi ni xichawo ha vona; xana ngha hi nga ingisi a Dadani wa mimoya, a kuva hi hanya ke? Mitse. 27:16
10Kunene vona va lo hi tsayisa xikhatanyana, kota lezi zi nga woneka na zi sasekile ka vona; kanilezi Nungungulu wa hi tsayisa a kuva hi vuneka, kasi hi fela kuva ni kubasa kakwe. 1 Ped. 1:15
11A kutsayisa kontlhe a ku woneki makunu na ku tsakisa, kanilezi ka xanisa; hambu zi hi tano anzhako ka xikhati ku pswala a mihanzu ya kurula ka vona lava va wundlilweko ha kona, a mhbanzo wa kululama. Jak. 3:18
12Hikwalaho, tiyisani a mandla ma rerekileko, ni madzolo laya ma hlekahlekako; Isa. 35:3
13lulametani a tindlela ta mikonzo ya nwina, lezaku lexi xi khwitako xi nga khuyuki, kanilezi xi hanyiswa. Mav. 4:26; Gal. 6:1
14Lavani kurula ni vanhu vontlhe, ni kubasiswa loku munhu a nga zi kotiko ku wona Hosi loku a nga hi nako. Mat. 5:8
15Ti woneleni lezaku ku ngavi kona munhu a kiyelelwako hi tipswalo ta Nungungulu; lezaku ku nga dzuki ku mila a mutsu wa kubava wu mu karata, ni lezaku a vanyingi va nyenyeziswa ha wona. 2 Kor. 6:1
16Ti woneleni lezaku ku ngavi kona a xibhayi, hambu ni munhu a kanyisako, kota Esau loyi a nga xavisa a wutewula gakwe hi ngelo munwe wa zakuga. Gen. 25:33
17Hakuva ma zi tiva lezaku anzhako loku a lavile ku kuma a tshomba yakwe ya kukatekiswa, i lo kanetwa hakuva a nga kumangi xikhati ku hunzulusa a mhaka, hambu lezi a nga kombela hi mihloti.
18Hakuva nwina a mu tshinelangi ka xitsunga xi khumbiwako, lexi xi vurako nzilo, a mu tshinelangi kuphumeni, ni munyameni, ni ka bhubhutsa ga mheho, Deut. 4:11
19ni kuvuma ka mpunzu, ni gezu gi nga kari gi wulawula, lezaku lava va nga gizwa va kombela lezaku gi nga ha wulawuli mhaka ka vona;
20hakuva va lo binzelwa hi xileletelo lexi xi nge ngalo: Hambu ni xihari loku xi khumba xitsunga xi ta gandliwa hi maribye. Ekso. 19:13
21Hi kota ya kuchaviseka ka lezi zi nga woneka, Mosi aku ngalo: Nza chava nguvu ni ku rurumela.
22Kanilezi nwina mu tile xitsungeni xa Zioni, ni le mutini wa Nungungulu a hanyako, a Jerusalema ga le tilweni, ni ka tingelosi ti nga hlayiwiko, Fil. 3:20; Kuv. 3:12
23ni le hlengeletanweni ya hombe, ni ka bandla ga matewula ma tsalilweko le tilweni, ni ka Nungungulu a nga Mulamuli wa vontlhe, ni ka mimoya ya vanhu va lulamileko va mbhelelisilweko, Lu. 10:20; Fil. 3:12; Kuv. 14:4
24ni ka Jesu a mutlhanganyisi wa xivumelwano xiswa, ni ka nkhata wa kunwatsekela, lowu wu wulako a timhaka ti nene to hunza a wa Abeli. Ekso. 24:8
25Cuwukani a ku kala mu nga mu ali loyi a wulawulako. Hakuva loku a vakale va nga ponangi, laha va nga mu ala loyi a nga va laya na hi laha misaveni, nguvunguvu hina hi nga ta pona loku hi mu fularela loyi a layako hi le tilweni;
26loyi a gezu gakwe gi nga tsekatsekisa a misava a ka xikhati lexo; kanilezi makunu i tsumbisile, aku: Nza ha ta tsekatsekisa misava kanwe kambe, na ku nga hi yona yoce kanilezi ni tilo kambe. Ekso. 19:18; Hag. 2:6
27A mhaka leyi yaku: A kanwe kambe, yi kombisa a kususiwa ka zilo lezi zi zi kotako ku tsekatsekiswa, kota lezi zi nga zilo zi mahilweko, kasi ku fela ku sala lezi zi nga zi kotiko ku tsekatsekiswa. Mat. 24:35; Kuv. 21:1
28Hikwalaho kota lezi hi amukelako a mufumo lowu wu nga tsekatsekiswiko, ngha na hi hi ni kubonga, loku hi nga khozelako Nungungulu ha kona hi mu tsakisa, hiva ni xichawo xi basileko ni kururumela,
29hakuva Nungungulu wa hina i nzilo lowu wu hisako. Isa. 66:15; Deut. 4:24; Tis. 50:3
Currently Selected:
Maheberu 12: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
