Maheberu 11
11
A ntamu wa kukholwa.
1Makunu a kukholwa hi kona ku tiyisako hi zilo lezi zi languteliwako, a xikholwiso xa zilo zi nga woniwiko. Rom. 8:24
2Hakuva a vakale va lo mahelwa a wukustumunyu gi nene ha kona.
3Hi kukholwa ha pima lezaku a misava yi lo vangiwa hi gezu ga Nungungulu, lezaku lezi zi woniwako zi mahilwe hi zilo zi nga wonekiko. Gen. 1:1; Tis. 33:8
4Hi kukholwa Abeli i lo nyikela ka Nungungulu a muphahlelo wu nene ku hunza lowu wa Kana, lowu a nga mahelwa wukustumunyu ha wona lezaku i lulamile; Nungungulu wutsumbu i lo maha wukustumunyu hi kota ya minyikelo yakwe; hi kukholwa loko wa ha wulawula hambu lezi a fileko. Gen. 4:4, 10
5Hi kukholwa Enoki i lo tekiwa, kasi a nga woni kufa; a nga kumiwangi hakuva i wa tekilwe hi Nungungulu. Hakuva na a nga se ku tekiwa i wa mahelwe wukustumunyu lezaku i wa tsakisile Nungungulu. Gen. 5:22
6Kanilezi ahandle ka kukholwa a zi koteki ku mu tsakisa; hakuva loyi a tshinelako ka Nungungulu i yimelwe hi ku kholwa lezaku ku kona Nungungulu, ni lezaku yena wa chachazela lava va mu lavako.
7Hi kukholwa Noa na a byelilwe hi Nungungulu hi zilo zi nga kala zi nga se woniwa, i lo ingisa, a aka a taru kasi ku hanyisa a nghamu yakwe; hi ku maha lezo i lo kona a tiko, a maha xiga-tshomba ya kululama loku ku nga ka kukholwa. Gen. 6:13; Rom. 3:22
8Hi kukholwa Abrahama i lo ingisa laha a nga vitanwa, a suka aya tikweni lego a ta nga ya nyikwa gona giva tshomba yakwe: i lo rura na a nga ku tivi laha a yako kona. Gen. 12:1, 4
9Hi kukholwa i lo maha muluveli tikweni ga xitsumbiso, a ku khwatsi i tiko ga vambe; a tshama lomu matendeni zinwe na Isaka na Jakobe, va nga ziga-tshomba zinwe naye ya xitsumbiso lexo. Gen. 12:8
10Hakuva yena i lo cuwukela a muti lowu wu nga ni ziseketelo, lowu Nungungulu a nga muaki ni mumahi wa wona. Kuv. 21:2
11Hi kukholwa Sara i lo kuma ntamu wa ku xura nyimba, hambu lezi a xikhati xakwe xi nga hunzile, hilezi i lo alakanya aku i tsumbekile loyi a nga mu tsumbisa. Gen. 21:2; Rom. 4:21
12Hikwalaho ka wanuna munwe, loyi a ngaku khwatsi i file, ku lo huma vanyingi khwatsi hi tinyeleti ta tilo, ni ku khwatsi hi seke ga le fungwini wa bimbi, legi gi nga hiko na ku hlayiwa. Gen. 22:17; Rom. 4:18, 19
13Vontlhe lava va lofa kukholweni, na va nga se ku amukela lezi zi tsumbisilweko, kanilezi va wa zi wonile, va zi tsakela na zi hi kule, va ti wula lezaku vapfhumba ni vaenzi laha misaveni. Gen. 23:4; 47:9; Joh. 8:56
14Kunene lava va wulako zakunghahi va wonisa lezaku va lava a tiko gi nga gabye.
15Hakunene loku a va kari va alakanya hi tiko lego va nga sukile ka gona, ngha va kumile xikhati xa ku tlhelela ka gona.
16Kanilezi makunu va navela a tiko gi nene ku hunza gona, legi gi nga le tilweni; hi kota ya lezo Nungungulu a nga na tingana a ku vitanwa lezaku i Nungungulu wabye; hakuva i va longisele muti. Ekso. 3:6, 15; Fil. 3:20
17Hi kukholwa Abrahama i lo phahlela ha Isaka a siku a nga ringiwa; ina, loyi a amukeleko a zitsumhiso i lo nyikela a nʼwana wakwe a belekilweko yece; Gen. 22:1, 9; Jak. 2:21
18loyi ku nga wulilwe ha yena ku ngalo: A pswalo wa wena wu ta vitanwa ha Isaka. Gen. 21:12
19Hakuva i lo alakanya lezaku Nungungulu i na ni ntamu hambu ni ku vuxa hi ka vafileko; lomo a nga mu tlheliselwa ha kona, loku hi wulawula hi ku fananisa. Rom. 4:17
20Hi kukholwa Isaka i lo katekisela Jakobe na Esau hi zilo za ha tako. Gen. 27:27
21Hi kukholwa Jakobe laha a nga kari afa, i lo katekisa a vana vambiri va Josefa, a khongela na a khegele hehla ka chetengelo wakwe. Gen. 47:31; 48:5
22Hi kukholwa Josefa na a hi kusuhani ni kufa, i lo wulawula hi kuhuma ka vanana va ka Israeli, a va lelela hi marambu yakwe. Gen. 50:24
23Hi kukholwa Mosi na a belekilwe, i lo fihlwa tihweti tinharu hi vabeleki vakwe, hakuva va lo wona lezaku i nwanana a sasekileko; a va chavangi nchumu hi kulaya ka hosi. Ekso. 1:16; 2:2
24Hi kukholwa Mosi loku a kulile, i lo ala ku vitanwa aku i nʼwana nwaFaro; Ekso. 2:10
25a ti hlawutela a kuva a xaniswa Zinwe ni vanhu va Nungungulu, ku hunza kuva ni litsako la kuonha ka xikhatanyana. Tis. 84:10
26I lo alakanya lezaku a kurukwa ka Kristu i pfuno wa hombe ku hunza a kufuma ka le Gipite; hakuva i wa langutela a nchachazelo.
27Hi kukholwa i lo suka le Gipite, na a nga chavi a zanga ya hosi; hakuva i lo timisela aku khwatsi hi loku a mu wona loyi a nga woniwiko. Ekso. 10:28
28Hi kukholwa i lo yimisa a pasika ni ku nwatsekelwa hi nkhata, lezaku kasi a mudayi wa matewula a nga henyi ya vaIsraeli. Ekso. 12:21
29Hi kukholwa va lo tsemakanya a Bimbi go Pswhuka kota lomu misaveni yi womileko; kanilezi laha a vaGipite va nga ringa ku maha lezo va lo mhemba. Ekso. 14:22
30Hi kukholwa ku lowa a ligingisi la Jeriko, anzhako ka kuva na va li renzelekele a ntlhanu wa masiku ni mambiri. Jox. 6:20
31Hi kukholwa Rahabi a xibhayi a nga fangi zinwe ni lava va nga ingisangiko, hilezi a nga amukela a tihloli hi kurula. Jox. 6:23
32Xana nza ha ta wula yini kambe ke? Hakuva a xikhati a xi nzi eneli a kuva nzi hlawutela ha Gideoni, na Baraki, na Samsoni, na Jefta, na Davida, na Samueli ni vaprofeti; Vala. 6:11; 4:6; 11:1; 13:24; 1 Sam. 1:20; 16:1
33lava va nga hlula matiko hi kukholwa, va lamula hi kululama, va kuma lezi va tsumbisilweko zona, va vala milomu ya tinghala, Dan. 6:22
34va lo tima a ntamu wa nzilo, va pona a wutlha ga supado, na va hi ni gome va lo nyikwa ntamu, va maha tinhenha kulweni, va panzanya a tiyimpi ta valala. 1 Sam. 14:13; 2 Tih. 6:16; Dan. 3:25
35A vavasati vanwani va lo tlheliselwa a vafileko vabye hi kuvuxwa hi ka vafileko; a vanwani va lo xaniswa nguvu, va nga vumeli ku hlangutwa, lezaku kasi va fela ku kuma a kuvuka ku nene. 1 Tih. 17:22; Miti. 22:25
36Vanwani va lo ringwa hi kutseketselwa ni kubiwa; ina, va bohiwa ni ku valelwa paxweni. Jer. 20:2
37Va lo gandliwa hi maribye, va sahiwa hi tisaruti, va ringwa, va dawa hi supado; va lo nzulanzula na va ambele a mabhebhe ya tiyivu ni timbuti; va lo pswhelekelwa, va xaniseka, ni ku khomiwa hi kubiha, 1 Tih. 21:13; 2 Tih. 1:8
38lava a tiko gi nga kala gi nga va fanelangi, va lo nzulanzula lomu xiwuleni, ni le zitsungeni ni lomu mikovotlweni ni minkeleni ya lomu misaveni. 1 Tih. 18:4
39Hambu lezi vona vontlhe va nga mahelwa wukustumunyu hi kota ya kukholwa kabye, a va amukelangi lezi va tsumbisilweko zona,
40hakuva Nungungulu i hi longiselele a xilo xi nene xe hunzeleta, lezaku a va na ku mbheleliswa na hina hi nga hi kona.
Currently Selected:
Maheberu 11: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
