Guti 8
8
Dzithomba nya guti
1Guti gu ngu thawuludza tshivba yaye gukhugela mahegiso kala mambe mahegiso nya mafu,
gu ngu fumela silo satshavbo khu ndruda.
2Gukhugela wudzahani gwangu, eni nyi gode guti, nyi gu vbwetedzela;
gambe nyi gu dzegide gasi gu khala mwangadzi wangu,
nyi dzi ghanyiside ga silo saye nya gutsakise.
3Ugo gu ngu yeyedza wudhumo nya tumbunugo waye
wulongoni ga Nungungulu,
kholu Pfhumu Nungungulu, mune nya silo satshavbo, a gu gode.
4 # Wona gambe: Mav 8:27-31. Guti ga gu manega misihaloni nya wugengeli wa Nungungulu,
khugo gu hathidego mithumo Yaye.
5Ha gukhethu wufumu gilo gi fanedego gu godwa guvbanyani gwathu,
ginani gi fumidego ngudzu guvbindra guti gu gimbidzisago silo satshavbo?
6A gu bani ari wugengeli nya muthu wu thumago,
khu mani nya wadi guvbindra guti, a gu meseri nya sivangwa satshavbo?
7 # Wona gambe: Mav 8:27-31. Muthu a gu gola gululama, a ngu ningwa dzindruda a gu mihandro nya guti.
Ugo gu ngu hevbudza gudzipimela ni wugengeli,
wululamo ni tshivba, a gu siningwa nya lisima guvbanyani nya muthu.
8Muthu a gu gola gu mana wugengeli nya guete guvbanyani,#8:8 Wugengeli nya guete guvbanyani gu thudwa guti hi gu manago khu guvbanya, ni guti tumbunugo, ni gu khedzisela gwadi mavbanyelo ni makhalelo nya vathu. Wugengeli hi wu manago khu guti, wu ngu hi dzumedzisa gu pima iso si vbindridego, iso si guromo olu ni esi si nga gutago. Guti gogo gwa gu vbanya gumogo ni Nungungulu.
uwo khuwo wutigo iso si vbindridego ni gu wona iso si nga gutago;
gu ngu kodza gu tshamusela mavingu ni gu lamula mahungu nya gugaradze,
gu ngu wona na si ngari hwindzo esi si na dugelelago, gu si pima; gu nguti sikombiso ni siliwugiso
ni iso si na giregago mahegiso nya mimelana ni sikhati.
Gu dzi khusedza ga muthu a manago guti
9Khidzo kharato, nyi pimisidego gu dzega guti gu khala mubangaladzi nya guvbanye gwangu,
khu gu dziti gukheni ugo gu na khala singalagadzi wangu,
ni mutangadzisi wangu gusayisegani ni sigaradzoni.
10Khu kotani nya guti, nyi na mana wuzundzo vbakari nya gidzemo,
ambari nyi ngarigu lidzaha, nyi na ningwa githawo khu madhota.
11Gikhati nyi pilago mahungu nya gukari phathani nya madhota, va na wona gukhavo nyi ngu lamula khu mapimo nya gululame,
nyi na samadwa khu vafumeli.#8:11 Khu kotani nya guti a ningidwego khu Nungungulu, Solomoni a gu manega na gu vbindra vafumeli ni vathu vatshavbo khu gu kodza gu ganela, khu lisine nya gulamule gwaye. Wona: Job 29:7-11.21-23; Mav 22:20-21; Muh 5:1; Sirk 19:16.20; 1 Dzipf 3:28.
12Nya gu degula, va na lindrela gukhavo nyi ganele;
nya gu ganela, va na riya ndzeve va yingisa gwadi;
Nya gu laphisa guganela, vatshavbo va na tala khu guliwuga.
13Khu kotani nya guti, kha nyi na ngafa,
nyi na tshiya gialakanyiso nya gupindruge ga situgulwana sangu.
14Nyi na fumela vathu,
ni mayigo ma na vegwa vbavbatshi gwangu.
15Dzindruna nya dzihanyi dzi na thava dza gupwa na gu ganedwa khu eni;
nyi na khala mufumeli nya wadi ga vathu vangu, ni mufumeli nya tshivba ni gutiya nyimbini.
16Gikhati nyi wuyago ndrangani gwangu,
nyi na hefemula vbafuvbi gwaye, kholu mabhulo yaye ma mwalo gukhuvegisa,
ambari guvbanya gwaye gu mwalo wukanganyisi, aholu satshavbo gutsaka ni gunengela basi.
17Na nyi gu dzi wuyisela nyabune ga mipimiso yeyi,
na nyi gu pimisela monyoni gwangu, nyi tugude, gukheni: Guhunga wulongo ni guti gu ngu ninga gumbafa;
18gambe gugira wupari ni ugo, gu ngupwisa gunengela nya guvbelele;
ga mithumo ya mandza yaye yomo thomba nyamba vbela;
hi ngu mana wugengeli ha gu dzi ninga gikhati hi bhula nago;
hi ngu ningwa githawo ha gu bangaladzwa khugo; khu kharato, nyi gimbide nyi gu vbweta gasi gu khala mubangaladzi wangu.
19Eni nyi diri lidzaha nya mavbanyelo nya yadi; nyi di hakhide monyo nya wadi ngudzu.
20Khu mambe maregerelo,
kha nga nyi nga bani nyiri wadi, nyi bede givilini nya guvbelele nyamba solega;
21aholu, khu gu dziti gukheni kha gu kodzegi gu mana guti nyamba ningwa khu Nungungulu,
gambe a diri wugengeli guti gukheni gya guta khu hayi giningwa gyogyo,
nyi di hidzimela ga Pfhumu Nungungulu,
nyi ya lombelela khu monyo wangu watshavbo, kheni:
Currently Selected:
Guti 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.