Dzindzimo 145
145
Ndzimo nya guzundze Nungungulu
Ndzimo ya Dhavhidhe
1Nyi na gu dhumisa uwe, Nungungulu Pfhumu yangu;
nyi ngu gu bonga kala gupindruga.
2Nyi na gu bonga matshigu yatshavbo;
nyi rungudza lina lago kala gupindruga.
3 Pfhumu Nungungulu khongolo, a na ni fanelo nya guzundzwe;
wugulu waye kha wu kodzwi gu pimwa.
4Mimela ni mimelana yi na embeledzelana mithumo yago,
vatshavbo va na huwelela sigiro sago nya tshivba.
5Avo va na ganela khu wudhumo ni wugulu wago,
eni nyi na embelela nyi pwadza siliwugiso sago.
6Gu na ganedwa khu mithumo yago nya tshivba nya guthavise,
eni nyi na ganela khu wugulu wago.
7Avo va na alakanya wuhindzi wago nya wukhongolo,
khu dzindzimo va na ganela khavo, u lulamide.
8 Pfhumu Nungungulu khwadi, tade khu wuhindzi,
a ngu timisela, a na ni wuhindzi nya wukhongolo.
9 Pfhumu Nungungulu khwadi ga vathu vatshavbo;
wuhindzi waye wukhongolo guvbindra satshavbo a giridego.
10Sivangwa satshavbo si na gu rungudze, Pfhumu Nungungulu;
va na gu dhumise vatshavbo va khodwago gwago!
11Va na ganela khu wudhumo nya wufumu wago,
va huwelela mithumo yago nya tshivba,
12va na tivise ga sanana nya vathu, mithumo yago nya yikhongolo,
ni wugulu nya mufumo wago.
13Mufumo wago wu ngu simama kala gupindruga,
Uwe u na fumela mimela ni mimelana yatshavbo,
Pfhumu Nungungulu tumbegide gikhati gyatshavbo,
a gu gira mithumo yaye yatshavbo khu lihaladzo.
14 Pfhumu Nungungulu a ngu tiyisela avo va kanakanago,
a gu wusa avo va rerekago va thega.
15Maho nya sivangwa satshavbo, ma gu khedzisela uwe
gu si ninga guhodza gwawe khu gikhati gi fanedego.
16U ngu thawuludza mandza yago nya wuhindzi,
U khurisa sivangwa satshavbo nya guvbanye.
17 Pfhumu Nungungulu lulamide ga dzatshavbo dzindzila dzaye,
a na ni wuhindzi mithumoni yaye yatshavbo.
18 Pfhumu Nungungulu womo vbafuvbi ni vatshavbo va mu ranago,
ni ga vatshavbo va mu lombago khu lisine.
19Uye a gu ninga esi va si vbwetago avo va mu thavago;
a ngu va yingisa va gu mu lomba giphaso, a va vbanyisa.
20 Pfhumu Nungungulu a ngu vhikela vatshavbo va mu golago:
Aholu vatshavbo va nya guvivbedwa khu monyo va na mbembiswa.
21Nyi na rungudza Pfhumu Nungungulu gikhati gyatshavbo,
sivangwa satshavbo si vbanyago
si na dhumise lina laye nya guage
kala gupindruga.
Currently Selected:
Dzindzimo 145: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
