Dzindzimo 119
119
Ndzimo nya gu dhumise Nayo wa Nungungulu
Alef
1Va kategide vale va gimbilago khu ndzila nya gululame,
avo va landrisago milayo ya Pfhumu Nungungulu.
2Va kategide avo va girago guhaladza gwaye,
avo va mu vbwetago khu monyo wawe watshavbo.
3Avo va thavago gu gira esi nya guvivbe,
aholu va gimbilago ndzilani gwaye.
4Uwe u vegide milayo yago,
gasi hi mi sayisa gwadi.
5Nya gu gola ngudzu gutiya ndzilani nya gutumbege,
na nyi gu landrisa milayo yago.
6Gima kha nyi na nga khala dzitshoni,
nya gu thela kota sileletelo sago.
7Nyi na gu bonga khu monyo wu agidego,
avbo nyi na hevbulago milayo yago nya gululame.
8Nyi na sayisa sileletelo sago;
u nga nyi digeli muphelo.
Bet
9Lidzaha li na dzi khodza karini
gu agisa mavbanyelo yaye?
Khu gu vegisa basi mahungu yago.
10Eni nya gu gu vbweta khu monyo wangu watshavbo,
U nga nyi digi nyi penga, nyi hambana ni sileletelo sago.
11Nyi ngu vegisa monyoni gwangu mahungu yago,
gasi nyi si gu ghoheli.
12U na rungudzwe uwe Pfhumu Nungungulu!
Nyi hevbudze guti milayo yago!
13Nyi ngu sawutela khu likana langu
silayelo satshavbo esi u nyi embedego.
14Nya gu tsaka khu ndzila nya wufakazi wago,
guvbindra gu mana dzithomba dzatshavbo.
15Nyi na alakanyela sileletelo sago satshavbo
nyi ninga githawo dzindzila dzago.
16Nyi na tsakela sirumo sago;
nyi si divali mahungu yago.
Guimel
17Girela nya sadi eni githumi gyago,
nyi fela gu vbanya nyi landrisa mahungu yago.
18Tula maho yangu,
gasi nyi wone siliwugiso nya nayo wago.
19Nyi muvbindri nya ndzila ga eli litigo,
U nga nyi siheli milayo yago.
20Hefemulo wangu wu ngu vbela tshivba
khu gu vbweta guti milayo yago.
21U ngu kawuka va nya matshandza,
va dzi girelago libango khu gu ndraga milayo yago.
22Nyi vbulugise gu vadwa ni gu nyenywa khavo,
kholu eni nyi ngu landrisa milayo yago.
23Ambari vafumeli va gu nyi lemba,
githumi gyago gi na alakanyela sileletelo sago.
24Nyi ngu nengela ngudzu khu milayo yago;
khiyo yi nyi ningago wusingalagadzi.
Dalet
25Nyi vbede tshivba nyi thega vbavbatshi;
wusedza gambe tshivba yangu kha nga gitumbiso gyago.
26Nyi gu dawulede guvbanya gwangu gwatshavbo,
Uwe U nyi hakhide,
nyi hevbudze guti milayo yago.
27Nyi phase gupwisisa milayo yago,
gasi nyi kodza gu alakanyela mithumo yago
nya gusamadzise.
28Hefemulo wangu wu ngu lila marongo nya wuvi;
nyi tiyise kha nga gitumbiso gyago.
29Nyi hambanise ni ndzila nya malipha,
khu wuwadi wago nyi hevbudze guti nayo wago.
30Nyi hathide gu tiyisela ndzilani nya lisine,
nyi sambanyide gu landrisa sileletelo sago.
31Nyi ngu namarela milayo yago, Pfhumu Nungungulu,
U nga dzumedzisi gukhuwe nyi thedwa dzitshoni.
32Nyi na dzi garadza khu gu landra ndzila nya milayo yago,
kholu yi ngu tadza khu gunengela.
He
33 Pfhumu Nungungulu, nyi hevbudze guti ndzila nya sileletelo sago,
gasi nyi si landrisa kala mahegiso.
34Nyi ninge mapimo, gasi nyi vegisa gwadi nayo wago,
nyi na wu landrisa khu monyo wangu watshavbo.
35Nyi gimbidzise khu ndzila nya sileletelo sago,
kholu khiso si nyi tsakisago.
36Gira monyo wangu wu gola ngudzu milayo yago
gasi nyi si beli manaveloni.
37Ndreyisa maho yangu gasi nyi si woni silo si si phasigo,
nyi tiyise ndzilani gwago.
38Tiyisa ga eni githumi gyago gitumbiso gyago,
u nga girago ni avo va gu ningago githawo.
39Ndreyisela hwindzo givalo nyi gi thavago,
kholu gulamula gwago gululamide.
40Wona, eni nyi ngu gola ngudzu milayo yago;
nyi tiyise khu gululama gwago.
Vau
41 Pfhumu Nungungulu, wuhindzi wago wu nate avbo gwangu,
U nyi vbanyisa kha nga gitumbiso gyago.
42Kharati, nyi na kodza gu ninga phindrulo avo va nyi valago;
kholu nyi ngu tumba magana yago.
43U nga dzumedzisi gu ndreyiswa gambe
khu kanani magana nya lisine,
kholu nyi ngu tumba sileletelo sago.
44Nyi na simama gu landrisa nayo wago,
kala gupindruga ni gupindruga.
45Nyi na vbanya na nyi tshulegide,
kholu nyi landriside sileletelo sago.
46Nyi na huwelela gambe sileletelo sago
mbeli ga vafumeli,
gima kha nyi na khala dzitshoni.
47Nyi na nengedziswa khu milayo yago kholu nyi ngu mi gola.
48Nyi na khusedza mandza yangu ga sileletelo sago nyi si golago;
nyi na alakanyela sileletelo sago.
Zain
49Dundruga gitumbiso u giridego ni githumi gyago,
a gu magana ma nyi ningidego gutumba.
50Iso si nyi tangadzisago wuvini gwangu khesi:
Khu magana yago ma nyi ningago guvbanya.
51Va nya matshandza va gu nyi hega gikhati gyatshavbo,
aholu eni kha nyi hambani ni nayo wago.
52 Pfhumu Nungungulu, nyi ngu alakanya sileletelo sago sa gale,
nyi na mana gu tangadziswa.
53Nya gu pwiswa wuvi nya wukhongolo khu va nya guvivbe,
kholu kha va theli kota khu nayo wago.
54Milayo yago yi ngu nyi gira nyi thula dzindzimo,
ndzilani nya liendro langu.
55 Pfhumu Nungungulu, nyi ngu alakanya lina lago,
vbakari nya wutshigu nya gu landrisa nayo wago.
56Satshavbo sesi si ngu kodzega;
kholu nyi ngu sayisa sileletelo sago.
Heti
57 Pfhumu Nungungulu khuye thomba yangu;
nyi tumbiside gu landrisa magana yago.
58Nyi ngu gu lomba khu monyo wangu watshavbo;
nyi pwele wusiwana, kha nga gitumbiso gyago.
59Nyi khade nyi alakanyela mavbanyelo yangu,
nyi vbindrugedzide nyi landrisa milayo yago.
60Nyi ngu vbiredza kha nyi hweli,
gu landrisa sileletelo sago.
61Va nya guvivba va nyi randrede ni mazinga yawe,
aholu, eni gima kha nyi na divala nayo wago.
62Nyi na wuga vbakari nya wutshigu nyi gu rungudza,
khu kotani nya gulamule gwago gu lulamidego.
63Eni nyi pari ya vatshavbo va gu ningago githawo,
ni ya vale va landrisago sileletelo sago.
64 Pfhumu Nungungulu, litigo li tade khu wuhindzi wago;
nyi hevbudze sileletelo sago.
Tet
65 Pfhumu Nungungulu, u nyi pharide gwadi eni githumi gyago,
kha nga gutumbisa gwago.
66Nyi hevbudze gwadi nayo nya wadi ni mapimo,
kholu nyi ngu khodwa ga milayo yago.
67Nyi pengide ngudzu nu si gu nyi tsayisi,
olu nyi ngu vegisa magana yago.
68Uwe U wadi u ngu gira nya sadi,
nyi hevbudze gupima sileletelo sago.
69Va nya matshandza va gu nyi singedza malipha,
aholu eni nyi ngu vegisa milayo yago
khu monyo wangu watshavbo.
70Myonyo yawe yi bangide, gambe kha vapwi gilo,
aholu eni nya gu tsakela ngudzu nayo wago.
71Gutshaniseka gwangu gu nyi phaside,
kholu nyi hevbude guti milayo yago.
72Nayo wu dugago khu kanani gwago, wu na ni giphaso ngudzu,
guvbindra mazana ni mazana nya ndralama ni parata.
Yod
73Uwe U nyi wumbide U nyi tiyisa khu mandza yago;
nyi hevbudze guti milayo yago.
74Va gu nyi wona va na nengela avo va gu ningago githawo,
kholu eni nyi ngu tumba magana yago.
75 Pfhumu Nungungulu, nyi ngu dziti gwadi
gukheni gulamula gwago
gu lulamide,
khwa hosisa olu U nga nyi tsayisa.
76Lihaladzo lago li na nyi tangadzise,
kha nga U tumbisidego ga eni githumi gyago.
77Nyi tshisele makategwa yago, nyi na vbanya;
kholu nayo wago wu ngu nyi nengedzisa.
78Va na tale khu dzitshoni va nya matshandza,
va nyi tshanisago nyambana nandru,
gasi eni nyi na alakanyela sileletelo sago.
79Va na wuye gwangu avo va gu ningago githawo,
avo va wutigo nayo wago.
80Monyo wangu wu na vbelele khu gu landrisa sileletelo sago,
gasi nyi si thedwi dzitshoni.
Caf
81Hefemulo wangu wa gu khedzisela guvbanyisa gwago;
kholu eni nyi ngu tumba magana yago.
82Maho yangu ma garade khu gu khedzisela
gu tadzisega nya gitumbiso gyago,
na nyi gu wudzisa, kheni: “Lini U na tago U ta nyi tangadzisa?”
83Nyi gumbide kha nga lidowo li divadwego githathini,
aholu kha nyi divali sileletelo sago.
84Khu wevbi tengo nya matshigu ya githumi gyago?
Lini U nata nyi lamulago ni avo va nyi tshanisago?
85Va nya matshandza va si theligo kota khu nayo wago,
va nyi kembede liphala.
86Milayo yago yatshavbo yi tumbegide;
nyi phase ga avo va nyi tshanisago mahala.
87Vbadugwana basi va di vbweta gu nyi fuvisa mafuni;
aholu eni kha nyi digi gu landrisa sileletelo sago.
88Khu wuhindzi wago nyi vbanyise,
gasi nyi landrisa milayo nya guduge khu kanani gwago.
Lamed
89Uwe Pfhumu Nungungulu,
mahungu yago ma tiyisidwe
ndzadzini kala gupindruga.
90Gutumbega gwago gu ngu thaphela ga mimela ni mimelana;
u wumbide litigo u li tiyisa wulanga waye.
91Na muhuno satshavbo si ngu simama gukhedza khu guruma gwago,
kholu silo satshavbo sa gu thumela uwe.
92Nasiri olu nyi tsakiswago khu nayo wago,
na nyi fude gale gusanisekani gwangu.
93Gima kha nyi na divala sileletelo sago,
kholu u ngu nyi vbanyisa khiso.
94Nyi vbanyise, kholu eni nyi wago,
nyi ngu landrisa sileletelo sago.
95Va nya guvivba va gu zama gu nyi fuvisa,
gasi eni nya gu alakanyela milayo yago.
96Nyi wonide nya gukheni silo satshavbo si na ni mahegiso;
aholu sileletelo sago si mwalo mahegiso.
Mem
97Oh! Idzo nyi wu golago khidzo nayo wago!
Litshigu latshavbo nya gu alakanya uwo.
98Sirumo sago si ngu nyi bangaladza gikhati gyatshavbo,
si ngu nyi ninga guti guvbindra valala vangu.
99Nyi ngu pimisa gwadi guvbindra vahevbudzi vangu,
kholu nyi ngu alakanyela sileletelo sago.
100Nyi nguti guvbindra madhota,
kholu nyi ngu vegisa sileletelo sago.
101Nyi ngu ndreya ga dzindzila dzatshavbo nya guvivbe,
gasi gu vegedza magana yago.
102Kha nyi hambani ni sileletelo sago,
kholu uwe u ngu nyi hevbudza.
103Idzo ma tshambago khidzo mahungu yago kanani gwangu!
Ma gu lombela ngudzu guvbindra wulombe.
104Khu kotani nya sileletelo sago, nyi khade muthu nya mapimo;
khu guralo, nyi ngu nyenya dzindzila dzatshavbo nya malipha.
Nuni
105Magana yago kandriya nya migondro yangu,
ni wenengedzo nya dzindzila dzangu.
106Nyi sambanyide nyi tiyisa
gukheni nyi na vegedza milayo yago nya gululame.
107Nyi womo gutshanisekani nya gukhongolo;
Pfhumu Nungungulu, nyi vbanyise kha nga gutumbisa gwago.
108Hakha Pfhumu Nungungulu nombelo wangu nya gubonge uwe,
nyi hevbudze milayo yago.
109Womi wangu womo mhangoni nya gufe,
aholu, kha nyi divali nayo wago.
110Va nya guvivba va nyi riyede naphwi,
aholu gima kha nyi hambani ni sileletelo sago.
111Milayo yago yi khade thomba yangu kala gupindruga,
kholu yi ngu tsakisa monyo wangu.
112Monyo wangu wu dzi vegisede gu landrisa sileletelo sago,
gikhati gyatshavbo kala gufa.
Samec
113Nyi ngu vengana ni wukanganyisi
aholu nyi gola nayo wago.
114Uwe u wuthavelo ni gitshangu gyangu,
eni nya gu tumba magana yago.
115Leyani hwindzo gwangu enu va nya guvivba,
gasi nyi sayisa sileletelo sa Nungungulu wangu.
116Nyi seketele khu gitumbiso gyago nyi na vbanya,
u nga nyi digi nyi thedwa dzitshoni kholu, nyi tumbide uwe.
117Nyi phase gasi nyi mana guvbanya,
nyi na vegisa sileletelo sago gikhati gyatshavbo.
118U ngu nyenya vatshavbo avo va hambanago ni sileletelo sago,
kholu maalakanyo yawe khya wukanganyisi.
119Va nya guvivba vatshavbo va tigoni wa gu va wona nari ndzilo,
Khu guralo, eni nyi ngu gola sileletelo sago.
120Mili wangu wu ngu ndrendremela mbeli gwago khu gu gu thava,
khu kotani nya guthave milayo yago.
Ain
121Nyi sayiside nayo ni gululama,
u nga nyi digi nyi thegela mandzani ga valala vangu.
122Nyi phare khu mandza mavili eni githumi gyago,
u nga digi va nya matshandza va nyi tshanisa.
123Maho yangu ma ngu vbisa khu gu khevisela guvbanyisa gwago,
na nyi gu lirela guvbanyiswa kha nga u nyi tumbisidego.
124Sayisa eni githumi gyago khu lihaladzo lago,
nyi hevbudze milayo yago.
125Eni nyi githumi gyago, nyi ninge mapimo,
gasi nyi pima sileletelo sago.
126 Pfhumu Nungungulu, olu gikhati gyago nya guphodze,
kholu avo va hambanide ni nayo wago.
127Nya gu gola ngudzu milayo yago,
guvbindra ndralama nya gukhedzige ngudzu.
128Khu guralo, nyi ngu wona gukheni sileletelo sago si lulamide,
nyi ngu vengana ni dzindzila dzatshavbo nya malipha.
Phe
129Sileletelo sago si ngu samadzisa,
khu guralo, nyi ngu si vegisa khu monyo wangu watshavbo.
130Tshamuselo nya mahungu yago wu ngu tula maho,
wu ngu ninga gupima va nya gusolega.
131Nya gu tula likana na nyi havbide,
kholu nyi na ni ndzala nya milayo yago.
132Nyi khedze u nyi pwela wusiwana,
kha nga idzo u girago ga vale va golago lina lago.
133Tiyisa migondro yangu ndzilani nya mahungu yago,
u nga nyi digi nyi fumwa khu guvivba.
134Nyi vbulugise gusaniswa khu vathu,
nyi na kodza gu vegedza sileletelo sago.
135Wenengedza githumi gyago khu gungangamela nya khovbe yago,
nyi hevbudze milayo yago.
136Marongo ma gu goga kha nga tsongo khu mahoni gwangu,
kholu vathu kha va sayisi milayo yago.
Tsadh
137 Pfhumu Nungungulu uwe u lulamide,
ni gulamula gwago khwa lisine.
138U hi ningide sileletelo sago khu gululama,
ni gutumbega nya gukhongolo.
139Nyi ngupwa wuvi ngudzu,
kholu valala vangu kha va theli kota khu mahungu yago.
140Magana yago ma tiyisidwe gwadi,
khu guralo, githumi gyago gi ngu ma gola.
141Nyi muthu nya nyalidede ni gusolega,
aholu, kha nyi divali sileletelo sago.
142Gululama gwago gu vbelede kala gupindruga,
ni nayo wago wu tiyide lisineni.
143Nyi ngu ganwa khu wuvi ni sigaradzo,
aholu nyi ngu tangadziswa khu sileletelo sago.
144Sileletelo sago si lulamide kala gupindruga,
nyi ninge gu si pima, nyi na vbanya.
Qof
145 Pfhumu Nungungulu, nyi ngu gu rana khu monyo wangu watshavbo;
nyi yingise, nyi kodza gu vegisa milayo yago.
146Nyi ngu lomba gwago, nyi vbanyise,
nyi na sayisa sileletelo sago.
147Wu si gu khugi Wuronga, eni nyi ngu phindrula nyi gu rana,
nyi ngu tumba magana yago.
148Nya gu pilekelana wutshigu watshavbo nyamba lala,
na nyi gu alakanyela gitumbiso gyago.
149 Pfhumu Nungungulu yingisa lito langu,
khu wuhindzi wago,
nyi vbanyise kha nga gitumbiso gyago.
150Nyi vbohedwe khu vasanisi vangu va gu ni makungo nya guvivbe,
avo va gu hambana ni nayo wago.
151Uwe Pfhumu Nungungulu, u womo vbafuvbi ngudzu,
milayo yago yatshavbo yi tiyide.
152Gale nyi na sitide sileletelo sago,
gukheni khuwe u si tiyisidego kala gupindruga.
Resh
153Wona gusaniseka gwangu, u nyi vbanyisa,
kholu kha nyi divali nayo wago.
154Vhikela mahungu yangu u nyi tshula,
nyi vbanyise kha nga gutumbisa gwago.
155Guvbanyisa gomo hwindzo ga va nya guvivba,
kholu kha va khathaleli milayo yago.
156 Pfhumu Nungungulu, wuhindzi wago wu khongolo;
nyi vbanyise khu ndzila nya situmbiso sago.
157Vangi vasanisi ni valala vangu,
aholu kha nyi hambani ni milayo yago.
158Nya gu wona vakanganyisi nya gu saniseka ngudzu,
kholu, kha va vegisi magana yago.
159Wona idzo nyi golago khidzo sileletelo sago,
uwe Pfhumu Nungungulu, nyi vbanyise khu wuwadi wago.
160Gukhugela guhegulani mahungu yago ma tiyide ma na ni lisine,
sileletelo sago satshavbo si ngu simama kala gupindruga.
Sine
161Vathangeli nya litigo va gu nyi sanisa nyambana nandru,
aholu monyoni gwangu nyi ngu thava mahungu yago.
162Nyi ngu nengela khu gitumbiso gyago,
kha nga muthu a manago thomba nya gutale.
163Nyi ngu venga ni gu nyenya malipha,
aholu nyi ngu gola ngudzu nayo wago.
164Eni nyi ngu gu rungudza livbandre na dzimbili dzinyondro khu litshigu,
khu kotani nya gulamule gwago gu lulamidego.
165Avo va golago nayo wago va gu vbanya gurulani nya gukhongolo;
gimwalo gi va khunguvanyisago.
166 Pfhumu Nungungulu, eni nyi ngu lirela guvbanyisa gwago,
nyi ngu sayisa sirumo sago.
167Hefemulo wangu wu ngu landrisa sileletelo sago;
kholu nyi ngu si gola ngudzu guvbindrisa.
168Nyi ngu landrisa milayo ni sileletelo sago,
kholu dzindzila dzangu dzatshavbo dzomo mbeli gwago.
Tau
169 Pfhumu Nungungulu, gulila gwangu gu na vbohe iyo gwago,
nyivbe gupimisa kha nga gutumbisa gwago.
170Wu na vbohe iyo gwago nombelo wangu;
nyi vbanyise kha nga u nyi tumbisidego.
171Nyi na embelela ndzimo nya gu gurungudze,
kholu u nyi hevbudzide guti sileletelo sago.
172Nyi na huwelela nayo wago,
kholu sileletelo sago satshavbo si lulamide.
173Delu khu guvbiredza u ta nyi phasa,
kholu eni nyi hathide gu landrisa sileletelo sago.
174 Pfhumu Nungungulu, eni nyi ngu lilela gu vbanyiswa khu uwe,
nayo wago wu ngu tsakisa ngudzu monyo wangu.
175Nyi ninge guvbanya gasi nyi kodza gu gudhumisa,
sileletelo sago si na nyi phasedzele.
176Nyi ngu legalega kha nga nvuta yi pengago;
vbweta githumi gyago,
kholu kha nyi divali sirumo sago.
Currently Selected:
Dzindzimo 119: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
