Dhewuteronome 33
33
Gikategiso gya Mosi
(Genesi 27:1-29; 49:1-27)
1Egi khu gikategiso Mosi, muthu wa Nungungulu, a ningidego sanana sa Israyeli, na si gufi.
2Khu guralo, a di ganela, khuye:
Pfhumu Nungungulu dzude khu Sinayi,
a dzi wonegiside gwawe khu Seyiri,
a ngangamela gukhugela gigomoni ga Parani;
a dita ni gidzemo nya likhumi magumi mazana (10.000) va nya guaga,
khu nyamudye gwaye,
wu di romo nilo nya Nayo wu lumbago avo.
3Khu lisine, Uwe U ngu gola vathu;
va nya guaga vago vatshavbo, vomo mandzani gwago;
va khala migondroni gwago,
va hevbula nayo wago.
4Mosi a hi ningide nayo,
gasi wu khala thomba nya tshangano wa Jakobe.
5Gu manegide mufumeli wa Jesurumi,
avbo va nga tshanganago vathangeli
nya mahundzu ya Israyeli.
6A na vbanye Rubheni, a ngafi,
vathu vaye va na engedzelane!
7Avbo a nga bani na gu kategisa Judha a di khuye:
Uwe Pfhumu Nungungulu yingisa lito la Judha,
U li vbohisa vbakari ga vathu vaye;
mandza yago, ma na mu dwanele,
Uwe khala muphasedzeli U mu tshudzisa
ga valala vaye!
8Ga Levhi, a di khuye: Uwe Nungungulu,
ningela Tumimi yago ni Hurimi yago,#33:8 Tumimi ni Hurimi: Dzisolo dzi thumiswago gasi guti gugola ga Nungungulu. Wona gambe: Eks 28:30.
ga muthu nya gutumbege,
U mu lingidego wulangani wa Masaha#33:8 Masaha: gu tshamusela gupwani gilingo. Wona gambe: Eks 17:7. u nga ganedzisana
naye matini ya Meribha;#33:8 Meribha: gu tshamusela gupwani gu ganedzisana. Wona gambe: Eks 17:7; Mit 20:13.
9wule U nga embelago babe ni mayi waye, khuwe:
Gima nyi si gu mi woni;
ni vandriyaye kha nga vati, uye a si khathaleligo
sanana saye,
kholu vegedzide magana yago
ni gu landrisa gidzumeledzwano gyago.
10U hevbudzide Jakobe gululama gwago
ni nayo wago va na Israyeli;
va di gu vegela libani dzithonvuni gwago,
ni miningelo nya guvbiswe, vbagiluvelotunu gwago.
11Kategisa tshivba yaye, Uwe Pfhumu Nungungulu
dzumela gu hakha thumo nya mandza yaye,
pila hwambo wa valala vaye, ni wa avo va
mu vengago,
gasi va si mu wugeli gambe.
12Na gu thula Bhejami a di ganela, khuye:
Gigodwa gya Pfhumu Nungungulu,
gi na khala gurulani gumogo naye;
Pfhumu Nungungulu a na mu hetedza kala gupindruga,
uye a na hefemula magatani gwago.
13Khu Josefe a di khuye: Litigo laye li na kategiswe
khu Pfhumu Nungungulu,
khesi nya gumbure si tago khu ndzadzini
ni thondrwane,
niso si tago khu guetani,
14a na va ninge siningwa nya sadi si vidziswago
khu lidambo,
ni mihandro yi dugago khu dzinango dzaye;
15ni dzimbewu nya dzadi dzi dugelago sigomoni sa gale,
ni siningwa sa sigomwanani nya gupindruge;
16a na va ninge mafu nya gunone
ni sivangwa saye satshavbo
ni sikategiso sa uye a nga dzi wonegisa mugipoponi.
Makategwa yaya ma na khale hungoni ga Josefe, ni hungoni gwa wule a nga pambudwago ga vandriyaye.
17Uye mburide kha nga gyanana nya matiwula
gya mombe yaye!
Dzikeho dzaye dzi ni tshivba kha nga dzikeho
nya nyari;
a nga mbembisa khidzo mayigo yatshavbo, kala mahegiso
nya mafu:
A gu sidzemo nya mahundzu ya na Efrayimi,
mazanazana nya mahundzu ya na Manasi.
18Khu va na Zebhuloni, Mosi a di ganela, khuye:
“Uwe Zebhuloni, tsaka malendroni gwago ya phwani,
ni uwe Isakari, mitshatshani gwago!
19Avo va na tombanisa vathu gigomoni;
avbovbo va na ya ningela miphaso nya gululame,
kholu va na mana nya singi sa phwani
ni dzithomba dzi sihidwego mafuni.”
20Khu va na Gadhi, a di ganela, khuye:
“A na rungudzwe Wule a andrisidego litigo
la na Gadhi;
uye a lalago umo kha nga nghala nya ngadzi,
a vbadzulela mawogo ni gu pfarelela mihungo.
21A dzi hathede esi nya guhegule, si nga bani si sihidwe vbale,
esi si lumbago muthangeli.
Uye a di thanga mbeli ga vathu,
a landrisa kharati gugola ga Pfhumu Nungungulu,
gumogo ni gululama gwaye a giridego ga Israyeli!”
22Khu va na Dhani, a di ganela, khuye:
“Dhani ginghalana; gi na ndraga khu tigoni ga Bhasani.”
23Khu va na Nafitali, a di ganela, khuye:
“Nafitali a na hakha siningwa nya singi
sa Pfhumu Nungungulu,
gambe a na tala khu makategwa yaye,
a na mana litsiva ni gipandre gya Marandzi!”
24Khu va na Aseri, a di ganela, khuye:
“Aseri a na kategiswe vbakari ga sanana sa Jakobe,
a na nengedzise vandriyaye,
ngondro waye wu na nagane khu mafura.”
25Sikwinyaro sago si na manege nari sa simbi ni sugu,
gurula gwago gu na simame kha nga matshigu nya guvbanye wago.
26Mwalo mumbe nya gu fanane
ni Nungungulu wa Jesurumi,
uye atago a ta mu phasa, a tsemakanyago ndrengelenge
nya mapfhi!
27Nungungulu nya pindrugedwa, a na khale wuthavelo wago,
khu vbavbatshi gwago, a na thawuludze mandza
yaye nya gupindruge;
Uye tutumiside valala mbeli gwago a gu embela, khuye:
Va sasele.
28Khu guralo, Israyeli a na khala na tiyide,
ni nambo wa Jakobe wu na khadzisega,
tigoni nya tirigu ni vbinyu,
gu thegago thondrwane khu damboni.
29U kategide uwe Israyeli! Khu mani a fananago nago,
uwe u gu litigo u vbanyiswago khu Pfhumu Nungungulu!
A gu gitshangu gyago gi gu vhikelago,
ni litshari nya wugulu wago!
Valala vago va na khoziswa mbeli gwago,
aholu uwe u na gandredzela malanga yawe nya sigomo!
Currently Selected:
Dhewuteronome 33: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
