Mateo 5
5
Kushishqa kawanantsikpä Jesús yachatsinqan
Lucas 6.20-23
1Atskaq runakuna qorikaqta rikarmi jirkanman witsarkur Jesús jamakurqan. Puntanman discïpulunkuna qorikäyaptinmi 2yachatsir nirqan: 3<<Kushishqam kawayanqa Tayta Diosta nisitaqkuna. Paykunapämi Tayta Diospa mandakuynin.
4<<Kushishqam kawayanqa llakikur waqaqkuna. Paykunatam Tayta Dios shoqanqa.#Isa. 61.2.
5<<Kushishqam kawayanqa alli shonquyuqkuna. Paykunam herenciankuna kananpä mushuq patsata chaskiyanqa.#Sal. 37.11.
6<<Kushishqam kawayanqa mallaqaypanörä y yakunaypanörä Tayta Dios munanqannö kawayta munaqkuna.#Isa. 55.1-2. Paykunatam Tayta Dios yanapanqa.
7<<Kushishqam kawayanqa runa mayinta kuyapaqkuna. Paykunatam Tayta Dios kuyapanqa.
8<<Kushishqam kawayanqa limpiu shonquyuqkuna.#Sal. 24.4. Paykunam Tayta Diosta rikayanqa.
9<<Kushishqam kawayanqa runa mayinta amishtatsiqkuna. Paykunatam Tayta Dios <wamrämi kanki> ninqa.
10<<Kushishqam kawayanqa Tayta Dios munanqannö kawayanqanpita runakuna ñakatsiyaptin.#1Ped. 3.14. Paykunapämi Tayta Diospa mandakuynin.
11<<Kushishqam kawayanki noqaman criyiyanqaykipita runakuna ashlliyäshuptiki, ñakatsiyäshuptiki y llullakur imaykata tumpayäshuptiki.#1Ped. 4.14. 12Tsaynö kaptinpis kushikuyay. Qamkunataqa gloriachö maynam Tayta Dios premiuta shuyaykätsiyäshunki. Chikiyäshunqaykinöllam unay runakunapis Tayta Diospa profëtankunata chikiyarqan.#2Crón. 36.16; Hech. 7.52.
Kachinö y aktsinö kanqantsikta Jesús yachatsinqan
Marcos 9.50; Lucas 14.34-35
13<<Qamkunaqa kay patsachö kachinömi kayanki. Kachi qamlaskirqa manam imapäpis välinnatsu. Tsay kachita jitariptin pïmaypis jarunmi.
14<<Qamkunaqa kay patsachö aktsinömi kayanki.#Juan 8.12; 9.5. Alayrinninchö kaykaq markata pïmaypis rikayanqannömi imanö kawayanqaykitapis rikayäshunki. 15Manam pipis aktsita tsariskatsir cajón rurinman churantsu, sinöqa wayichö llapanta atsikyänanpämi alayriman churan.#Mar. 4.21; Luc. 8.16; 11.33. 16Tsaynölla qamkunapis runakuna rikayäshunaykipä tsakaychö atsikyaqnö allikunata rurayay. Tsaynö kawayanqaykita rikarmi ciëluchö kaykaq Papänikita alabayanqa.#1Ped. 2.12.
Moisés y profëtakuna qellqayanqankunata Jesús cumplinqan
17<<Ama yarpäyaytsu Moisés qellqanqan leykunata y profëtakuna qellqayanqankunata manakaqman churanäpä shamunqäta. Manam manakaqman churanäpätsu shamurqü, sinöqa paykuna qellqayanqankuna noqachö cumplinanpämi. 18Rasunpam nï: Ciëlupis kay patsapis manarä ushakaptinqa manam ni juk letrallapis Diospa leyninpita illakanqatsu. Tsay qellqayanqanqa llapanmi cumplinqa.#Luc. 16.17.
19<<Pipis kay mandamientukunata jukllayllatapis mana cäsur y wakin runakunatapis mana cäsukuyänanpä willarqa Tayta Diospa mandakuyninchö manam ima premiutapis chaskinqatsu. Llapan kay mandamientukunata cäsur y wakin runakunatapis cäsuyänanpä yachatsirmi sïqa Tayta Diospa mandakuyninchö premiuta chaskinqa. 20Noqam nï: Fariseukunapitapis y ley yachatsikuqkunapitapis mas alli mana kawarqa Tayta Diospa mandakuyninman manam yaykuyankitsu.
Runa mayintsikwan alli kawanantsikpä Jesús yachatsinqan
21<<Qamkuna musyayankim unay runakunata ninqanta: <Ama runa mayikita wanutsinkitsu. Wanutsiq kaqqa juzgashqam kanqa>.#Éxo. 20.13; Deut. 5.17. 22Peru noqam nï: Pipis runa mayinta rabyaparqa jutsayuqmi kanqa. Tsaynöllam runa mayinta ashllirqa juzgashqa kanqa. Runa mayinta manakaqman churarqa infiernuman qaykushqam kanqa.
23<<Tsaymi altarman ofrendaykikunata churayänaykipä kaykäyanqaykichö runa mayikiwan ajätsinakushqa kayanqaykita yarparqa 24altar lädunman ofrendaykikunata dëjaykur jinan höra ajätsinakuyanqaykiwan amishtayänaykipä aywayay. Tsaypita kutiskirrä Tayta Diospä ofrendaykita churayanki.
25<<Pipis demandayäshuptiki autoridäman manarä char ras arreglayay. Mana arreglayaptikiqa juezmanmi apatsiyäshunki. Jueznam wardiakunawan carcelman wichqatsiyäshunki. 26Rasunpam nï: Llapan jaqa kaynikikunata manarä pägarqa tsaypita manam yarquyankitsu.
Adulteriu jutsapita Jesús yachatsinqan
27<<Qamkuna musyayankim Moisés qellqanqanchö ninqanta: <Ama adulteriu jutsata rurankitsu>.#Éxo. 20.14; Deut. 5.18. 28Peru noqam nï: Juk warmita munaparqa maynam adulteriu jutsata ruraqnö kayanki.
29<<Tsaymi derëcha kaq ñawiki jutsata ruratsiyäshuptikiqa tsay ñawikita jipiskir jitariyay. Infiernuman qaykushqa kayänaykipa rantinqa mas allim kanman wiskullapis kayaptiki.#Mat. 18.9; Mar. 9.47. 30Derëcha kaq makiki jutsata ruratsiyäshuptikiqa tsay makikita roquskir jitariyay. Infiernuman qaykushqa kayänaykipa rantinqa mas allim kanman juk makiyuqllapis kayaptiki.#Mat. 18.8; Mar. 9.43.
Majanpita mana rakikänanpä Jesús yachatsinqan
Mateo 19.9; Marcos 10.11-12; Lucas 16.18
31<<Tsaynöllam Moisés qellqanqan leykunachö nin: <Pipis warminwan rakikarqa divorciu papelta firmapätsun>.#Deut. 24.1-4; Mat. 19.7; Mar. 10.4. 32Peru noqam nï: Mayqan runapis warmin jukwan mana kaykaptin juk warmiwan täkurqa jutsayuqmi kaykan warmin juk runawan tärar adulteriu jutsata rurananpä. Tsaynöllam runanpita rakikashqa warmiwan täraq runapis adulteriu jutsata ruraykan.#Mat. 19.9; Mar. 10.11-12; Luc. 16.18; 1Cor. 7.10-11.
Mana juranantsikpä Jesús yachatsinqan
33<<Tsaynöllam musyayanki unay runakunata ninqanta: <Mana cumpliyänaykipäqa ama jurayankitsu. Jurarqa mana qonqaypa cumpliyanki>.#Lev. 19.12; Núm. 30.2; Deut. 23.21. 34Peru noqam nï: Ama ni imanirpis jurayankitsu. Ama jurayankitsu <ciëlupä> nirpis. Ciëluqa Tayta Diospa trönunmi. 35Ama jurayankitsu <patsapä> nirpis. Kay patsaqa Tayta Diospa chakin jarukunanmi.#Isa. 66.1; Mat. 23.22; Stg. 5.12. Ama jurayankitsu <Jerusalénpä> nirpis. Jerusalénqa llapanpä poderyuq Rey#5.35 Tsay reyqa Tayta Diosmi. täranqan markam.#Sal. 48.2. 36Ama jurayankitsu <umäpä> nirpis.#5.36 Unay Israel runakuna umanpä jurarqa noqantsik por mi vïda nir juraqnömi karqan. Manam poderyuqtsu kayanki aqtsaykita yuraqman ni yanaman tikratsiyänaykipäpis. 37Awnirqa awniyanki, y mana cumpliyänayki kaptinqa ama awniyankitsu. Jurayparä awnirqa Satanás munanqannömi parlaykäyanki.
Chikimashqapis mana chikinantsikpä Jesús yachatsinqan
Lucas 6.29-30
38<<Musyankim Moisés qellqanqan leykunachö ninqanta: <Ñawinta jipiptinqa kikinpa ñawintapis jipitsun. Kirunta jipiptinqa kikinpa kiruntapis jipitsun>.#Éxo. 21.24; Lev. 24.20; Deut. 19.21. 39Peru noqam nï: Chikiyäshuptikipis ama chikiyankitsu. Laqyayäshuptikipis jukaq cäraykita kamapaykuyanki.#Lam. 3.30. 40Pipis demandashurniki camisaykita qechuyäshuptikiqa punchuykitapis dëjapaykuyanki. 41Qepinta juk lëwayaq apayänaykipä obligashuptikiqa ishkay lëwayaqpis apapäyanki. 42Imatapis <qaraykallämay> nir mañakuyäshuptikiqa qaraykuyanki. Tsaynölla imatapis <mañaykallämay> niyäshuptikiqa mañaykuyanki.
Chikimaqnintsikta kuyanantsikpä Jesús yachatsinqan
Lucas 6.27-28, 32-36
43<<Tsaynöllam musyayanki runakuna niyanqanta: <Kuyanakuyanqaykiwanqa kuyanakuyanki. Chikishuqnikitaqa chikiyanki>. 44Peru noqam nï: Chikishuqnikikunata kuyayanki. [Ashlliyäshuptikipis allillata parlapäyanki. Mana alli rikayäshuptikipis alli rikayanki. Manakaqman churayäshuptikipis y] ñakatsiyäshuptikipis paykunapä Tayta Diosta mañakuyanki. 45Tayta Diosqa alli runakunapä y mana alli runakunapämi rupayta yarqatsimun. Tsaynöllam alli runakunapä y mana alli runakunapäpis tamyatsimun. Ciëluchö kaykaq Papäniki kuyapäkuq kanqannö qamkunapis kuyapäkuq karqa paypa wamranmi kaykäyanki.
46<<Kuyanakuyanqallaykiwan kuyanakurqa alli runa kayanqaykita ama yarpäyaytsu. Impuestu cobraqkunapis kuyanakuyanqallanwanqa kuyanakuyanmi. 47Amïguykikunallawan alli kawarqa ¿ima allitatä ruraykäyanki? Jutsasapa runakunapis tsaynöllaqa allim kawayan. 48Ciëluchö kaykaq Papäniki jutsaynaq kanqannö qamkunapis jutsaynaq kayay.#Lev. 11.44-45; 19.2; Deut. 18.13.
Currently Selected:
Mateo 5: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.