Lucas 6
6
Jamay junaqpä Jesús poderyuq kanqan
Mateo 12.1-8; Marcos 2.23-28
1Jamay junaqchömi trïgu poquraykaq chakrakunapa discïpulunkunawan Jesús päsaykäyarqan. Tsaypa päsarmi discïpulunkuna trïguta pallaskir uchuyarqan. 2Tsayta rikarmi fariseukuna niyarqan: <<¿Imanirtä jamay junaq kaykaptin leynintsikta mana cäsur trïguta pallaykäyanki?>>
3Jesúsnam nirqan: <<¿Manaku imaypis liyiyarquyki yanapaqninkunawan mallaqar David imata ruranqantapis? 4Davidshi Tayta Diospa wayinman yaykur Diospä churayanqan tantata mikunä.#1Sam. 21.1-6. Tsaynöllash paywan aywaq runakunatapis qaranä. Tsay tantaqa manam David ni paywan kaykaq runakuna mikuyänanpätsu karqan, sinöqa sacerdötikunalla mikuyänanpämi>>.#Lev. 24.9.
5Tsaynö niskirnam Jesús nirqan: <<Runapa Tsurinqa jamay junaqpäpis poderyuqmi>>.
Makin wanushqa runata jamay junaqchö Jesús allïtsinqan
Mateo 12.9-14; Marcos 3.1-6
6Tsaypita juk jamay junaqnam sinagögaman yaykur Jesús yachatsirqan. Tsaychömi derëcha makin wanushqa runapis kaykarqan. 7Tsayta rikarmi ley yachatsikuqkuna y fariseukuna Jesústa rikaraykäyarqan jamay junaqchö allïtsiptinqa tsay achäquilla contran shäriyänanpä.
8Tsaynö yarpaykäyanqanta musyarmi makin wanushqa runata Jesús nirqan: <<Shärir runakunapa chawpinman ichiy>>.
Niptinmi tsay runa ichirkurqan. 9Tsaypitanam runakunata Jesús tapurqan: <<Kanan mä niyämay. Jamay junaqchö ¿allitaku o mana allitaku rurashun? Runa mayintsikta ¿salvashunku o <wanutsunpis> nishunku?>>
10Tsaypitanam tsaychö kaykaq runakunata rikaskir makin wanushqa runata nirqan: <<¡Makikita joqariy!>>
Joqarkuptinmi makin alliskirqan. 11Fariseukunanam pasaypa rabyanar Jesústa acusayänanpä willanakuyarqan.
Chunka ishkay apostolninkunata Jesús akranqan
Mateo 10.1-4; Marcos 3.13-19
12Tsay junaqkunam jirkaman aywaykur Tayta Diosman Jesús warat mañakurqan. 13Patsa waraskiptinnam discïpulunkunata qayaskir chunka ishkayta apostolninkuna kayänanpä akrarqan. 14Paykunam kayarqan Simón (paypa jutintam Jesús churarqan Pedro), Simónpa wawqin Andrés, Santiago, Juan, Felipe, Bartolomé, 15Mateo, Tomás, Alfeupa tsurin Santiago, Zelote niyanqan Simón, 16Santiagupa tsurin Judas y Judas Iscariote. Paymi Jesústa rantikurqan.
Atskaq runakunata Jesús allïtsinqan
Mateo 4.23-25
17Apostolninkunawan jirkapita Jesús uraykarnam pampachö atskaq discïpulunkunawan atskaq runakuna qorikashqa kaykaqta tarirqan. Tsay runakunam shayämushqa kayarqan entëru Judea provinciapita, Jerusalénpita y lamar kuchunchö kaykaq Tiro y Sidón markakunapita. Paykunam qorikäyarqan Jesús yachatsinqankunata wiyayta munar y qeshyankunapita alliyta munar. 18Tsaychömi supay ñakatsinqan runakunatapis Jesús allïtsirqan. 19Poderninwan llapan qeshyaqkunata allïtsiptinmi pïmaypis Jesústa yatayta munayarqan.
Kushikuyänanpä y llakikuyänanpä Jesús willakunqan
Mateo 5.1-12
20Discïpulunkunata rikaykurmi Jesús nirqan: <<Pobrikuna, kushishqam kawayanki. Qamkunapämi Tayta Diospa mandakuynin.
21<<Mallaqaychö kaqkuna, kushishqam kawayanki. Qamkunaqa mananam mallaqäyankinatsu.
<<Waqaqkuna, kushishqam kawayanki. Qamkunaqa manam llakikuyankinatsu.
22<<Kushishqam kawayanki Runapa Tsurinman criyiyanqaykipita chikiyäshuptiki, qarquyäshuptiki, ashlliyäshuptiki y qayapäyäshuptikipis. 23Tsaynö kaptinpis kushikuyay. Qamkunataqa gloriachö maynam Tayta Dios premiuta shuyaykätsiyäshunki. Qamkunatanömi chikishuqnikikunapa unay castankunapis Tayta Diospa profëtankunata ñakatsiyarqan>>.
24<<¡Allaw, rïcukuna! Qamkunaqa kay vïdallachömi kushikuyanki.
25<<¡Allaw, pacha junta kawaqkuna! Qamkunaqa mallaqäyankim.
<<¡Allaw, kushishqalla kawaqkuna! Qamkunaqa pasaypa llakikurmi waqayanki.
26<<¡Allaw, llapan runakunapita alabashqa kaqkuna! Qamkunatanöllam llulla profëtakunatapis unay castaykikuna alabayarqan.
Chikimaqnintsikta kuyanantsikpä Jesús yachatsinqan
Mateo 5.38-48; 7.12
27<<Wiyamaqkuna, qamkunatam nï: Chikishuqnikikunata kuyayanki. Mana alli rikayäshuptikipis alli rikayanki. 28Ashlliyäshuptikipis allillata parlapäyanki. Tumpayäshuptikipis paykunapä Tayta Diosta mañakuyanki. 29Laqyayäshuptikiqa jukaq cäraykita kamapaykuyanki. Punchuykita qechuyäshuptikiqa chompaykitapis lloqtipaykuyanki. 30Imata mañakuyäshuptikipis qaraykuyanki. Imaykita qechuyäshuptikipis ama <kutitsimay> niyankitsu. 31Imanömi runa mayiki rikayäshunaykita munayanki, tsaynölla qamkunapis runa mayikita alli rikayanki.
32<<Kuyanakuyanqallaykiwan kuyanakurqa ¿ima allitatä ruraykäyanki? Jutsasapa runakunapis kuyanakuyanqallanwanqa kuyanakuyanmi. 33Alli kaqkunallawan alli kawarqa ¿ima allitatä ruraykäyanki? Jutsasapa runakunapis tsaynöllaqa allim kawayan. 34Gänayänayki raykur imatapis prestarqa ¿allitatsurä ruraykäyanki? Jutsasapa runakunapis gänayänan raykullaqa imatapis prestayanmi.
35<<Qamkunaqa chikiyäshuqnikikunata kuyayay. Paykunapä allikunallata rurayay. Imatapis prestarqa ama cobrayaytsu. Tsaynö kawayanqaykipitam Tayta Dios premiuta qoyäshunki. Payqa mal agradecïdu runakunata y jutsasapa runakunatapis kuyapanmi. Tsaymi qamkunapis kuyapäkuq karqa poderösu Tayta Diospa wamran kaykäyanki. 36Papäniki kuyapäkuq kanqannö qamkunapis kuyapäkuq kayay>>.
Runa mayintsikta mana juzganapä Jesús ninqan
Mateo 7.1-5, 17-20; 12.34-35
37<<Tayta Dios mana juzgayäshunaykipä runa mayikikunata ama juzgayaytsu. Tsaynölla manakaqman mana churashunaykipä ama manakaqman churayaytsu. Runa mayikikunata perdonayaptikiqa qamkunatapis Tayta Dios perdonayäshunkim. 38Runa mayikita qarayaptikiqa Tayta Diosmi qamkunatapis tupuykikunaman jichaq jichaq atskata qarayäshunki. Millqayniki juntatam millqatsiyäshunki. Runa mayikita imanöpis yanapayanqaykimanmi qamkunatapis Tayta Dios yanapayäshunki>>.#Mat. 7.2.
39Tsaynöllam iwalatsiypa yachatsir Jesús nirqan: <<¿Qapra runa qapra mayinta pushanmantsurä? Qapra mayinta pusharqa ¿manatsurä uchkumanpis ishkan jeqarpuyanman?#6.39 Jesucristo tsaynö nirqan manakaqman churaq runata qapraman iwalatsirmi. 40Mayqan yachakuqpis manam yachatsiqninpita mastaqa yachantsu. Tsaynö kaptinpis yachakuskirqa yachatsiqninnöllam yachanqa.#6.40 Tsaynö yachatsirmi Jesucristo nirqan: Yachatsishuqniki runa mayinta manakaqman churaq kaptinqa qampis runa mayikita manakaqman churaytam yachakunki.
41<<Ñawikikunachö jatunkaray qeru jatiraykaptinqa ¿imanirtä runa mayikikunapa ñawinchö ichiklla shuka jatiraykaqta rikapäyanki? 42Ñawikikunachö jatunkaray qeru jatiraykaptinqa ¿imanöparä niyankiman: <Ñawikipita shukata jipipäshayki>? ¡Allish tukuq runakuna! Puntataqa ñawikikunachö kaykaq qerutarä jipiyay. Tsayrämi shumaq rikayanki runa mayikipa ñawinpita shukata jipiyänaykipä.#6.42 Kay textuchömi runa mayintsikpa jutsankunata ñawinchö kaykaq shukaman iwalatsin. Kikintsikpa jutsantsiktanam ñawintsikchö kaykaq qeruman iwalatsin. Ñawintsikpita qeruta jipinantsikpä nirqa jutsantsikkunata dëjanantsikpämi nin. Tsaynöpam tantiyatsimantsik jukta juzganantsikpa rantin kikintsikpa jutsantsikkunata dëjanantsikpä kanqanta.
43<<Alli jachaqa manam mana allitaqa wayuntsu. Tsaynöllam mana alli jachapis allitaqa wayuntsu. 44Wayuyninpitam ima jachatapis reqintsik. Manam kashakunapitatsu hïgusta pallantsik ni shirakakunapitatsu üvata pallantsik. 45Alli runaqa shonqun alli yarpanqantam parlan y mana alli runaqa shonqun mana alli yarpanqantam parlan. Runaqa shonqun yarpanqantam allitapis o mana allitapis parlan.
Cäsukuq runa y mana cäsukuq runa imanö kanqanpis
Mateo 7.24-27
46<<Yachatsinqäkunata mana cäsuykarqa ¿imanirtä <Señornïmi kanki, Señornïmi kanki> niyämanki? 47Ninqäkunata cäsumaqkuna imanö kayanqantapis kanan tantiyatsiyäshayki. 48Juk runash wayita shäritsinanpä qaqaman chanqanyaq uchkuykur cimientuta pirqanä. Qaqa jananchö shumaq pirqashqa kaptinshi mayu atskayarpis tsay wayitaqa juchutsinätsu. 49Juk runanash cimientuta mana pirqayllapa arëna jananchö wayita shäritsinä. Tsaynö kaptinshi mayu atskayar chaptin tsay wayi chipyaq juchurinä. Tsayshi pasaypa kuyapaypä kanä. Tsaynömi ninqäkunata mana cäsuq runapis kanqa>>.
Currently Selected:
Lucas 6: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.