Lucas 4
4
Jesústa Satanás tentayta munanqan
Mateo 4.1-11; Marcos 1.12-13
1Bautizakuskir Espíritu Santupa poderninchö Jesús kaptinmi Jordán mayupita desiertuman Espíritu Santu pusharqan. 2Tsaychö chusku chunka (40) junaq kaykaptinmi diablu tentarqan. Tsay junaqkunaqa imatapis mana mikurmi Jesús pasaypa mallaqarqan.
3Diablunam nirqan: <<Diospa Tsurin karqa mä kay rumita tantaman tikratsiy>>.
4Jesúsnam nirqan: <<Tayta Diospa palabranmi nin: <Manam tantata mikullartsu runa kawan, [sinöqa Tayta Dios ninqankunata cäsurmi kawan]> >>.#Deut. 8.3.
5Tsaypitanam altunnin jirkaman diablu pushaykur maytsay nacionkunata ras rikaskatsir 6nirqan: <<Llapan rikanqayki nacionkunata y tsaychö kaykaq riquëzakunata qamtam qarashayki. Tsaykuna noqapa kaptinmi munanqä kaqta pitapis qaraykushä. 7Qonquriykur adoramaptikiqa llapan rikanqaykitam qarashayki>>.
8Jesúsnam nirqan: <<[¡Kaypita witiy, Satanás!] Tayta Diospa palabranmi nin: <Tayta Diosllatam adorayanki. Pay japallantam sirviyanki> >>.#Deut. 6.13.
9Tsaypitanam Jerusalénman Jesústa diablu pusharqan. Tsaychönam templupa mas altunninman ichiykatsir nirqan: <<Diospa Tsurin karqa mä kaypita jeqarpuy. 10Diospa palabranmi nin: <Angelninkunatam Tayta Dios mandamunqa cuidayäshunaykipä. 11Paykunam tsariyäshunki chakillaykitapis rumikunachö mana takakunaykipä> >>.#Sal. 91.11-12.
12Jesúsnam nirqan: <<Tsaynöllam Tayta Diospa palabranchö nin: <Tayta Diosta ama tentankitsu> >>.#Deut. 6.16.
13Jesústa tentayta mana puëdirmi juk tiempupä yarparaykar diablu aywakurqan.
Galileachö Jesús willakur qallanqan
Mateo 4.12-17; Marcos 1.14-15
14Tsaypitanam Espíritu Santupa poderninwan Galileaman Jesús kutirqan. Tsay markakunachömi Jesús alli yachatsikuq kanqanta runakuna parlayaq. 15Sinagögakunachö yachatsiptinmi payta alabarnin niyaq: <<¡Payqa shumaqmi yachatsikun!>>
Nazaret markachö Jesús willakunqan
Mateo 13.53-58; Marcos 6.1-6
16Tsaypitanam markan Nazaretman Jesús kutir üsunkuna kanqannö jamay junaqchö sinagögaman aywarqan. Tsaychömi Tayta Diospa palabranta liyimunanpä runakunapa puntanman ichirqan. 17Profëta Isaías qellqanqan rölluta makyaptinmi liyiyta munanqanta tariskir liyirqan:
18<<Tayta Diosmi Espïritunta noqaman mandamushqa.
Paymi akramashqa alli willakuyninta pobrikunata willanäpä.
Tsaynöllam mandamashqa [llakishqa kawaqkunata animatsinäpä,]
juklä nacionman prësu aywaqkuna librina kayanqanta willanäpä,
qaprakunapa ñawinta allïtsinäpä,
chikiqninkunapa poderninchö ñakaykaq runakunata jipinäpä
19y Tayta Dios salvananpä kaq tiempu chämunqanta willakunäpä>>.#Isa. 61.1-2.
20Tsaynö liyiskirnam rölluta röllurkur sinagögachö yanapakuq runata kutitsinanpä makyarqan. Jamaskiptin tsaychö kaykaq runakuna rikaräyaptinmi 21Jesús nirqan: <<Liyimunqächö ninqannömi kanan cumplishqana>>.
22Tsaymi llapan runakuna espantakurnin niyarqan: <<¡Payqa shumaqmi parlan! ¿Manaku Josépa tsurin kaykan?>>
23Jesúsnam nirqan: << <Jampikuq karqa kikikirä jampikuy> niyanqannömi qamkunaqa munaykäyanki Capernaúmchö milagruta ruranqänö kay markantsikchöpis milagruta ruranäta>>.
24Tsaypitanam nirqan: <<Rasunpam nï: Manam ni mayqan profëtatapis markanchöqa chaskiyantsu. 25Rasunpam nï: Profëta Elías kawanan witsan kimsa wata joqta killa mana tamyaptinmi maytsay Israel markakunachö pasaypa hambrüna karqan. Tsay witsanmi Israel nacionchö atska viüdakuna kayarqan. 26Tayta Dios manam Israelchö mayqan viüdamanpis Elíasta mandarqantsu, sinöqa Sidónchö kaq Sarepta markachö täraq viüdallata yanapananpämi mandarqan.
27<<Tsaynöllam profëta Eliseo kawanqan witsanpis Israelchö lepra qeshyawan atskaq qeshyaykäyarqan. Tsaynö kayaptinpis manam mayqantapis Eliseo allïtsirqantsu, sinöqa Siria nacionpita Naamánllatam allïtsirqan>>.
28Jesús tsaynö niptinmi sinagögachö kaykaq runakuna pasaypa rabyanäyarqan. 29Tsaymi Jesústa markapita jipiskir marka kuchun jirkanninman apayarqan tsaypita tanqariyänanpä. Tsay jirkanchömi paykunapa markan kaykan. 30Tsaynö apaykäyaptinmi Jesúsqa runakunapa chawpinkunapita aywakurqan.
Supay löcuyätsinqan runata Jesús allïtsinqan
Marcos 1.21-28
31Tsaypitanam Galileachö Capernaúm markaman Jesús aywarqan. Tsaychömi cada jamay junaq runakunata yachatsirqan. 32Shumaq yachatsinqanta wiyarmi runakuna espantashqa niyarqan: <<¡Payqa poderyuq karmi shumaq yachatsimantsik!>>
33Tsay sinagögachömi supay löcuyätsinqan runa kaykarqan. Paymi qayarar nirqan: 34<<¡Nazaretpita Jesús, [kaypita aywakuy]! ¿Imatatä noqakunawan munanki? ¿Ushakätsiyämänaykipäku shamurquyki? ¡Musyämi Tayta Dios mandamunqan santu runa kanqaykita!>>
35Tsaymi supayta ollqutupar Jesús nirqan: <<¡Upälla kay runapita yarquy!>>
Tsaynö niptinmi llapan runakunapa puntanchö tsay runata tsapiskir aywakurqan. Tsapirpis manam däñarqantsu. 36Tsayta rikaykurmi juknin jukninpis mantsakashqa niyarqan: <<¡Imatanatä rikantsik! ¡Poderninwan niptinmi supaykunapis cäsur aywayan!>>
37Supayta qarqunqanta musyaykurmi entëru Galileachö Jesús poderyuq kanqanta parlayaq.
Pedrupa suegranta Jesús allïtsinqan
Mateo 8.14-15; Marcos 1.29-31
38 Sinagögapita yarquskirnam Simónpa wayinman Jesús aywarqan. Tsaychömi Simónpa suegran fiebriwan antsa qeshyaptin Jesústa rugayarqan allïtsinanpä. 39Rugayaptinnam qeshyaqman witiykur nirqan: <<Amana fiebriynatsu>>. Tsaymi jinan höra alliskir paykunata mikuyta qararqan.
Atskaq qeshyaqkunata Jesús allïtsinqan
Mateo 8.16-17; Marcos 1.32-34
40Rupay ullunaykaptinnam imaykaläya qeshyawan qeshyaqkunata Jesúsman apayämurqan. Qeshyaqkunapa jananman makinta churaptinmi tsay qeshyaqkuna alliskiyarqan. 41Tsaynöllam supaykuna qeshyaqkunapita yarqurnin qayaraypa niyarqan: <<¡Qamqa Diospa Tsurinmi kanki!>>
Tayta Dios mandamunqan Cristo kanqanta supaykuna niyaptinmi mana parlayänanpä Jesús ollqutuparqan.
Jesús willakur purinqan
Marcos 1.35-39
42Patsa waraskiptinnam tsunyaqman Jesús aywakurqan. Tsaymi runakuna ashirnin pay kaykanqan kaqman chaykur paykunapita mana aywakunanpä rugayarqan. 43Tsaymi Jesús nirqan: <<Tayta Diospa mandakuyninpa alli willakuyninta wakin markakunachöpis willakunämi kaykan. Tsaypämi Tayta Dios mandamashqa>>.
44Tsaypitanam Israelchö maytsay markakunapa purir#4.44 Wakin griego copiakunachömi Galileapa purir niyanmi. sinagögakunachö Tayta Diospa willakuyninta Jesús willakurqan.
Currently Selected:
Lucas 4: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.