Juan 9
9
Qapra runata Jesús allïtsinqan
1Jerusalénchö Jesús puriykarmi yurinqanpita qapra runata rikarqan. 2Tsaymi discïpulunkuna tapuyarqan: <<Rabí, ¿imanirtä kay runa qapra yurishqa? ¿Kikinpa jutsanpitaku o mamanpa y papäninpa jutsanpitaku?>>
3Jesúsnam nirqan: <<Manam kikinpa ni mamanpa ni papäninpa jutsanpitatsu kay runa qapra yurishqa, sinöqa Tayta Dios allïtsinqanta runakuna musyayänanpämi. 4Junaq kanqanyaq mandamaqnï munanqanta rurashun#9.4a Wakin griego copiakunachömi rurashä niyanmi.. Paqaspaqa manam pipis aruyta puëdinnatsu.#9.4b Junaq kanqanyaq nirqa kay patsachö kanqäyaq nirqanmi. Paqaspä parlarqa wanuyninpämi parlarqan. Tsaynöpam Jesucristo nirqan kay patsachö kanqanyaq Tayta Dios llapan munanqanta cumplinanpä kanqanta. 5Kay patsachö kanqäyaqqa aktsim kä>>.#9.5 Aktsi kanqanta nirqa runakunata salvaq kanqanta y Dios munanqannö kawananpä tantiyatsiq kanqantam Jesús nirqan.#Sal. 27.1; 119.105; Prov. 6.23; Isa. 49.6; Juan 8.12.
6Tsaynö nirmi toqayninwan mituta ruraskir tsay qapra runapa ñawinta Jesús llushirqan. 7Tsaypitanam nirqan: <<Siloé estanquiman aywar mayllakamuy>>.
(Siloéqa mandamushqa ninanmi.)
Jesús ninqannö mayllakuskirmi allishqana kutirqan. 8Tsaymi vecïnunkuna y payta reqiqkuna niyarqan: <<¿Manaku kay runaqa limushna mañakuq qapra runa?>>
9Wakinmi niyarqan: <<Paymi>>.
Wakinnam niyarqan: <<Manam paytsu. Peru pay rikuqmi>>.
Tsaynö niyaptinmi kikin nirqan: <<Noqam tsay runa kä>>.
10Tsaymi tapuyarqan: <<¿Imanöpatä ñawiki allishqa?>>
11Paynam nirqan: <<Jesús jutiyuq runam mituta ruraskir ñawïta llushipämashqa. Tsaypitanam mayllakunäpä Siloé estanquiman mandamashqa. Nimanqannö mayllakuskirmi kananqa rikäna>>.
12Tsaymi tapuyarqan: <<¿Maychötä tsay allïtsishuqniki runa kaykan?>>
Paynam nirqan: <<Manam musyätsu>>.
Allishqa runata fariseukuna tapuyanqan
13Tsaypitanam qapra kanqanpita allishqa runata fariseukunaman pushayarqan. 14Mituta ruraskir Jesús allïtsinqan junaqqa jamay junaqmi karqan. 15Tsaymi imanöpa allinqantapis fariseukuna tapuyarqan. Tapuyaptinmi nirqan: <<Juk runam ñawïta mituwan llushipämashqa. Mayllakuskirmi kananqa rikäna>>.
16Tsaymi wakin fariseukuna niyarqan: <<Tsay runaqa manam Tayta Dios mandamunqan runatsu. Tayta Dios mandamunqan karqa jamay junaqtam respitanman>>.
Wakin fariseukunanam niyarqan: <<Peru yarpäyanqaykinö jutsayuq karqa ¿imanöpatä allïtsinman?>>
Tsaynö nirmi kikinkunapura rabyanätsinakuyarqan.
17Tsaymi allishqa runata yapay tapuyarqan: <<Tsay allïtsishuqniki runa ¿pï kanqantatä yarpanki?>>
Paynam nirqan: <<Payqa profëtam>>.
18Tsaynö niptinmi Israel runakunapa autoridäninkuna tsay runa qapra kanqanta criyiyarqantsu. Tsaymi mamanta y papäninta qayaskatsir 19tapuyarqan: <<¿Kay runa wamraykikunaku? ¿Rasunpaku qapra yurirqan? ¿Imanöpatä allishqa?>>
20Papänin y mamannam niyarqan: <<Aw, wamräkunam. Rasunpam yurinqanpita qapra kashqa. 21Peru manam musyayätsu imanöpa allinqanta ni pï allïtsinqantapis. Payqa yashqanam. Kikinta tapuyay>>.
22Tsaynö niyarqan autoridäkunata mantsarmi. Autoridäkunaqa willanakuyashqanam kayarqan mayqanpis <<Jesúsqa Tayta Dios mandamunqan Cristum>> niq kaqtaqa sinagögapita qarquyänanpä.#9.22 Sinagögapita autoridäkuna pitapis qarquyaq imaypis manana kutinanpämi. Tsaymi manana kutiqnatsu Tayta Diosta adorananpä ni runakuna qorikäyaptin parlananpä. 23Tsayta mantsarmi papäninwan maman niyarqan: <<Payqa yashqanam. Kikinta tapuyay>>.
24Tsaymi qapra kanqanpita allishqa runata autoridäkuna yapay qayaskatsir tapuyarqan: <<Tayta Diospa puntanchömi niyä. Rasun kaqta willayämay. Musyayämi tsay allïtsishuqniki runa jutsasapa kanqanta>>.
25Tsay runanam nirqan: <<Noqaqa manam musyätsu jutsasapa kanqanta o jutsaynaq kanqanta. Peru musyä qapra kanqäpita allina rikanqätam>>.
26Tsaynö niptinmi yapay tapuyarqan: <<¿Imatatä rurashqa ñawiki allïnanpä?>>
27Niyaptinmi nirqan: <<Qamkunata willarqünam. Willaptïpis manam criyiyämankitsu. ¿Imanirtä yapay tapuyämanki? ¿Qamkunapis paypa discïpulun kaytaku munaykäyanki?>>
28Tsaynö niptinmi rabyakur niyarqan: <<Qammi paypa discïpulunqa kanki. Noqakunaqa Moiséspa discïpulunkunam kayä. 29Musyayämi Moisésta Tayta Dios parlapanqanta. Tsay allïtsishuqniki runapäqa ni maypita shamunqantapis manam musyayätsu>>.
30Tsaynö niyaptinmi nirqan: <<Tsay runa ñawïta alliykätsimaptinqa ¿imanirtä Tayta Diospita shamunqanta tantiyayankitsu? 31Musyantsikmi jutsasapakunataqa Tayta Dios mana cäsunqanta. Peru paypita mantsapakur munanqannö kawaqkunatam sïqa yanapan.#Prov. 15.29. 32Manam imaypis wiyarquntsiktsu yurinqanpita qaprata pipis allïtsinqanta. 33Tsay runa Tayta Diospita mana shamushqa karqa manam ima milagrutapis ruranmantsu>>.
34Autoridäkunanam niyarqan: <<¡Qamqa pasaypa jutsayuqmi yurirquyki! ¿Tsaynö kaykarku noqakunata yachatsiyämayta munanki?>>
Tsaynö nirmi sinagögapita tsay runata qarquyarqan.
Jesúsman mana criyir qapranö kayanqan
35Tsay allïtsinqan runata sinagögapita qarquyanqantam Jesús musyaskinä. Tsaypita kikinwan tinkuskirnam nirqan: <<¿Runapa Tsurinman#9.35 Wakin griego copiakunachömi Tayta Diospa Tsurinman niyanmi. criyinkiku?>>
36Niptinmi nirqan: <<Taytay, ¿pitä tsay runa? Payman criyinäpä willaykallämay>>.
37Jesúsnam nirqan: <<Rikarquykinam. Tsay runaqa noqam kä>>.
38Tsaynö niptinmi Jesústa adorar nirqan: <<Taytay, qammanmi criyikullä>>.
39Jesúsnam nirqan: <<Noqam kay patsaman runakunata juzganäpä shamurqü. Juzgaptïmi qaprakuna rikayanqa y rikaqkunana qaprayäyanqa#9.39 Tsaynö nirmi Jesús nirqan: Juzgaptïmi mana tantiyaqkuna tantiyayanqa y yachaqkunanam tantiyayanqatsu.>>.#Isa. 6.10; 42.19; Mar. 4.12; Juan 12.40.
40Tsaynö ninqanta wiyaykurmi tsaychö kaykaq wakin fariseukuna niyarqan: <<Tsaynö kaptinqa ¿noqakunachi qapra kayä?>>
41Jesúsnam nirqan: <<Qapra karqa manam jutsayuqtsu kayankiman. <Rikämi> nirmi jutsayuq kaykäyanki>>.#9.41 Fariseukuna yachaq kaykarqa Jesústa Tayta Dios mandamunqantam tantiyayanman karqan. Peru mana tantiyarmi jutsayuq kayarqan. Tsaymi yachaq kaykarpis mana criyiyaptin qapra runaman Jesucristo iwalatsirqan.
Currently Selected:
Juan 9: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.