Juan 5
5
Mana puriyta puëdiq runata Betesda estanquichö Jesús allïtsinqan
1Tsaypitanam Israel runakunapa juk fiestan Jerusalénchö kaptin Jesúspis tsayman aywarqan. 2Jerusalén yaykunachömi Üsha Punku niyanqan punkuchö jatunkaray estanqui kaykan. Hebreo idiömachö tsay estanquipa jutinmi Betesda#5.2 Wakin traduccionkunachöqa Betzata niyanmi.. Lädunkunapam pitsqa alarkuna kaykan. 3Tsay alarkunachömi atskaq qeshyaqkuna, qaprakuna, weqrukuna y puriyta mana puëdiqkunapis ujuräyarqan. [Paykunam yaku kuyuqta shuyaräyarqan. 4Tsaychömi ciëlupita ángel unayta urämur yakuta kuyutsiq. Yakuta kuyutsiptinnam mayqan qeshyaqpis puntata yakuman yaykuq kaqqa allishqana yarqamuq.]
5Tsaychömi juk runa kimsa chunka puwaq (38) watana qeshyar ujuraykarqan. 6Tsay runa unaypitana qeshyanqanta musyarmi Jesús nirqan: <<¿Alliyta munankiku?>>
7Niptinnam nirqan: <<Awmi taytay, alliytam munä. Manam pïnïpis kantsu yakuta ángel kuyutsiptin estanquiman yaykatsimänanpä. Yaykunäpä kaykaptïpis jukmi llalliman>>.
8Jesúsnam nirqan: <<¡Shäriy! Kirmaykita apakurkur aywakuy>>.
9Tsaymi jinan höra alliskir kirmanta apakurkur kushishqa aywakurqan. Tsay junaqqa jamay junaqmi karqan. 10Tsay allishqa runata rikarmi Israel autoridäkuna niyarqan: <<Jamay junaq kaykaptin ¿imanirtä kirmayki aparishqa puriykanki?>>#Neh. 13.19; Jer. 17.21.
11Tsay runanam nirqan: <<Allïtsimaqnï runam nimashqa kirmäta apakurkur aywakunäpä>>.
12Tsaymi tapuyarqan: <<¿Pitä tsaynö nishurquyki?>>
13Peru estanqui kaqpita Jesús aywakushqana kaptinmi rikatsinanpä tarirqannatsu.
14Tsaypitanam templupa patiunchö tsay allïtsinqan runawan Jesús tinkuskir nirqan: <<Allishqana kaykarqa jutsata amana ruraynatsu. Yapay jutsata ruraptikiqa masmi imapis päsashunki>>.
15Tsaypitanam tsay runaqa Israel autoridäkunaman aywaykur Jesús allïtsinqanta willarqan.
Diospa Tsurin kanqanta Jesús ninqan
16Jamay junaqchö allïtsinqanpitam Israel autoridäkuna Jesúspa contran shärir [wanutsiyänanpä] ashiyarqan. 17Paykunawan tinkuskirnam Jesús nirqan: <<Jamay junaq kaptinpis Papänïqa arunmi. Tsaynöllam noqapis arü>>.
18Tsaynö niptinmi Israel autoridäkuna Jesústa wanutsiyta munayarqan. Manam jamay junaqchö runata allïtsinqallanpitatsu wanutsiyta munayarqan, sinöqa <<Diosmi Papänï>> niptin Dios tukuykanqanta yarparmi.#Juan 10.30-38.
19Jesúsnam nirqan: <<Rasunpam nï: Tayta Diospa Tsurin karmi Papänï llapan ruranqanta noqapis rurä. Manam kikïpa munaylläpitatsu imatapis rurä, sinöqa Papänï ruranqanta rikanqallätam rurä. 20Papänï kuyamarmi llapan ruranqankunatapis rikatsiman. Mas wakinkunata ruranäpämi tantiyatsimanqa. Tsayta rikarmi masrä espantakuyanki. 21Tsaynö espantakuyanki wanushqakunata Papänï kawayta qaranqannö noqapis munanqä kaqkunata kawayta qaraptïmi.
22<<Tsaynöllam Papänïtsu pitapis juzganqa, sinöqa noqatam Tsurin kaptï pïmaytapis juzganäpä churamashqa. 23Kikinta adorayanqannölla noqatapis llapan runakuna adorayämänanpämi tsaynö churamashqa. Tsaymi noqata mana adoramarqa Papänïtapis adorayantsu.
24<<Rasunpam nï: Willakunqäta wiyar mandamaqnï Papänïman yärakuqkunaqa mana ushakaq kawaytam tariyashqa. Paykunaqa manam infiernuman qaykushqatsu kayanqa, sinöqa wanushqanö kayanqanpitam mushuq kawaytana tariyashqa.
25<<Rasunpam nï: Tiempu chämushqanam wanushqanö kaqkuna Diospa Tsurin willakunqanta wiyayänanpä. Willakunqanta cäsuqkunaqa mana ushakaq kawaytam tariyanqa. 26Tsaynö kananpämi Tayta Dios poderninta Tsurinta entregashqa. Tsaymi runakunata kawayta qarananpä Tayta Dios poderyuq kanqannö Tsurinpis poderyuq kaykan. 27Tsaynöllam Runapa Tsurin kaptin runakunata juzgananpäpis Tayta Dios poderninta entregashqa.
28<< <¿Imanörä tsay kanqa?> nir ama yarpachakuyaytsu. Tiempu chämunqam llapan wanushqakuna Diospa Tsurinpa vozninta wiyayänanpä. 29Allita ruraqkuna kawaskamurmi imayyaqpis kawayanqa. Peru mana alli ruraqkunam sïqa kawamurpis infiernuman qaykushqa kayanqa.#Dan. 12.2. 30Manam kikïpa munaylläpitatsu juzgashä, sinöqa mandamaqnï [Papänï] munanqannöllam juzgashä.
Tayta Dios mandamunqanta Jesús tantiyatsinqan
31<<Tayta Dios mandamanqanta kikïpa yarpaylläpita niptïqa manam criyiyämankimantsu. 32Peru manam noqallatsu musyatsï, sinöqa kikin Tayta Diosmi noqapita musyatsiyäshunki. Pay musyatsiyäshunqaykiqa llapanpis rasun kaqllam.
33<<Bautizaq Juanman tapukuq mandayaptiki paypis noqapä rasun kaqtam willayäshurqayki.#Juan 1.19-27; 3.27-30. 34Peru manam mayqan runapis willamaptinrätsu Tayta Dios mandamanqanta musyä, sinöqa Papänï musyatsimaptinmi. Tayta Dios mandamanqanta criyir salvakuyänaykipämi noqapita Juan willakunqanta yarpaykätsï. 35Juanqa imayka tsariykaq aktsinömi karqan. Willakunqanta wiyarmi juk rätulla kushikuyarqayki.
36<<Tayta Dios mandamanqantaqa manam Juan willakunqanta wiyallartsu runakuna tantiyayan, sinöqa milagru ruranqäkunata rikar y yachatsinqäkunata wiyarmi. Papänï nimanqallantam llapantapis rurä. 37Tsaynöpam kikin Tayta Dios mana parlapäyäshurnikipis y mana yuripuyäshurnikipis noqata mandamanqanta musyatsiyäshunki. 38Tsaynö musyatsiyäshuptikipis noqaman mana criyimurqa Tayta Diospa palabrantapis manam criyiyankitsu.
Runakuna mana criyiyanqanpita Jesús parlanqan
39<<Qamkunaqa mana ushakaq kawayta tariyänaykipä kanqanta yarparmi Tayta Diospa palabranta liyir yachakuyanki. Tsaynö yachakurpis manam tantiyayankitsu tsay qellqayanqankuna noqapä parlanqanta.#5.39 O Tayta Diospa palabranchö mana ushakaq kawayta tariyänaykipä kanqanta yarparqa paypa palabranta yachakuyay. Paypa palabranqa noqapämi qellqashqa kaykan. 40Tsaynö parlaptinpis manam criyiyämankitsu. Peru criyikamuq kaqmi sïqa mana ushakaq kawayta tariyan.
41<<Noqaqa manam qamkuna alabayämänaykita munätsu. 42Musyämi Tayta Diosta rasunpa mana kuyayanqaykita. 43Papänïpa jutinchö shamushqa kaptïpis criyimayta manam munayankitsu. Kikinpa munayllanpita shamuq runakunatam sïqa ras chaskiyanki. 44Qamkunaqa runa mayikikunawan alli kawayänallaykipämi yarpachakuyanki. Peru manam Tayta Dioswan alli kawayänaykipäqa yarpachakuyankitsu. Tsaynö kaykarqa ¿imanöpatä criyiyämankiman?
45<<Ama yarpäyaytsu Tayta Diospa puntanchö shimpinäpä kanqanta. Moisésman criyiyaptiki paymi shimpiyäshunki. 46Moisés qellqanqankunaqa noqapämi parlaykan. Tsaymi pay qellqanqankunata criyirqa noqa ninqäkunatapis criyiyankiman. 47Pay qellqanqankunata mana criyirmi noqa ninqäkunatapis criyiyankitsu>>.
Currently Selected:
Juan 5: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.