Hechos 1
1
Espíritu Santuta chaskiyänanpä willanqan
1Tayta Teófilo,#Luc. 1.1-4. punta kaq libruchömi Jesús llapan ruranqankunata y yachatsinqankunata qellqamurqä. Tsaykunatam rurarqan y yachatsirqan willakur qallanqanpita 2hasta ciëluman aywakunqan junaqyaq. Ciëluman manarä aywakurmi akranqan apostolninkunata Espíritu Santupa poderninwan imata rurayänanpä kaqtapis tantiyatsirqan. 3Wanunqanpita kawaskamurmi chusku chunka (40) junaqyaq paykunata yuripurqan. Rasunpa kawamunqanta criyiyänanpämi imaykanöpa tantiyatsirqan. Tsaynöllam Tayta Diospa mandakuyninpäpis shumaq tantiyatsirqan.
4Apostolninkunawan kaykarmi Jesús nirqan: <<Qamkunata willanqänömi awniyäshunqaykita#Luc. 24.49. Papänï mandamunqa. Tsayta manarä chaskirqa Jerusalénpita amarä aywakuyankirätsu. 5Juanqa yakullawanmi bautizarqan. Peru qamkunam sïqa Espíritu Santuwan bautizashqa kayanki. Bautizashqa kayänaykipä juk ishkay junaqllanam faltaykan>>.#Mat. 3.11; Mar. 1.8; Luc. 3.16; Juan 1.33.
Ciëluman Jesús kutinqan
6Jesúswan qorikashqa kaykaqkunam tapuyarqan: <<Taytay, ¿kananpitaqa Israel nacionnintsikpa mandaqninnatsurä kanki?>>
7Jesúsnam nirqan: <<Manam tsaykunata musyayänaykitsu. Imay junaq imay höra tsaykuna päsananpä kanqantaqa Tayta Diosllam musyan. Payllam poderyuq kaykan munanqan höra tsaykunata rurananpä. 8Peru tsaynö kaptinpis Espíritu Santu qamkunaman shamuptinmi poderninta chaskiyanki. Chaskiskirnam willakuynïta willakuyanki Jerusalénchö, entëru Judeachö, Samariachö y maytsay markakunachöpis>>.#Mat. 28.19; Mar. 16.15; Luc. 24.47-48.
9Tsaynö parlayta ushaskirmi ciëlupa witsar qallaykurqan. Rikaraykäyaptinmi pukutay tsapaskiptin illakaskirqan.#Mar. 16.19; Luc. 24.50-51. 10Tsaynö kaykäyaptinmi yuraq röpashqa ishkay runakuna illaqpita yuriskir 11niyarqan: <<Galilea runakuna, ¿imanirtä ciëlupa rikaraykäyanki? Puntaykikunapita ciëluman aywakunqannöllam Jesús yapay kutimunqa>>.
Judaspa trokin apóstol kananpä Matíasta akrayanqan
12Tsaypitam Olivos jirkanchö kaykäyanqanpita apostolkuna Jerusalénman kutiyarqan. Tsay jirkanpita Jerusalénmanqa manam alläpa karutsu karqan, sinöqa jamay junaqchö puriyanqannöllam.#1.12 Jamay junaq kaptin Israel runakuna hasta ishkay waranqa (2,000) päsullatam puriyaq. Tsaypita mastaqa manam puriyaqtsu. Ishkay waranqa päsuqa juk kilömetrupita ichik masllam kaykan. 13Chaykurnam patsakuyanqan altusman yarkuyarqan. Paykunam kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote niyanqan Simón y Santiagupa tsurin Judas.#1.13 Bartolomépa jukaq jutinmi karqan Natanael (Juan 1.45-49; 21.2). Santiagupa tsurin Judaspa jukaq jutinmi karqan Tadeo (Mat. 10.3; Mar. 3.18). 14Paykunam Jesúspa maman Maríawan, Jesúspa wawqinkunawan y wakin warmikunawanpis Tayta Diosta mañakuyänanpä imaypis qorikäyaq.
15Tsay junaqkunam Jesúsman criyikuqkuna pachak ishkay chunkanö (120) qorikäyaptin Pedro ichirkur nirqan: 16<<Wawqikuna y panikuna, musyanqantsiknöpis Judasmi runakunata pusharqan Jesústa prësu tsariyänanpä. Tsaynö kananpä kanqanta qellqananpämi Espíritu Santu rey Davidta tantiyatsirqan. Tsaymi Judasta päsananpä kanqanta Tayta Diospa palabran ninqannölla kanan cumplishqa. 17Judasqa noqakunawanmi purirqan. Paytapis apóstol kananpämi Jesús akrarqan>>.
18(Jesústa rantikunqan qellayta Judas kutitsinqanwanmi chakrata rantiyarqan. Judasqa pachanpis pashtaqpämi uray senqaypa jeqarqan aqishninpis mashtakaqpä. 19Tsayta musyaykurmi Jerusalénchö täraq runakuna tsay chakrapa jutinta churayarqan Acéldama jutin kananpä. Paykunapa idiömanchö Acéldama ninanqa Yawar Pampa ninanmi.)#Mat. 27.3-8.
20<<Judasta päsananpä kaqtaqa Salmo libruchömi nin:
<< <Wayinpis tsunyaq tikratsun.
Tsaychö ama pipis tärätsunnatsu>.#Sal. 69.25.
Tsaynöllam mastapis nin:
<Pay rurananpä kaqta jukna ruratsun>.#Sal. 109.8.
21<<Tsaymi juktana churashun Judaspa rantin apóstol kananpä. Tsay runa katsun Jesús willakur qallanqanpita noqakunawan puriq. 22Tsaynölla Jesústa Juan bautizanqanpita#Mat. 3.16; Mar. 1.9; Luc. 3.21. ciëluman kutikunqanyaq#Mar. 16.19; Luc. 24.51. qatiraq katsun. Tsay runata churashun noqakunanö apóstol kar Jesús kawamunqanta willakur purinanpä>>.
23Tsaynö niptinmi ishkaq runakunata akrayarqan. Jukmi Matías karqan. Jukaqnam José karqan. Wakin runakuna Joséta Barsabás niyaq y wakinnam Justo niyaq. 24Tsaypitam Tayta Diosta mañakur niyarqan: <<Tayta Dios, musyankim runakunapa shonqun imata yarpanqantapis. Mayqantapis akranqaykita musyaykatsiyämay. 25Akranqayki runam apostolniki kanqa Judas Iscariotipa rantin. Apóstol kayninta mana cumplirmi Judasqa wanuyta tarishqa>>.
26Tsaynö mañakuskir suertiyayaptinmi Matíaspä yarqurqan. Matíaswanmi apostolkuna yapay chunka ishkay kayarqan.
Currently Selected:
Hechos 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.