Filipenses 1
1
Apóstol Pablo saludakunqan
1Filipos#Hech. 16.12. markachö kaykaq mayor wawqikuna, diäcunukuna y wakin yärakuq mayikuna:
Noqa Pablo, Jesucristupa sirviqnin karmi kay cartata Timoteuwan cartakayämü. 2Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.
Tayta Diosta Pablo mañakunqan
3Qamkunapä yarparmi imaypis Tayta Diosta agradëcikü. 4Tsaynöllam Tayta Diosta mañakur imaypis qamkunapä kushishqa mañakü. 5Jesucristupa alli willakuyninta chaskikuyanqaykipita kananyaq yanapayämanqaykita manam qonqätsu. 6Musyämi qamkunachö Tayta Dios alli rurayta qallanqanta y Jesucristo kutimunqanyaq tsay ruranqanta ushananpä kanqanta.#Sal. 138.8.
7Qamkunapä yarparmi tsaynö nï. Jesucristupa willakuyninta willakur puriptïpis o prësu kaptïpis qamkunam yanapayämarquyki. 8Tayta Dios musyanmi qamkunapä imaypis yarparaykanqäta. Jesucristo kuyamanqantsiknöllam noqapis llapan shonqüwan qamkunata kuyä.
9Tsaymi Tayta Diosta mañakü shumaq tantiyakur payta kuyar jukniki juknikipis kuyanakuyänaykipä. 10Tsaynö kuyanakurmi alli kaqkunata rurayänaykipä tantiyakuyanki y Jesucristo kutimunanta shuyar pay munanqannö jutsaynaqlla kawayanki. 11Imaypis allillata rurayänaykipä Jesucristo yanapaykuyälläshuy. Tayta Dios alabashqa kananpä tsaynö kaykullätsun.
Jesucristupa alli willakuyninta willakuyaptin Pablo kushikunqan
12Wawqikuna y panikuna, prësu wichqarätsiyämaptinpis Jesucristupa alli willakuyninta maytsaychö chaskikuyanqanta musyayänaykitam munä. 13Tsaymi kaychö llapan wardiakunawan wakin runakunapis musyayan Jesucristupa willakuyninta willakunqäpita prësu kaykanqäta.#Hech. 28.30. 14Tsayta musyarmi wakin wawqikuna y panikunapis Jesucristuman yärakurnin mana mantsariypana alli willakuyta willakuykäyan.
15Wakinqa noqapita mas reqishqa kayta munarmi chikiyämar willakuykäyan. Peru wakinmi sïqa runakuna salvakuyänanpä willakuykäyan. 16Paykuna musyayanmi Jesucristupa alli willakuyninta willakunqäpita wichqaraykanqäta. Wichqaraptïpis Jesucristuta kuyarmi willakuykäyan. 17Reqishqa kayta munaqkunaqa manam Tayta Diosta sirviyta munartsu willakuyan, sinöqa rabyanätsimayta munarllam. 18Tsaynö kayaptinpis manam llakikütsu. Rabyatsiyämänanpä willakurpis o runakuna salvakuyänanpä willakurpis Jesucristupa alli willakuyninta willakuyaptinmi kushikü.
Kawaypis wanuypis Pablupä alli kanqan
Tsaynöllam imaypis kushikü 19Tayta Diosta noqapä mañakuyaptiki y Jesucristupa Espïritun yanapamaptin prësu kaykanqäpita yarqamunäpä kanqanta musyar. 20Mana mantsariypa parlanäpä imaypis yanapamanqannömi autoridäkunapa puntanchöpis yanapamanqa. Tsaymi Jesucristo yanapamanqan musyakanqa kawaykaqta dëjayämaptinpis o wanutsiyämaptinpis.
21Kawarpis Jesucristullapämi kawashä. Wanuptïpis mas allim kanqa.#Gál. 2.20. 22Peru tsaynö kaptinpis mana wanutsiyämaptinqa Jesucristupa willakuynintam imaypis willakushä. Tsaymi wanuypis kawaypis noqapäqa iwallla kaykan.
23Tsaynö kaptinmi mayqanta akraytapis puëdïtsu. Noqapäqa mas allim kanman kay patsata jaqiskir Jesucristupa puntanmanna aywakuptï. 24Peru tsaynö kaptinpis qamkunata yanapanä raykur kawaptïpis allim kanman. 25Tsaymi qamkuna raykur Tayta Dios tsapämaptin autoridäkuna wanutsiyämanqatsu. Tsaynöpam yanapayäshayki Tayta Diosman yärakur kushishqa kawayänaykipä. 26Carcelpita yarqur qamkuna kaqman chämuptïmi pasaypa kushikur Jesucristuta alabashun.
Chikiyaptinpis mana mantsariyänanpä ninqan
27Jesucristupa alli willakuynin ninqannölla imaypis kawayay. Tsaynöpam shamurpis mana shamurpis musyashä ñakarpis llakikurpis Jesucristo munanqannö kawaykäyanqaykita y imaypis kuyanakuykäyanqaykita. Tsaynöllam musyashä runakuna chikiyäshuptikipis Jesucristupa alli willakuyninta willakuykäyanqaykita.
28Jesucristuman yärakuyanqaykipita runakuna chikiyäshuptikipis ama mantsariyaytsu. Tsaynöpam tantiyakuyanqa kikinkuna ushakäyänanpä kanqanta y qamkunata Tayta Dios salvayäshunqaykita. Tsaytaqa Tayta Diosmi ruranqa.
29Manam Jesucristuman yärakunallantsikpätsu Tayta Dios akramarquntsik, sinöqa pay raykur ñakanantsikpämi. 30Ñöpata imanö ñakanqätapis y kanan imanö ñakanqätapis musyayankim.#Hech. 16.19-40. Noqapis y qamkunapis Jesucristupa willakuyninta willakunqantsikpitam ñakashun.
Currently Selected:
Filipenses 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.