YouVersion Logo
Search Icon

Lucas 22

22
Jesústa wanutsiyänanpä willanakuyanqan
Mateo 26.1-5, 14-16; Marcos 14.1-2, 10-11; Juan 11.45-53
1Tsay witsanmi Levadüraynaq Tanta Mikuna fiestapä pöcullana faltaykarqan. Tsay fiestatam Pascua fiesta niyaq.#Éxo. 12.1-27; Deut. 16.1-8. 2Tsay junaqkunam mandaq sacerdötikuna y ley yachatsikuqkuna imanöpapis Jesústa wanutsinanpä willanakuyarqan. Peru paypa favornin runakuna shäriyänanta mantsarmi prësu tsariyta puëdiyarqantsu.
3Tsaypitanam Judas Iscariotipa shonqunman Satanás yaykurqan. Judasqa Jesúspa chunka ishkay discïpulunkunapitam karqan. 4Paymi mandaq sacerdötikunaman y templu cuidaq wardiakunapa capitanninkunaman aywar parlarqan Jesústa imanö entregananpäpis. 5Tsaynö niptinmi sacerdötikuna kushikur pägayänanpä awniyarqan. 6Judasnam shuyararqan runakuna mana kayanqan höra Jesústa entregananpä.
Pascua mikuyta discïpulunkunawan Jesús mikunqan
Mateo 26.17-25; Marcos 14.12-21; Juan 13.21-30
7Levadüraynaq Tanta Mikuna fiesta qallaykunan junaqmi Pascuachö mikuyänanpä carnishta pishtayaq. 8Tsaymi Pedruta y Juanta mandar Jesús nirqan: <<Pascua mikuyta mikunantsikpä alistaq aywayay>>.
9Paykunanam tapuyarqan: <<Taytay, ¿maychötä alistayämushä?>>
10Jesúsnam nirqan: <<Jerusalénman charmi juk runa uylluwan yakuta apaykaqta tariyanki. Tsay runapa qepallanta aywayanki may wayimanpis chanqanyaq. 11Tsaychö wayiyuqta niyanki: <¿Mayqan cuartuchötäshi discïpulunkunawan Pascua mikuyta Jesús mikunqa?> 12Wayiyuqnam altuschö jatun cuartu alistashqata rikatsiyäshunki. Tsaychö mikunantsikpä alistayanki>>.
13Tsaymi paykuna aywar Jesús ninqannölla tariyarqan. Tsaychömi Pascua mikuyta alistayarqan.
Santa Cënapä Jesús yachatsinqan
Mateo 26.26-30; Marcos 14.22-26; 1 Corintios 11.23-25
14Mikuyänanpä höra chämuptinnam apostolninkunawan mësaman Jesús jamakuyarqan. 15Tsaynam Jesús nirqan: <<Imanömi munarqü manarä wanunqäyaq kay Pascua mikuyta qamkunawan mikuyta. 16Noqam nï: Mananam Pascua mikuyta mikushänatsu Tayta Diospa mandakuyninchö yapay mikunqäyaq>>.
17Tsaypitanam vïnuyuq väsuta aptarkur Tayta Diosman agradëcikuskir apostolninkunata nirqan: <<Kaypita llapayki upuyay. 18Noqam nï: Kananpitaqa vïnuta manam yapay upushänatsu hasta Tayta Diospa mandakuynin chämunqanyaq>>.
19Tsaynöllam tantata aptarkur Tayta Diosta agradëcikurqan. Tantata pakiskirnam apostolninkunata makyar nirqan: <<Kayqa cuerpümi. Kay tantata mikur qamkuna raykur wanunqäta yarpäyanki>>.
20Tsaynöllam mikuyta ushaskir vïnuyuq väsuta aptarkur nirqan: <<Kay vïnuqa yawarnïmi. Qamkuna raykur wanur yawarnïta jichaptïmi Tayta Dios mushuq pactuta ruranqa.#Éxo. 24.8; Jer. 31.31-34. 21Peru chikimaqnïkunaman entregamaq runapis noqantsikwan juntum mësachö kaykan. 22Rasunpam Runapa Tsurin Tayta Dios munanqannölla ñakar wanunqa. Peru payta entregaq runam sïqa pasaypa kuyapaypä kanqa>>.
23Apostolninkunanam kikinkunapura tapunakuyarqan: <<¿Mayqantsikrä tsay traicionëru kantsik?>>
Apostolkuna mas mandaq kayta munayanqan
24Tsaypitanam apostolkuna mas mandaq kayta munar kikinkunapura rimanakuyarqan. 25Peru Jesúsnam nirqan: <<Nacionkunapa mandaqnin reykunaqa runakunata munayanqantam ruratsiyan. Tsaynö mandaqkunataqa alli runa kanqantam niyan. 26Qamkunaqa ama tsaynö kayaytsu. Tsaypa rantinqa mayor karpis wamranö llänu shonqu kayay. Mandaq karpis sirviqnöllam kayänayki. 27Shumaq tantiyakuyay. ¿Mësachö täraqku o mikuynin sirviqku mas mandaq? ¿Manaku mësachö täraq mas mandaq? Tsaynö kaptinpis noqaqa qamkunachö sirviqnöllam kaykä.
28<<Imayka ñakaychö kaptïpis noqawanmi qamkuna imaypis kayarquyki. 29Tsaymi mandaq kanäpä Papänï churamanqannö qamkunatapis mandaq kayänaykipä churashayki. 30Qamkunam mandakuynïchö noqawan mikuyanki y upuyanki. Tsaymi trönuykikunaman jamayanki chunka ishkay trïbu Israel runakunata mandayänaykipä>>.
Pedro ñëgananpä kanqanta Jesús ninqan
Mateo 26.31-35; Marcos 14.27-31; Juan 13.36-38
31Tsaypitanam Pedruta Jesús nirqan: <<Simón, Simón, Satanásmi Tayta Diosta mañakushqa trïguta zarandaqnö qamkunapa yärakuynikikunata ushakätsinanpä. 32Tsaymi Tayta Diosta mañakurqü yärakuyniki mana ushakänanpä. Tsaymi yapay yärakamurna discïpulu mayikikunata valuratsinki shumaq yärakayämunanpä>>.
33Pedrunam nirqan: <<Taytay, carcelman apayäshuptikipis manam dëjashaykitsu. Wanutsiyäshuptikipis qamwanmi wanushä>>.
34Jesúsnam nirqan: <<Pedro, noqam nï: Kanan paqas gällu manarä cantaptinmi kimsa kuti ñëgamanki>>.
Discïpulunkuna alistakushqa puriyänanpä Jesús willanqan
35Tsaypitanam apostolninkunata Jesús nirqan: <<Qellayniynaqta, alporjaynaqta y llanqiynaqta willakuyänaykipä mandaptï ¿imallapis faltäyäshurqaykiku?>>
Paykunanam niyarqan: <<Manam imapis faltäyämarqantsu>>.
36Jesúsnam nirqan: <<Kananpitaqa qellaytapis alporjatapis apayanki. Espädaykikuna mana kaptinqa punchuykikunata rantikuskir rantiyanki. 37Noqam nï: Tayta Diospa palabranchömi noqapä nin: <Jutsayuq runanöllam wanurqan>.#Isa. 53.12. Tsay ninqannöllam noqata päsamanqa>>.
38Apostolninkunanam niyarqan: <<Taytay, kaychö ishkaymi espädäkuna kaykan>>.
Niyaptinmi Jesús nirqan: <<¡Tsaynöllana!>>
Getsemaníchö Jesús mañakunqan
Mateo 26.36-46; Marcos 14.32-42
39Tsaypita yarquskirnam imaypis aywanqannö Olivos jirkanman Jesús aywarqan. Discïpulunkunanam qepanta aywayarqan. 40Tsayman chaykurnam nirqan: <<Tayta Diosta mañakuyay Satanás mana tentayäshunaykipä>>.
41Tsaynö niskirnam washaläninkunaman witiykur qonquriykur Tayta Diosta mañakur 42nirqan: <<Papä, cöpachö wiñaraykaq castïguykita ama upuykatsillämaytsu.#Sal. 75.8; Isa. 51.17; Jer. 25.15-29. Peru noqa munanqänöqa ama katsuntsu, sinöqa qam munanqaykinö kaykullätsun>>.
43[Tsaynö llakikur rugakuykaptinmi ciëlupita juk ángel yuripuskir valuratsirqan. 44Pasaypa llakikurmi jumpinpis yawarnörä patsaman jutunqanyaq Tayta Diosman mas jinchipa mañakurqan.]
45Tsaypita discïpulunkuna kaqman kutirmi llakikuywan punukashqata tarirqan. 46Jesúsnam nirqan: <<¡Imanirtä punuykäyanki! Sharkur Tayta Diosta mañakuyay Satanás mana tentayäshunaykipä>>.
Jesústa prësu tsariyanqan
Mateo 26.47-56; Marcos 14.43-50; Juan 18.1-11
47Jesús tsaynö parlaykaptinmi apostolnin Judas Iscariote atskaq runakunata pushashqa charqan. Jesúsman witiykurmi cäranchö mutsaykurqan. 48Jesúsnam nirqan: <<Judas, ¿mutsaskirku Runapa Tsurinta entreganki?>>
49Jesústa prësu tsariyänanpä kanqanta tantiyaskirmi discïpulunkuna niyarqan: <<Taytay, ¿espädäkunawanku qokachaskayämushä?>>
50Tsaynö nirmi juk discïpulun mas mandaq sacerdötipa sirviqninpa derëcha kaq rinrinta jipikaqpä walluskirqan. 51Jesúsnam nirqan: <<¡Ama tsayta rurayaytsu!>> Tsaypitanam runapa rinrinta yataykullar alliskatsirqan.
52Jesústa prësu apayänanpä shamuqkunam kayarqan mandaq sacerdötikuna, templu cuidaq wardiakunapa capitanninkuna y Israel mayor runakuna. Paykunatam Jesús nirqan: <<¿Imanirtä suwamannö espädaykikunawan y qeruykikunawan shayämurquyki? 53Qoyay qoyay templupa patiunchö qamkunawan kaykaptï ¿imanirtä tsaychö prësu tsariyämarqaykitsu? Kananmi sïqa höra chämushqa Satanáspa poderninta rurayänaykipä>>.
Jesústa Pedro ñëganqan
Mateo 26.57-58, 69-72; Marcos 14.53-54, 66-72; Juan 18.12-18, 25-27
54Tsaypitanam Jesústa prësu tsariskir mas mandaq sacerdötipa wayinman apayarqan. Pedrunam karu qepallanta aywarqan. 55Sawan rurinchömi ninata tsarirkatsir runakuna mashakuykäyarqan. Tsayman yaykuskirmi Pedrupis paykunawan mashakuykarqan. 56Pedro mashakuykaqta rikaykurmi juk sirviq warmi nirqan: <<Kay runapis paywanmi purishqa>>.
57Pedrunam ñëgar nirqan: <<¡Warmi, paytaqa manam reqïtsu!>>
58Tsaypita rätuntanam juk runapis payta rikaykur nirqan: <<Qampis paywan puriqmi kanki>>.
Pedrunam nirqan: <<¡Runa, manam paywan imaypis purirqütsu!>>
59Tsaypita juk höratanönam yapay juk runa nirqan: <<Rasunpam kay runaqa paywan purishqa. Paypis Galilea runam>>.
60Pedrunam nirqan: <<¡Runa, manam musyätsu imata parlanqaykitapis!>>
Pedro parlayta manarä ushaptinmi gällu cantaskirqan. 61Tsay höram Pedruman Jesús tikraykur rikaskirqan. Pedrunam yarpaskirqan Jesús ninqanta: <<Manarä gällu cantaptinmi kimsa kuti ñëgamanki>>.
62Tsaymi waqtaman yarquskir pasaypa pësakurnin waqarqan.
Jesústa ashllir maqayanqan
Mateo 26.67-68; Marcos 14.65
63Tsaypitanam Jesústa cuidaq runakuna burlakurnin maqayarqan. 64Ñawinta tsaparkurmi [laqyar] niyarqan: <<Pï maqashunqaykitapis mä niyämay>>.
65Tsaynöllam imaykata ashllirnin burlakuyarqan.
Autoridäkuna Jesústa tapuyanqan
Mateo 26.59-66; Marcos 14.55-64; Juan 18.19-24
66Patsa waraskiptinnam Israel mayor runakuna, mandaq sacerdötikuna y ley yachatsikuqkuna qorikäyarqan. Paykunapa despächunman chätsiyaptinmi Jesústa tapuyarqan: 67<<Mä niyämay. ¿Rasunpaku Tayta Dios mandamunqan Cristo kanki?>>
Jesúsnam nirqan: <<Awmi niptïpis manam criyiyämankitsu. 68Tapuptïpis manam contestayämankitsu [ni dëjayämankitsu]. 69Peru kananpitaqa Runapa Tsurin poderyuq Tayta Diospa derëcha kaq lädunchömi jamaranqa>>.#Sal. 110.1.
70Autoridäkunanam niyarqan: <<Tsaynö kaptinqa ¿Diospa Tsurinku kanki?>>
Jesúsnam nirqan: <<Qamkuna niyanqaykinöllam kä>>.
71Paykunanam niyarqan: <<Diospa Tsurin kanqanta kikin nikämashqaqa ¿imapänatä testïgutapis ashishun?>>

Currently Selected:

Lucas 22: qxo

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy