Lucas 15
15
Oqrakashqa üshaman Jesús iwalatsinqan
Mateo 18.12-14
1Jesús yachatsinqanta wiyayänanpämi impuestu cobrakuqkunapis jutsasapakunapis aywayarqan. 2Tsayta rikaykurnam fariseukuna y ley yachatsikuqkuna jamur niyarqan: <<¿Imanirtä kay runaqa jutsasapakunawan qorikaykur mikun?>>
3Tsaynö niyaptinmi iwalatsiypa willar Jesús nirqan: 4<<Pipis pachak (100) üshankunapita jukta oqraykurqa ¿manaku isqun chunka isqun (99) kaqta jaqiykur juklla ashiq aywan? 5Tariskirnam kushishqa matankakurkur apan. 6Wayinman chaykatsirnam amïgunkunata y vecïnunkunatapis qayaykur nin: <¡Llapantsik kushikushun! ¡Oqranqä üshätam tarimurqü!>
7<<Noqam nï: Tsay runa üshanta tariykur kushikunqannöllam ciëluchöpis kushikuyan juk runallapis jutsankunata dëjaskir Tayta Dios munanqannöna kawaptin. Tsaynö kushikuyan isqun chunka isqun (99) alli ruraq runakunapä kushikuyanqanpitapis masrämi.
Oqrakashqa qellayman Jesús iwalatsinqan
8<<Pï warmipis chunka qellayninpita jukta oqraykurqa ¿manaku aktsita tsarirkatsir juklla wayinta pitsapakun tarinqanyaq? 9Tariykurnam yanasankunata y vecïnankunata qayaykur nin: <¡Llapantsik kushikushun! ¡Oqranqä qellaynïtam tarirqü!> 10Tsaynöllam juk runallapis jutsanta dëjar Tayta Dios munanqannö kawaptin Tayta Diospa angelninkunapis kushikuyan>>.
Aywakuq jövinman Jesús iwalatsinqan
11Mastam Jesús nirqan: <<Juk runapash ishkay tsurinkuna kanä. 12Tsayshi qepa kaq tsurin papäninta ninä: <Papä, herenciäta rakipaykamay>. Tsaynö niptinshi ishkan tsurinkunata papänin rakipunä.
13<<Tsaypita juk ishkay junaqllatanash qepa kaq tsurin llapan chaskinqankunata rantikuskir karu markapa aywakunä. Tsaychöshi mana allikunata rurar llapan qellayninta ushaskinä. 14Tsaynö ushakäpakushqa kaykaptinnash tsay markachö pasaypa hambrüna kanä. Tsayshi tsay jövin pasaypa mallaqar 15aruyta ashiptin tsay markachö täraq juk runa kuchinkunata mitsinanpä chaskinä. 16Tsaychöshi pasaypa mallaqar kuchikunapa mikuynintapis mikuyta munanä. Tsaynö mallaqaptinpis manash pipis qaranätsu.
17<<Yarpachakurnash ninä: <Kaychö mallaqar kaykaptï papänïpa peonninkunaqa pacha junta mikurchi kaykäyan. 18Kanan kutiykurmi papänïta nishä: <<Papä, qamta y Tayta Diosta ajätsirmi jutsata rurarqü. 19Amana tsurikitanöqa chaskimaytsu, sinöqa peonnikitanöllana chaskiykallämay>> >. 20Tsaynö yarpachakuskirnash papänin kaqpa kutikunä.
<<Karullatarä kutiykaqta rikaykurshi papäninqa kushikurnin cörrilla aywar makallakurkur mutsanä. 21Tsurinnash ninä: <Papä, qamta y Tayta Diosta ajätsirmi jutsata rurarqü. Amana tsurikitanöqa chaskimaytsu>.
22<<Peru papäninnash sirviqninkunata ninä: <Juklla mas allin kaq röpakunata jipiskamur tsurïta jatitsiyay. Tsaynölla sortïjata y llanqitapis jatitsiyay. 23Tsaypita wera kaq torïtuta pishtayay fiestata rurar mikunantsikpä. 24¡Kay tsurïqa wanunqanpitam kawamushqa! ¡Oqrakanqanpitam kutimushqa!> Tsaynö nirshi fiestata rurar qallaykuyänä.
25<<Mayor kaq tsurinqa chakrachöshi kaykänä. Wayiman chaykarnash fiestachö müsicata wiyanä. 26Tsayshi juk sirviqninta qayaykur wayichö ima päsanqantapis tapunä. 27Sirviqninnash ninä: <¡Wawqikim kutimushqa! Yamaylla kutimunqanpitam papäniki kushikur wera torïtuta pishtatsishqa>.
28<<Tsaynö willaptinshi pasaypa rabyarnin wayinman yaykuytapis munanätsu. Tsaynash papänin aywar yaykunanpä kutin kutin ruganä. 29Tsayshi papäninta ninä: <Atska watanam sirvirniki llapan mandamanqaykikunata imaypis ruraykä. Tsaynö sirviykaptïpis manam ni juk malta cabrallatapis qaramarquykitsu amïgükunawan mikuyänäpä. 30¡Peru kay tsurikiqa prostitütakunawan qellaynikita ushaskir kutiykamuptinmi sïqa wera torïtuta pishtatsirquyki!>
31<<Papäninnash ninä: <Hïju, mana yarquypam noqawan kaykanki. Llapan imaykäkunapis qamllapämi kaykan. 32Peru imanö kaptinpis fiestata kushishqa rurashun. ¡Kay wawqikiqa wanunqanpitam kawamushqa! ¡Oqrakanqanpitam kutimushqa!> >>
Currently Selected:
Lucas 15: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.