Judas 1
1
Judas saludanqan
1Yärakuq mayikuna:
Noqa Judasmi,#Mat. 13.55; Mar. 6.3. Jesucristupa sirviqnin y Santiagupa wawqin kar, kay cartata qamkunapä cartakamü. Tayta Dios kuyayäshurnikim salvayäshunaykipä qayayäshurquyki. Tsaymi imayka mana allikunapitapis Jesucristo tsapäyäshunki. 2Tayta Dios kuyapäshurniki imaypis kuyanakur alli kawayänaykipä yanapaykuyälläshuy.
Llutan yachatsikuqkunata mana chaskiyänanpä ninqan
2 Pedro 2.1-17
3Kuyay wawqikuna y panikuna, noqa yarparqä Jesucristo salvamanqantsikta cartakamuytam. Tsaynö yarparpis llutan yachatsikuqkunata pärapuyänaykipämi cartakamü. Tayta Diospa willakuyninqa manam ni imaypis trocakantsu ni yapakantsu. Tsay willakuynintam Tayta Dios mayna tantiyatsimarquntsik.
4Tsay llutan yachatsikuqkunaqa Tayta Diospa willakuqnin tukurmi qamkunaman chäyämushqa. Paykunaqa Tayta Diosta mana mantsapakurmi runakunata criyitsir niyan: <<Jutsa rurayta mana dëjashqapis Tayta Diosqa perdonamäshunmi>>.
Tsaynö nirqa llapanpä poderösu Tayta Diosnintsikta y Señornintsik Jesucristutapis ñëgayanmi. Tsaynö yachatsiq runakunaqa infiernuman qaykushqa kayänanpämi destinashqa kaykäyan.
5Musyayanqaykinöpis Israel runakunata Egiptupita Señornintsik jipimurmi#Éxo. 12.51. mana cäsukuqkunataqa ushakätsirqan.#Núm. 14.29-30. 6Tsaynöllam Tayta Diosta mana cäsuyanqanpita juiciu final chämunqanyaq wakin angelkunatapis tsakaykaq paqasman wichqashqa. 7Tsaynöllam Sodomachö, Gomorrachö y cercan markakunachö täraq runakunapis pasaypa penqakuypä jutsata rurayarqan. Tsaymi runakuna tantiyayänanpä tsay markakunata Tayta Dios ninawan ushakätsirqan.#Gén. 19.1-24.
8Tsay markakunachö täraq runakunanöllam tsay llutan yachatsikuqkuna mana penqakuypa chïnäkur puriyan. <<Kikïmi poderyuq kä>> nirmi pitapis cäsuyantsu. Tsaynö kawayänanpämi sueñuyninchö Tayta Dios revelanqanta niyan.
Paykunaqa angelkunapä y supaykunapäpis shiminman chanqantam imatapis parlayan. 9Tsaynö parlayaptinpis angelkunapa mandaqnin Miguelqa#Dan. 10.13, 21; 12.1; Apoc. 12.7. manam tsaynötsu parlan. Moiséspa ayanta#Deut. 34.6. diablu apayta munaptinmi ollqutupänanpa rantin nirqan: <<¡Tayta Diosmi upällakunaykipä nishunki!>>#Zac. 3.2. 10Tsay llutan yachatsikuqkunaqa mana tantiyayarmi manakaqkunata parlayan. Paykunaqa ashmakunanö mana tantiyakuq karmi imatapis llutanta rurayan. Tsaynö kayanqanpitam ushakäyanqa.
11¡Paykunaqa imanörä ñakayanqa! Caín#Gén. 4.3-9; Heb. 11.4; 1Juan 3.12. wawqinta chikir wanutsinqannö y Balaam#Núm. 22.1-35; Apoc. 2.14. qellaypä mallaqashqa kanqannömi paykunapis kaykäyan. Moiséspa contran parlanqanpita Coré#Núm. 16.1-35. ushakanqannömi tsay llutan yachatsikuqkunapis illaqpita ushakäyanqa.
12Kuyanakur juntu mikuyanqaykichö mana penqakuypam lluta tsariskir mikuyan. Kikillankunapämi imatapis ashiyan. Usya witsan tsaki pukutay wakpa kaypa aywaqnömi kaykäyan. Wayunanpä tiempunchöna kaykarpis wayuyniynaq tsakishqa jachanömi kaykäyan. Tsaymi llukiptin tsakiq jachanö kaykäyan. 13Tukuy niraq qanrata lamar jitamunqannömi paykunapis penqakuypä kaqkunata ruraykäyan. Estrëlla shushuqnömi tsakayman qaykushqa kayanqa.
14Adánpa willkanpa willkanpa willkanmi karqan Enoc.#Gén. 5.18, 21-24. Paymi Tayta Diospa profëtan kar tsay llutan yachatsikuqkunata Tayta Dios juzgananpä kanqanta nirqan: <<Tayta Diostam rikarqü waranqanpa santu angelninkunawan shamuykaqta. 15Paymi llapan runakunata juzganqa mana mantsariypa jutsata rurayanqanpita y paypa contran parlayanqanpitapis>>.
16Tsay llutan yachatsikuqkunaqa imallapitapis wakintam manakaqman churayan. Paykunapäqa manam imapis allitsu. Yarpäyanqantam imatapis ruratsiyan. Runa tukurmi shimin tarinqanta imatapis parlayan. Yarpäyanqanta ruratsiyänan raykurmi alli shimillanpa parlapäyan.
Jesúsman yärakuqkunata valuratsinqan
17Kuyay wawqikuna y panikuna, yarpäyay Señornintsik Jesucristupa apostolninkuna 18niyanqanta: <<Ultimu tiempuchöqa Jesucristupa willakuyninta manakaqman churaq runakunam yuriyämunqa. Paykunaqa Tayta Diosta cäsuyänanpa rantinmi kikinkuna munayanqannö jutsata rurar kawayanqa>>.#2Tim. 3.1-5; 2Ped. 3.3.
19Tsay ninqannöllam llutan yachatsikuqkuna kanan yuriyämushqa. Paykunam jutsayuq kaykäyan wawqikuna y panikuna chikinakurnin iglesiapita qarqunakuyänanpä. Espíritu Santuta mana chaskikushqa karmi munayanqannö jutsata rurar kawayan.
20Kuyay wawqikuna y panikuna, Jesucristupa willakuyninta yachakushqa kaykarqa payman yärakur imaypis kawayay. Tsaynölla Espíritu Santu tantiyatsiyäshunqaykinö Tayta Diosta mañakuyay. 21Tayta Dios kuyaykäyäshuptikiqa imaypis payta cäsuyay. Señor Jesucristo kutimunanpä kanqanta musyaykarqa alistakushqalla shuyaraykäyay. Pay kutimurmi kuyapäyäshurniki imayyaqpis kushishqa kawayänaykipä pushayäshunki.
22Tsaynö kaykaptinqa manarä shumaq yärakuq wawqikunata y panikunata Jesucristuman yärakuyänanpä tantiyatsiyay. 23Wakinta imayka ninapita jipiqnö tantiyatsiyay. Wakintana kuyapar alli shimillaykikunapa parlapäyay. Paykunawan qorikarpis cuidädutä mana alli rurayninkunata yachakuyankiman.
Tayta Diosta alabanqan
24Tayta Dios alabashqa kaykullätsun. Paymi jutsa rurayman mana ishkiyänaykipä poderninwan imaypis yanapayäshunki. Imayyaqpis kushishqa kawayänaykipämi jutsaynaqtana puntanman pushayäshunki. 25Pay kikillanmi [yachaq] Tayta Dios. Señornintsik Jesucristo noqantsik raykur wanuptinmi salvamarquntsik. Payqa llapanpä poderyuqmi y imayyaqpis reymi. Tsaynö kanqanpita kananpis, waraypis y imayyaqpis alabashqa kaykullätsun. Amén.
Currently Selected:
Judas 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.