Juan 14
14
Jesús näni kanqan
1<<Ama llakikuyaytsu. Tayta Diosman y noqamanpis criyiyay. 2Papänïpa wayinchöqa atskam cuartukuna kaykan. Tsaynö mana kaptinqa manam: <qamkunapä alistaq aywashä> nïmantsu karqan. 3Alistaskamurnam qamkunata pushanäpä kutimushä. Tsaynöpam noqa kanqä kaqchö qamkunapis kayanki. 4Musyayankim mayqan nänipa tsayman chäyänaykipä kanqantapis>>.
5Tomásnam nirqan: <<Taytay, maypa aywanaykipä kanqantapis mana musyaykarqa ¿imanöpatä nänitapis reqiyäshä?>>
6Jesúsnam nirqan: <<Noqam näni kä, rasun kaqmi kä y runakunata kawayta qaraqmi kä. Noqata mana chaskimarqa Papänï kaqman manam pipis chanqatsu.#Mat. 11.27; Juan 1.18; 6.46; Hech. 4.12. 7Noqata reqimarqa Papänïtapis reqiyankim. Tsaymi kananpitaqa rikashqana kar reqiyankina>>.
8Felipinam nirqan: <<Taytay, Tayta Diosta reqiykatsillämay. Reqitsimaptikiqa mananam tapushaykinatsu>>.
9Jesúsnam nirqan: <<Felipe, unayna qamkunawan kaykaptï ¿manaku reqimanki? Noqata reqimaq kaqqa Papänïtapis reqinmi. Reqiykämarqa ¿imanirtä: <Papänikita reqitsimay> nimanki? 10¿Manaku criyinki Papänïwan jukllaylla kanqäta y Papänïpis noqawan jukllaylla kanqanta? Llapan ninqäkunaqa manam kikïpa yarpaylläpitatsu, sinöqa noqachö kaykaq Papänïpitam. Paymi munanqanta noqawan ruran. 11Papänïwan jukllaylla kanqäta y paypis noqawan jukllaylla kanqanta nikaptïqa criyiyämankiman. Ninqäkunata mana criyirpis milagru ruranqäkunata rikaykarqa criyiyämay.
12<<Rasunpam nï: Papänï kaqman aywakuptï noqaman criyimuqkuna noqa ruranqänömi rurayanqa. Mas espantaypä kaqkunatam rurayanqa. 13Noqapa jutïchö imatapis Papänïta mañakuyaptikiqa rurashämi. Tsurin karmi tsaynö rurashä Papänï alabashqa kananpä. 14Jutïchö imatapis mañakuyaptikim mañakayämanqaykita rurashä.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22; 5.14-15.
Espíritu Santuta mandamunanpä Jesús ninqan
15<<Noqata kuyamarqa llapan mandamientükunata cäsuyay.#Deut. 6.4-9; 11.1. 16Tayta Diosta mañakuptïmi juk Yanapakuqta mandamunqa. Paymi imayyaqpis qamkunawan kanqa. 17Payqa rasun kaqta tantiyatsikuq Espíritu Santum. Tayta Diosta mana cäsuqkunaqa Espíritu Santutapis manam chaskiyanqatsu. Tsaynö chaskiyanqatsu payta mana ashir y payta mana reqirmi. Peru qamkunam sïqa reqiyanki. Tsaynö reqiyanki qamkunawan kaptin y qamkunachö kananpä kaptinmi.
18<<Qamkunataqa manam waktsatatsu jaqiyäshayki, sinöqa kutimushämi. 19Pöcu tiempullanam faltan runakuna manana rikayämänanpä. Qamkunam sïqa rikayämanki. Noqa kawanqäpitam qamkunapis kawayanki. 20Tsay junaqmi tantiyayanki Papänïchö noqa kanqäta, noqachö qamkuna kayanqaykita y qamkunachö noqa kanqäta. 21Mandamientükunata cumpliq runaqa rasunpam kuyaman. Kuyamaq kaqtaqa Papänïpis kuyanmi. Noqapis kuyarmi paywan kaykäshä>>.
22Mana Iscariote kaq Judasnam tapurqan: <<Taytay, noqakunawan kaykarqa ¿imanirtä wakin runakunawanpis kankitsu?>>
23Jesúsnam nirqan: <<Pipis kuyamarqa ninqäkunatam cäsukun. Kuyamaq kaqtaqa Papänïpis kuyanmi. Tsaymi Papänïwan shamur imayyaqpis paywan kaykäshä. 24Noqata mana kuyamarqa ninqäkunata manam cäsuntsu. Noqa ninqäkunaqa manam kikïpa yarpaynïpitatsu, sinöqa mandamaqnï Papänïpitam.
25<<Qamkunawan kanqäyaqmi llapan kaykunata nï. 26Peru aywakuptïnam sïqa noqapa trokï Yanapakuq Espíritu Santuta qamkunaman Papänï mandamunqa. Paymi llapanta yachatsiyäshunki y llapan yachatsinqäkunata yarpätsiyäshunki.
27<<Alli kawaytam qamkunata dëjapü. Alli kawaynïtam qamkunata qarä. Noqa yanapanqänö manam pipis yanapashunkitsu. Ama llakikuyaytsu ni mantsariyaytsu. 28Aywakurpis kutimunäpä kanqantam qamkunata nirqüna. Papänï kaqman aywakuptï ama llakikuyankitsu. Payqa noqapita mas poderyuqmi. Rasunpa kuyayämarqa llakikuyänaykipa rantin kushikuyankimanmi. 29Qamkunata tsaynö willä manarä aywakurmi. Aywakuptïnam ninqäkuna rasunpa kanqanta musyayanki.
30<<Kay patsapa mandaqnin shamuykannam.#14.30 Kay patsapa mandaqninpä parlarqa Satanáspämi Jesús parlarqan. Tsaymi qamkunawan alläpaqa parlashänatsu. Wanutsimänanpäqa manam paypa podernin kantsu. 31Peru tsaynö kaptinpis Papänï nimanqanta cumplirmi wanutsimänanpä dëjashä. Tsaynöpam runakuna musyayanqa Papänïta kuyanqäta. ¡Shäriyay, kaypita ras aywakushun!>>
Currently Selected:
Juan 14: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.