2 Pedro 1
1
Apóstol Pedro saludanqan
1Criyikuq mayikuna:
Noqa Simón Pedrum, Jesucristupa sirviqnin y apostolnin kar, qamkunaman kay cartata cartakamü. Qamkunatapis Jesucristo kuyayäshurnikim noqakunatanö salvayäshurquyki. Payqa Diosnintsik y salvamaqnintsikmi. 2Qamkunapämi mañakü Tayta Diosta y Señornintsik Jesucristuta reqiyaptiki kuyapäyäshunaykipä y qoyay qoyay alli kawayta qarayäshunaykipä.
Tayta Dios munanqannö kawanapä ninqan
3Payta reqishqam munanqannö kawanapä Tayta Dios poderninwan imaykanöpa yanapamantsik. Kuyapäkuq y alli ruraq karmi tsaynö kawanapä qayamarquntsik. 4Tsaynöllam imaypis yanapamänantsikpä awnimarquntsik. Tsaynö yanapamäshun jutsaynaq kanqannö noqantsikpis jutsa rurayta dëjaskir jutsaynaqna kanantsikpämi.
5Tsaynö kaykaptinqa Tayta Diosman imaypis criyiyay. Payman criyikur allita rurayay. Allita rurar palabranta yachakuyay. 6Palabranta yachakur mana alli yarpayta vinciyay. Mana alli yarpayta vincir wanuyanqaykiyaq cäsukuyay. Cäsukur Tayta Dios munanqannö imaypis kawayay. 7Tayta Dios munanqannö kawar juk castanölla alli rikanakuyay. Alli rikanakur pïmaywanpis kuyanakur kawayay.
8Qoyay qoyay tsaynö kawayaptikiqa Señornintsik Jesucristuta reqiyanqayki manam wallällatsu kanqa. 9Tsaynö mana kawarqa qapra runa rikayta mana puëdinqannömi Tayta Dios perdonayäshunqaykitapis qonqaskiyarquyki.
10Wawqikuna y panikuna, Tayta Dios qayayäshunqaykita y akrayäshunqaykita shumaq tantiyayänaykipä imaykanöpapis pay munanqannö kawayay. Tsaynöpam jutsa rurayman imaypis ishkiyankitsu. 11Tsaynöpam mandakuyninman chäyaptiki salvamaqnintsik Señor Jesucristo kushishqa chaskiyäshunki.
12Tsaymi unayna musyayaptikipis y Diospa willakuyninta shumaq yachakushqa kayaptikipis tsaykunata imaypis yarpätsiyäshayki. 13Kawaykarräqa tsaykunata imaypis yarpätsishaykim. 14Wanunäpäna kanqäta Señor Jesucristo musyatsimashqa kaptinmi 15qamkunata yarpätsï wanuptïpis yätsinqäkunata imaypis yarpäyänaykipä.
Jesucristo kutimunanpä ninqan
16Señornintsik Jesucristo poderyuq kanqanta y kutimunanpä kanqanta manam yarpaylläpitatsu yachaykätsï, sinöqa chipipiykaqta kikï rikashqa karmi yachaykätsï. 17Chipipiykaqman tikraptinmi Tayta Dios gloriapita nimurqan: <<Paymi kuyay Tsurï. Paypitam kushikü>>. 18Tsaynö nimunqanta kikïmi wiyarqü sagrädu jirkachö Jesucristuwan kaykar.#Mat. 17.1-5; Mar. 9.2-7; Luc. 9.28-35.
19Tsaymi masrä tantiyantsik profëtakuna willakuyanqankuna rasunpa kanqanta. Tsaynö kaykaptinqa profëtakuna qellqayanqankunata shumaq cäsuyay. Tsaykunaqa tsakaychö aktsi atsikyanqannömi. Tsaynö cäsuyay patsa waraptin waraq lucëru shonquykikunachö atsikyanqanyaq.#1.19 Waraq lucëru shonquykikunachö atsikyanqanyaq ninanqa Jesucristo kutimunqanyaq ninanmi.
20Shumaq tantiyayay. Ama yarpäyaytsu Tayta Diospa palabranta runakuna yarpayllanpita qellqayanqanta. 21Tayta Diospa profëtankuna manam imaypis kikinkunapa yarpayllanpitatsu qellqayarqan, sinöqa Espíritu Santu tantiyatsiptinmi Tayta Diospa yarpayninta qellqayarqan.#2Tim. 3.16.
Currently Selected:
2 Pedro 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.