2 Corintios 1
1
Carta qallanan
1Corinto markachö#Hech. 18.1. y Acaya provinciachö kaykaq criyikuq mayikuna:
Tayta Dios akramashqa kaptinmi Jesucristupa apostolnin kar noqa Pablo wawqintsik Timoteuwan cartakayämü. 2Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.
Ima ñakaychö kashqapis Tayta Dios yanapamanqantsik
3¡Señor Jesucristupa Papänin Tayta Dios alabashqa kaykullätsun! Paymi kuyapämantsik y imaypis valuratsimantsik. 4Ima ñakaychö kashqapis valuratsimantsik noqantsikpis criyikuq mayintsikkuna ñakayaptin valuratsinantsikpämi. Tsaymi Tayta Dios valuratsimanqantsiknö wakinkunatapis valuratsintsik.
5Noqakunatapis Jesucristuman criyikuyanqäpita runakuna ñakatsiyämaptin Jesucristuwanmi Tayta Dios valuratsiyäman mana ajayaypa criyikuyänäpä. 6Tsaynö valuratsiyämaptinmi shumaq tantiyayä qamkunatapis valuratsiyänäpä kanqanta. Tsaynöpam ñakayaptïpis salvacionta chaskir kushikuyanki. Tsaymi noqakuna ñakayanqänö ñakarpis Tayta Diosman mana ajayaypa criyikuyanki. 7Musyayämi noqakunanö ñakayaptikipis noqakunatanö Tayta Dios yanapayäshunaykipä kanqanta.
8Wawqikuna y panikuna, Asia provinciachö runakuna pasaypam ñakatsiyämashqa. Pasaypa ñakatsiyämaptin mana awantarmi kawayänäpä kanqantapis yarpäyarqänatsu.#1Cor. 15.32. 9Wanutsiyämänanpä kanqanta yarparmi tantiyakuyarqä kikilläkunapitaqa imatapis mana puëdiyanqäta. Tsaynöpam yachakuyarqä wanuqkunata kawatsimuq Tayta Diosman mas yärakuyta.
10Wanutsiyämänanpä kanqanta yarpäyaptïpis Tayta Diosmi salvayämashqa. Manam tsayllachötsu yanapayämashqa, sinöqa imaypis yanapaykäyämanmi. 11Tayta Diosta noqakunapä mañakurmi qamkunapis yanapaykäyämanki. Tsaynö atskaq mañakuyaptinmi payta atskaq agradëcikuyanqa.
Corintuman Pablo imanir mana aywanqanpis
12Qamkunata ni wakintapis mana llullapaypa y mana engañaypam kawaykäyä. Rasunpa tsaynö kayanqäta mana penqakuypam niyä. Tsaynö alli kawayänäpä Tayta Diosmi imachöpis yanapayäman. 13Cartakayämurpis tantiyayänaykipä kaqllatam qellqayämurqü. Ojalä imayllapis shumaq tantiyayankiman. 14Kanan mana tantiyarpis Señor Jesucristo kutimuptin noqakuna qamkunapä kushikuyanqänömi qamkunapis noqakunapä kushikuyanki.
15Shumaq tantiyayänaykipä kanqanta yarparmi Macedonia provinciapa shamur qamkuna kaqman puntata chämuyta yarpäyarqä. Yarpäyanqänö kaptinqa qamkuna kaqman ishkay kutinam chäyämüman karqan. 16Puntataqa Macedonia provinciapa päsaqnöllam chämuyta yarpäyarqä. Kutimurpis yapay chämuytam yarpäyarqä. Qamkuna kaqman chäyämuptï Judeamanna aywayänäpä yanapayämänaykitam munayarqä.#Hech. 19.21.
17Peru manam yarpäyanqänötsu kashqa. Willakatsimunqänö mana shayämuptï ¿imanirtä wakiki niyanki shumaq mana yarpachakuypa willakatsimunqäta? ¿Imanirtä yarpäyanki awnirkurpis mana shayämunäpä kanqanta? 18Mana cumpliyänäpä kanqanta musyaykarqa noqakuna imaypis manam awniyätsu. 19Tayta Diospa Tsurin Jesucristupis kay patsachö kar rasun kaqllatam pïmaytapis nirqan. Paypa willakuynintam Silvano#1.19 Silvanupa jukaq jutinmi Silas (Hech. 15.22, 40)., Timoteo y noqapis qamkuna kaqchö willakuyarqü.#Hech. 18.5. 20Jesucristuta mandamurmi Tayta Dios llapan awninqankunata cumplin. Tsaymi Jesucristuman criyikur Tayta Diosta alabar <<¡Amén!>> nintsik.
21Payta sirvinantsikpä churamarnintsikmi Jesucristuman mana ajayaypa criyikunantsikpä yanapamantsik. 22Tsaynöllam shonquntsikchö kananpä Espíritu Santuta mandamur payllapana kanantsikpä sëllamarquntsik.#Efe. 1.13; 4.30. Espíritu Santuta chaskirmi musyantsik Tayta Dios llapan awnimanqantsikta cumplinanpä kanqanta.
23Wawqikuna y panikuna, Tayta Diospa jutinchömi rasun kaqta nï: Shamuyta yarparpis qamkunawan qallayätsinakuyta mana munarmi shamurqürätsu. 24Qamkunata mandar qallayätsiyänäpa rantinmi qamkunawan juntu Tayta Diosta sirviyta munayä. Tsaynöpam Tayta Diosman criyikur qamkunapis kushishqa kawayanki.
Currently Selected:
2 Corintios 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.