1 Corintios 1
1
Carta qallanan
1Jesucristupa apostolnin kanäpä Tayta Dios qayamashqa kaptinmi noqa Pablo wawqintsik Sósteneswan cartakayämü.
2Corinto markachö#Hech. 18.1. Tayta Dios kuyanqan criyikuqkuna: Qamkunapämi Tayta Dios nirqan: <<Paykunaqa Jesucristuchö santum kayan>>. Tsaynö kayaptikim qayayäshurqayki pay munanqannö santu kawayänaykipä. Tsaynöllam maychö täyaptinpis payman llapan yärakuqkunata qayashqa. Tsaymi Jesucristuqa paykunapa y noqantsikpapis Señornintsik kaykan. 3Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.
Tayta Diosta Pablo agradëcikunqan
4Tayta Diostam qamkunapä imaypis agradëcikü. Jesucristuwan jukllayllanö kayaptikim kuyapäshurniki imaypis yanapaykäyäshunki. 5Llapanchöpis yanapayäshuptikim tantiyayanki y alli willakuyanki. 6Jesucristupa willakuyninman criyikuyänaykipä yanapayäshunqaykinöllam kananpis yanapaykäyäshunki. 7Tsaymi Señor Jesucristo kutimunqanyaq shuyäyaptiki ima yachaynikikunapis faltäyäshunkitsu. 8Paymi yanapaykäyäshunki kutimur pay munanqannö kawaykaqta tariyäshunaykipä. 9Tayta Diosqa awninqanta imaypis cumplinmi. Paymi Tsurin Señornintsik Jesucristuwan jukllayllanö kawayänaykipä qayayäshurquyki.
Juk shonqulla kawayänanpä yachatsinqan
10Wawqikuna y panikuna, Señor Jesucristupa jutinchömi qamkunata rugä mana chikinakuypa juk shonqulla y tsay yarpaylla kawayänaykipä. 11Panintsik Cloé castakuna shamurmi willayämashqa kikikikunapura chikinakur rimanakur kawayanqaykita. 12Wakikish noqata qatiräyämanqaykita niyanki, wakikish Apolusta#Hech. 18.24. qatiräyanqaykita niyanki, wakikish Cefasta#1.12 Cefasqa Pedrupa jukaq jutinmi karqan. qatiräyanqaykita niyanki y wakikinash Jesucristuta qatiräyanqaykita niyanki.
13Tsaynö nirqa llutantam nikäyanki. ¿Acäsu Jesucristuqa atskaman rakikashqaku kaykan? ¿Acäsu noqaku qamkuna raykur cruzchö wanurqü? ¿Acäsu noqapa jutïchöku bautizakuyarquyki? 14Tayta Diostam agradëcikü qamkuna kaqchö kaykar Crisputa#Hech. 18.8. y Gayullata#Hech. 19.29; Rom. 16.23. bautizanqäpita. 15Tsaymi mayqaykipis niyankimantsu noqapa jutïchö bautizakuyanqaykita. 16Tsaynöllam Estéfanas#1Cor. 16.15. castallata bautizarqü. Tsaypita mastaqa manam pitapis bautizanqäta yarpätsu. 17Manam runakunata bautizar purinäpätsu Jesucristo mandamashqa, sinöqa alli willakuyninta willakur purinäpämi. Willakuyninta willakurqa manam yachaq kanqäta runakuna yarpäyänanpätsu willakü. Yachaq tukur willakurqa Jesucristo cruzchö wanunqantam manakaqman churäman.
Jesucristupa willakuyninman criyikuqkunata Tayta Dios salvanqan
18Jesucristo cruzchö wanunqanta willakuptïmi infiernuman qaykushqa kayänanpä kaqkunaqa manakaqkunata willakunqäta niyan. Tsaynö niyaptinpis salvashqa kaqkunapäqa tsay willakuy Tayta Diospa poderninmi.#Rom. 1.16. 19Tayta Diospa palabranmi nin:
<<Yachaq runakunapa yarpayninkunatam pantakätsishä.#Isa. 29.14.
Tantiyakuqkunapis mana tantiyakuyänanpämi permitishä>>.
20Tsaynö kaykaptinqa yachaqkuna yachayanqanpis ¿imapätä välin?#Job 12.17; Isa. 19.12. Ley yachatsikuqkuna yachayanqanpis ¿imapätä välin? Kay patsachö yachaqkuna estudiayanqanpis ¿imapätä välin? Jesucristuman mana criyikuqkuna yachayanqanpis Tayta Diospäqa manakaqllapämi kaykan.#Isa. 44.25. 21Paymi yachaq kar permitirqan runakuna yachaq kayninwan payta mana reqiyänanpä. Tsaymi willakuynin manakaq kanqanta yarpäyaptinpis willakuyninman criyikuqkunatarä salvan.
22Israel runakunaqa Jesucristuman criyikuyänanpä milagrukunatarämi rikayta munayan. Griego runakunanam yachaqkuna niyanqannö Diospa willakuynin kananta munayan. 23Peru tsaynö munayaptinpis noqakunaqa Jesucristo noqantsik raykur cruzchö wanunqantam willakuyä. Tsaynö willakuyaptïmi Israel runakuna rabyakuyan.#1.23 Israel runakunaqa yarpäyarqan Dios mandamunqan Cristo imayyaqpis mandakuq kananpä kanqantam. Wanunqanta willayaptinmi rabyakuyarqan. Mana Israel runakunanam manakaqkunata willakuyanqäta yarpäyan. 24Peru Tayta Dios qayanqan kaqkunam sïqa Israel runa mana Israel runa karpis tantiyakuyan Jesucristo Tayta Diospa podernin y yachaynin kanqanta.#1.24 Jesucristo Tayta Diospa podernin kanqanta nirqa Jesucristuman criyikuqkunata Tayta Dios poderninwan salvanqantam nin. Jesucristo Tayta Diospa yachaynin kanqanta nirqa Jesucristo cruzchö wanunqanpita payman criyikuqkunata Tayta Dios salvanqantam nin. 25Tsaymi willakuyanqä upa runakunallapä kanqanta yarpäyaptinpis yachaq runakunapa yarpayninpita mas alli kaykan. Tsaynöllam Jesucristo cruzchö wanunqanta manakaqman churayaptinpis payman yärakuqkunataqa Tayta Dios poderninwan salvaykan.
26Wawqikuna y panikuna, Tayta Dios qayayäshunqayki witsan imanö kayanqaykitapis yarpäyay. Qamkunachö juk ishkayllam yachaq kayarqayki, juk ishkayllam poderyuq kayarqayki y juk ishkayllam rïcu kayarqayki. 27Mana yachaq kayanqaykita runakuna yarpäyaptinpis qamkunatam Tayta Dios akrayäshurquyki yachaqkuna tantiyakur penqakuyänanpä. Tsaynöllam poderniynaq kayanqaykita yarpäyaptinpis Tayta Dios akrayäshurquyki poderyuq runakuna tantiyakur penqakuyänanpä.#1.27 Manam yachaq kayanqanpitatsu ni poderyuq kayanqanpitatsu runakunata Tayta Dios salvan, sinöqa Jesucristuman criyikuyanqanpitam. Tsayta tantiyarmi runakuna penqakuyanqa yachaq kayanqanman y poderyuq kayanqanman yärakuyanqanpita. 28Manakaqman churayanqan runakunata salvananpä Tayta Dios tsaynö akraptinmi musyantsik pipis yachaq kayninpa ni poderyuq kayninpa mana salvakunanpä kanqanta. 29Tsaymi Tayta Diospa puntanchö pipis alabakunqatsu.
30Qamkunataqa Jesucristuchö kayänaykipämi Tayta Dios salvayäshurquyki. Noqantsik raykurmi Jesucristuta Tayta Dios churarqan yachaynintsik kananpä, salvamaqnintsik kananpä, perdonamaqnintsik kananpä y rantimaqnintsik kananpä. 31Tsaynö kaykaptinqa ama alabakushuntsu. Tayta Diospa palabranmi nin: <<Pipis alabakunanpa rantinqa Tayta Diosta alabatsun>>.#Jer. 9.23-24.
Currently Selected:
1 Corintios 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.