O TITUS 2
2
O dodötoko madiai mahohol̄e
1Mä ngona, Titus, kokiani ngona nodotoko o dodötoko madumutu itiai. 2Nanasihati o bobereki o nau-nauru, hupaya önanga manga diri yatumungu, yobarija deʼ yowango hokä o nyawa yopatu-patutu yähoromati. Onangö kokiani imahi jojö o dodötoko madiai ika ma Jou Madutuino, manga dora itotomo deʼ yotongohono yatagongo o huha de o hangihara. 3Hoko genangoli kokiani ngona nanasihati o bobereki o ngongoheka hupaya to önanga manga kalakuanga ima däene de okia ipatu-patutu mangale o nyawa yowö wango-wango imä dingakika mangale ma Jou Madutu. Onanga yakunua o nyawa yahi ade-ade itorou, deʼ yakunua yabiaha yoke-okere o daluku i biha-biha. Onanga kokiani yodotoko o hali maoa-oa, 4hupaya de gënanga önanga yakunu yahibiaha yädotoko o ngongoheka yogö gö la yädora manga rokata deʼ manga ngoha-ngohaka, 5idadi yobarija, yowango i tebini, deʼ yodadi o ayo maoa o tau magoronaka yotomoteke manga rokatika. De hoko gënanga moiua naga o nyawa yakunu yahohedu o abari ma Jou Madutuino.
6Hoko genangö, nanasihati hagala o nyawa yogö gö hupaya önanga idadi yobarija. 7Hagala o hali magoronaka, kokiani ngona nodadi o dulada o kalakuanga maoa-oa. Nako ngona nodotoko, kokiani ngona ani hininga irikoto deʼ nakai goungu. 8Napäke o demo-demo i bobarija, o nyawa yakunua yahohedu, hupaya hagala ani lawani yämal̄eke karana koiwa naga o hali-o hali madodorou önanga yakunu yahëtongo mangale ngone.
9O gogilaongo kokiani yotomoteke manga tuangika, deʼ yasanangi manga hininga hagala o hali magoronaka. Onanga yakunua yoroributu, 10ekola yotohiki. Kokiani önanga ihi matoko salalu önanga manga jako yaoa deʼ yosetia, hupaya de to ona manga jako gënanga o nyawa ihi giriri o dodötoko mangale ma Jou Madutu, Wonahi hohalamati ngone.
11Hababu ma Jou Madutu wohi dumutoka Ai hayanga de Ai dora la wahihalamati hagala o nyawa mata-mata. 12Ma Jou Madutu Ai hayanga de ai dora gënanga inahibiaha inä dotoko ngone hupaya yakunokaua howango ima lawa-lawani de ma Jou Madutu ai mau, deʼ hamotekua o dunia manahihu. Ngone inahibiaha inä dotoko la howango o dunia nënanga magoronaka de hanäko nanga diri hatumungu, nanga hininga itiai deʼ hosetia ma Jou Madutuika. 13Oraha nanga magogiria ngone hododamä ma Wange ngone höngano-nganono gënanga; ma Wangeoka gënanga o dunia aha yamäke o Yesus Kristus ai mulia, enagënanga ma Jou Madutu Duru wo Lamo-amoko deʼ nanga Koano Wonahi hohalamati. 14#Mzm. 130:8; Kel. 19:5; Ul. 4:20, 7:6, 14:2; 1Pet. 2:9 Unanga wohi hubaka Ai diri mangale ngone la wonahilapahi ngone de hagala o dorou, deʼ wonahidadi ngoneo umati moi hololapahi de o baradoha deʼ hodadi madutu Unanga dika, inoli inamagawe o oa hodiai.
15Nädotoko mata-mata gënanga, deʼ nänasihati ikali nätaaere inihigö gihe-gihene de ini ömanga de o kumati. Ka o nyawa moiö de uha namal̄aika inihi kauku ngona.
Currently Selected:
O TITUS 2: TLB
Highlight
Copy
Compare
Share
Want to have your highlights saved across all your devices? Sign up or sign in
