O YEHEZKIEL 39
39
O Gog wo utumua
1Ma Jou Duru woko Kurutil̄e wotemo, ”Hei o nyawa nokokakaliua, nidobuturungu o Gog, o koano womomulia hagala o berera o Mesekh deʼ o Tubalino, deʼ nahetongo unangika Ngohi nënanga ai haturu. 2Ngohi aha tileboto ünanga, deʼ tiao ünanga wohupu o daera magogurutika o koremieuku dëwa il̄e, hagala o l̄okuika o Israel madaeraoka. 3Genangoka aha Tägohara ai toimi mal̄eha ai giama mahigiloka hiädono wapidili, de Tatifa hagala ai toimi madoto ai giama manirakoka. 4Hagala o Israel mal̄oku-ma-l̄okuoka, o Gog kamamoi aitentara yongodumu deʼ imateke rorimoi dede ünanga aha yohonenge, deʼ toönanga manga maiyeti-maiyeti aha Tohidöaka hagala o totaleoika deʼ o aiwani madorouika mangale yaol̄omo. 5Hagala o tentara gënanga aha yotifa deʼ yohonenge o dodumuleoka. Ngohi, o Jou Duru toko Kurutil̄e totemoka. 6Ngohi aha tohipuda o nguku o Magog matonakoka deʼ o gahi madate-datekoka, kiaka manyawa yowango deʼ marüae koiwa. Done önanga mata-mata ihi öriki Ngohila o Jou. 7Mä o Israel manyawa manga hidodogoronaka, aha Tohinyata Ahi romanga itebi-tebini, deʼ Ahi romanga gënanga aha yapesekokauaoli. Done o hoana deʼ o berera ma ago-agomo ihi öriki Ngohila o Jou, o Jou totebi-tebini o Israelino.”
8Ma Jou Duru woko Kurutil̄e wotemo, ”Igoungu, o wange Tahö heto-hetongo gënanga aha iboa. 9O Israel makota-kotaoka manyawa aha yohupu yotuo-tuono mangale yotoomu hagala o dae yamo mal̄a-mal̄aika, enagënanga o dadatoko deʼ o oworo, o toimi maleha de madoto ikali o diki-diki o boboha. Mata-mata gënanga önanga yadiai o gota ihi dofo-dofo, dë gënanga iyaoaka mangale o taongo tumidino. 10Ho, önanga iparaluua yotoomu o gota ihi dofo-dofo o dumuleoka ekola yotol̄anga o gota mautu o honganoka hagala o dae yamo mal̄a-mal̄aika gënanga iyaoaka mangöe mangale o gota ihi dofo-dofo. Onanga aha yal̄ë dë yaora hagala o nyawa manga arata yal̄ö l̄e-l̄eoka deʼ yao ora-ora toönanga manga arata. Ngohi, o Jou Duru toko Kurutil̄e totemoka.”
O Gog ai jere
11Ma Jou wotemo, ”Nako mata-mata gënanga idadi, Ngohi aha Tahidöaka o Gogika o jere matonaka o Israeloka, o Dodobongo ma Waioka magogere o Honenge ma Ngoto dëyaino o wange mahiwaroko idaduoko. Genangoka o Gog dë aitentara yongodumu aha yajere, deʼ o wai gënanga aha yahetongo ’o Gog aitentara manga duduono ma Wai.’ 12O mede tumidi madekana hagala o Israeloka manyawa aha yorüaeuku yalungunu mata-mata o maiyeti hupaya o tonakoka gënanga yapesekua. 13O berera manyawa yongodumu aha yariwo o karajanga yolungunu gënanga; dë mangale gënanga önanga aha yatarima o horomati Ahi utumu mawangeoka. Ngohi, o Jou Duru toko Kurutil̄e totemoka. 14O mede tumidi gënanga ipahaika ibotino, o nyawa yamuruono naga aha yahi manarama yodagi yakaika yakaino o bereraka gënanga mangale yalingiri hagala o maiyeti kai lululuikahi o tonakoka, deʼ nako naga yalungunu mangale yatebini o berera gënanga ipöpese-peseke. 15O dodagi gënanga magoronaka, mahi geto-getongo önanga yamake o nyawa manga kobongo, önanga yapugouku madatekoka, hupaya yolö lungu-lungunu yamake gënanga dëyajere o kobongo gënanga o Gog aitentara manga Duduono ma Waioka. 16De madodagi gënanga o tonaka gënanga yatebini ipöpese-peseke. (O wange ma duruino, o waioka gënanga aha naga o kota maromanga kaimatero deʼ o Gog aitentara manga Duduono.)”
17 #
Him. 19:17-18
Ma Jou Duru woko Kurutil̄e wohitemo ngohino, ”Hei o nyawa nokokakaliua, naahoko mata-mata o totaleo deʼ o aiwani mahomoa, hupaya iboa okiaino honanga mangale yaol̄omo o huhuba Tasosadia mangale enanga. Ngohi aha todiai o rameanga ma ago-agomo o Israel manga l̄oku-l̄okuoka, dokengoka enanga yakunu iol̄omo o hiode ma akeme de iokere o awunu. 18Enanga yakunu yaol̄omo yono nau-nauru manga maiyeti-maiyeti, deʼ yaokere manga awunu yakö kokuaha o dunia. Yononau-nauru deʼ yokokokuaha gënanga aha yätoma hokä hagala o kabingi manauru ekola o kabingi mangoha-ngohaka, ekola hagala o banteng maboburere. 19Tatoma ibotino hagala o nyawa gënanga hokä o huhuba, hagala o totaleo dë hagala o aiwani ma homoa aha yaol̄omo mata-mata manga haki hiädono yato koyowunanga, dë yaokere o awunu hiädono ihi daluku. 20Ahi mejaka enanga yakunu ihipunuhu mamamata deʼ mata-mata o kuda deʼ yobare-barene deʼ yopö poparangi. Ngohi, o Jou Duru toko Kurutil̄e totemoka.”
O Israel ihigilio hoi hira-hirali
21Ma Jou wohitemo, ”Ngohi aha tohidumutu Ahi mulia o hoana deʼ o berera ma ago-agomika. Onanga mata-mata aha yamake sarakia Ngohi tohipake ahi kuaha mangale yadiai hagala o putuhu iadi-adili. 22Mulaenge öraha nënanga o Israel manyawa aha ihi öriki Ngohila o Jou toönanga manga Jou Madutu. 23De mata-mata o hoana deʼ o berera aha imamao o Israel manyawa yahidingoto o tabuangika karana toönanga manga baradoha Ngohino. Onanga Tämal̄aoka de Tadogumal̄aika yahihanga o haturu deʼ yätoma o parangi magoronaka. 24Tahidapara önanga imamoteke deʼ toönanga manga peseke deʼ manga dorou, daha Tadogumal̄aika önanga.”
25Ma Jou Duru woko Kurutil̄e wotemo, ”Mä o öraha nënanga Ngohi aha tadora o umati o Israeloka o Yakub aidifauku, yadiai önanga mata-mata kadema enangokali. De hoko gënanga Ngohi tagoana hupaya Ahi romanga kahirahi yahoromati. 26Nako önanga yogogere de yorirïdi toönanga manga bereraka mahirete, deʼ o nyawa moiuaö yadodobuturungu önanga, done önanga aha yawohanga sarakia önanga yahi mal̄ekoka karana yosetiaokaua Ngohino. 27Ngohi aha taao önanga Tähigilio toönanga manga haturu manga bereraka de yaino, deʼ Ahi debi-debini aha yamake o hoana deʼ o bereraika karana Ahi manarama gënanga. 28Done ihi öriki Ahi umati Ngohila o Jou töönanga manga Jou Madutu. Hababu Ngohila tahidingotoönanga o tabuangika, ma Ngohioli Taao önanga Tahigilio toönanga manga bereraika mahirete, yamal̄aua kaimatengö onangino dokengoka. 29Ngohi aha tadogopoa Ahi womaha o Israel manyawauku, de Tamal̄aokauaoli önanga. Ngohi, o Jou Duru toko Kurutil̄e totemoka.”
Currently Selected:
O YEHEZKIEL 39: TLB
Highlight
Copy
Compare
Share
Want to have your highlights saved across all your devices? Sign up or sign in
