O TIMOTIUS MADODIHIRAKA 6
6
1O Haranioka manyawa yodadi o gilaongo, kiani yapulono toönanga manga tuanga patutu yahoromati, laʼ o nyawa yakunua yadadidorou ma Jou Madutu ai romanga ekola tongone nanga dodötoko. 2O gogilaongo manga tuanga o Haranioka manyawa, yakunua manga tuanga yapulono yahibaragunaua karana önanga imahi teke ho Haranioka manyawa. Mä onanga kokiani yaleleani toönanga manga tuanga gënanga de iholoi yaoaoli, hababu de yaoa yaleleani manga tuanga gënanga ganga o nyawa yongaku-ngaku yahohininga imahara-hara.
O dodötoko i totiaiua deʼ o kaya madutu
Mata-mata nënanga ngona kiani nädotoko deʼ nahitiari. 3O nagona honanga yodotoko o dodötoko mahomoa de gënanga, deʼ imadäenua o dodötoko madiai tongone nanga Jou Yesus Kristusino, deʼ tongone nanga agama madodötoko, 4ganga o nyawa yoedenge deʼ okia-kiaua ihi öriki! Mapanyake enagënanga yoigo imateke ributu deʼ imaka ngamo ima korona o demo mamangarati kabiahaua hi ädono ihi puda yotaleana, o gitingaka, yodiai o romanga madorou, yotae itotorou, 5deʼ imaka däenua o damäke ipaha-pahaua. Manga dibanga mangëkomo o nyawa gënanga itamunoka de itiaiokauaoli. Onanga yatobote o agamaino yakunu idadi yokaya.
6I goungu o agama ihi döaka o utumu ma amoko, nako o nyawa yamäo iyaoaka de okia yapäkeino. 7Hababu okia naga utuö de koiwa ngone haö o dunia magoronaino nënanga, deʼ okia naga utuö de koiwa ngone hakunu haö hohi hupu! 8Hoʼ, nako naga o inomo deʼ o pakeanga, gënanga iyaoaka. 9Mä o nyawa yomau yodadi yokaya, yamäke o cocoba deʼ o modoi mangale irupa-rupa o nahihu ibodo-bodo deʼ yakokilianga. O nahihu-o nahihu gënanga yadiai o nyawa yodadi yowedere deʼ yobodito. 10Hababu o kal̄il̄u o tiwi ika, ipuda hagala rupa o dorou. Naga utu o nyawa yanïki o tiwi, hi ädono yamotekoka uaoli o Haranioka madodötoko, daha önanga yatapal̄u o hangihara kohangöe yawedere toönanga manga hininga.
O himatoko-o himatoko mangale o diri
11Mä ngona ganga toma Jou Madutu ai nyawa madutu, hoʼ ngona kiani nomahi kurutika mata-mata gënanga. Nohi dailako nodadi o nyawa madiai ma Jou Madutu ai lakoka, nogilaongo ma Jou Madutuika, nongaku o Kristusika, nahininga ani dodiawo o nyawa, de notatapu o hangihara magoronaka, deʼ ani jako mabole-bole. 12No parangi nagou-goungu mangale nowango hokä o Haranioka manyawa, laʼ ngona naora o ngongike iwango-wango madutu deʼ ikakali. Hababu mangale gënanga ma Jou Madutu woni ahoko ngona nomangaku o nyawa yowöe-wöe manga himangoka ngona ningaku o Kristusika. 13#Yoh. 18:37 Deʼ oraha nënanga, ma Jou Madutu ai himangoka wohi döa-döaka o jiwa hagala moi-moi ika, deʼ o Kristus Yesus ai himangoka wohi döa-döaka o hakihi madiai o Pontius Pilatusika, ngohi togahoko nënanga ngonaino: 14Nohi ngounu mata-mata o pareta gënanga de madodagi idododono deʼ koiwa makuranga hiädono tongone nanga Jou Yesus Kristus ai böa mahinotoka. 15Ai böa, ma Jou Madutu mahirete aha wohitatapu maöraha yakokorona. Unanga kawoma tëngo-tëngo woko Kuaha; Unanga womulia, o Koano hagala koano, deʼ o Jou hagala tuanga. 16Unanga dika iwi kuahaua o honenge; Unanga wowango o dararono magoronaka o nagonaö dika yakunua imahitigi. Koiwa o nyawa moiö iwi mäkeoka, ekola yakunu iwi mäke. Unangika o horomati deʼ o kuaha mangale kahi ado-adonika! Amin.
17O nyawa yokaya-kayaika o duniaka nënanga, ngona kokiani nogahoko laʼ uha önanga ima edenge deʼ uha yonganono okia honangika itotatapua – hokä o hali de o kaya. Onanga kiani winganono ma Jou Madutuika, wohi döa-döaka hagala moi-moi ngoneino de maboloioka hupaya ngone hamäo majame. 18Nogahoko onangika mangale ihi dumutu o oa-oa, mangale yodiai iwöe o hali-o hali maoa, manga hininga imura, deʼ yoigo ihi döaka. 19De hoko gënanga önanga yatoomu o arata idadi manga dai matiti maoa-oa, mangale maöraha aha iböa-böa. Deʼ de gënanga önanga aha yamäke o ngango ikokakali, enagënanga o ngango madutu.
20Okia inihi gogöana ngonaika, nogöana gënanga nohidodiai, Timotius! Nomahi kurutika o ade-ade koiwa-iwa mabaraguna deʼ o ributu-ributu ima korona o hali-o hali madodagi ihowono yahetongo ”O sawaro”. 21Hababu naga o nyawa yotemo onangoka naga o sawaro gënanga, hiädono yorehenoka o Harani okaino madodötoko mahira önanga yangö ngaku-ngaku.
Tanu ma Jou winihi barakati Roriadodoto.
Tongomi mia horomati, o Paulus
Currently Selected:
O TIMOTIUS MADODIHIRAKA 6: TLB
Highlight
Copy
Compare
Share
Want to have your highlights saved across all your devices? Sign up or sign in
