O TIMOTIUS MADODIHIRAKA 4
4
O guru-guru madutua
1Ma Jou Madutu ai Womaha itemo ihi totararonuku maöraha aha iböa, o nyawa utu aha yodohuku, de iwihi pongono o Kristus. Onanga aha ihi ngounu o womaha yahirö rehe-rehenika, deʼ yanïki o womaha madorou madodötoko, 2ihi ngahu de madodagi o nyawa madorou de yototengeluku. Manga hininga madararono o nyawa gënanga, ihuhutuoka. 3Onanga yädotoko o nyawa, mangale uha yokawingi, deʼ yaol̄omua o inomo ihi totatapuoka. Enahioko o inomo gënanga ma Jou Madutu wohidadioka mangale yäol̄omo de yotemo tarima kasi Unangika mangale o nyawa iwi ngakuoka o Kristusika, deʼ yanakoka o dodötoko madiai ma Jou Madutuino. 4Hagala moi-moi ma Jou Madutu wohi dadioka gënanga yaoa, deʼ kamoiö de koiwa kiani hapulono maharamu nako hatarimaka de hotemo tarima kasi ma Jou Madutuika. 5Hababu o barakati ma Jou Madutuino deʼ o niata yadiai o inomo gënanga idadi i halali.
O Kristus Yesus iwilö leleani yomanarama yaoa-oa
6Nako ngona nädotoko mata-mata gënanga o roriadodotika o ngongaku moi, ngona aha nodadi o Kristus Yesus ai leleani de nomanarama yaoa. Deʼ ngona aha gila-gila naburere ani hininga de ma Jou Madutu ai demo ngone hangongaku-ngaku, deʼ o dodötoko-do dötoko madiai ngona nanïkoka madekanino nënanga. 7Nomahi kurutika o ade-ade o ngongaku ipoparahaja de mabaraguna ko ö iwa-iwa. Kiani nomahibiaha ani diri mangale o puji mawowango. 8O hibiaha o röehe mahidoku mahuhutulu dika mafaidä, mä o hibiaha o rohani mafaidä hagala o hali magoronaka, hababu yongohamika o jaji mangale o ngango maöraha nënanga deʼ oraha aha iböböa-böa. 9O hali gënanga itiai deʼ kiani hätarima de hängaku itototomo. 10Hababu gënanga ngone hoparangi de homanarama hohauku, hababu ngone honganono itötotomo ma Jou Madutuika wowö wango-wangoika; Unanga Wohihö hohalamati o nyawa mata-mata, duru mal̄okuoka o nyawa yongöngaku-ngaku.
11Nadotoko mata-mata gënanga deʼ nähuloko o nyawa yamoteke. 12Uha namal̄aika o nyawa moiö ini pulono ngona okiaua ini däene karana ngona kanomagö ikahi. I idulu yaino, kokiani ngona nodadi o dulada mangale o nyawa yongaku-ngaku ani ade-ade deʼ ani kalakuanga magoronaka, madodagi magoronaka ngona nahininga ani dodiawo o nyawa mahi dogoronaka deʼ ani ngongaku o Yesus Kristusika, deʼ ani wowango nadebi-debini. 13Oraha gënanga, damä ngohi hi ädono toböa, ngona kiani nagou-goungu nadabasa Ma Jou Ai Demo ma Buku o nyawaika, deʼ nähitomo de nadotoko önanga. 14Uha ngona nawohanga napäke o ngongike ma Jou Madutu ai Womahino, inihi döakoka ngonaika maöraha o jemaat matutuda-tutuda toönanga manga giama yogelengaka ani häeke mal̄okuoka, deʼ o nabi-nabi ihi adonoka ma Jou Madutu ai behehongo imakorona ani diri. 15Namanarama mata-mata gënanga de magou-goungu laʼ ani manarama mahasili yamäke o nyawa mata-mata. 16Nolega nohidodiai ani diri, deʼ nolega nohidodiaiö ani dodötoko. Kiani ngona nosetia nadiai mata-mata gënanga, hababu de hoko gënanga ngona aha nohihalamati, yaoa ani diri mahirete yaoa o nyawa inihigö gihe-gihene.
Currently Selected:
O TIMOTIUS MADODIHIRAKA 4: TLB
Highlight
Copy
Compare
Share
Want to have your highlights saved across all your devices? Sign up or sign in
