ZABUR 147
147
Pujian bagi Allah Saq Mahekuase
1Pade puji ALLAH !
Séngaq mule solah memuji Tuhante,
malahan nyenengang gati nyanyiang pujian bagi Ie!
2 ALLAH gen nulakang keadaan Yerusalem;
dengan-dengan saq tetetéh gen Ie gadingang uléq.
3Ie nyelahang dengan saq polak angen,
dait bebet bakat-bakat ie pade.
4Ie nentuang jumlah bintang-bintang,
dait sopoq-sopoq Ie aranin.
5Tetu-tetu agung dait hébat Junjungante Saq Mulie nike,
kebijaksanean-Ne nénten araq batesne.
6 ALLAH ngangkat dengan saq tetindes,
laguq dengan jahat Ie tetéh ojok tanaq.
7Pade nyanyiang puji-pujian bagi ALLAH,
puniqang kecapi bagi Tuhante.
8Ie kelat awan léq langit;
Ie nyedieang ujan umaq gumi,
dait miaq pupaq tiwoq léq gunung-gunung.
9Ie ngicanin kakenan tipaq héwan,
dait tipaq anak kedit gagak saq kenyeke bekuih-kuih.
10Ie nénten suke jaran saq kuat;
nénten éndah pejuang saq wanén.
11 ALLAH seneng léq dengan saq takut léq Ie,
tipaq dengan saq tetep beharep léq kasih-Ne.
12Pade puji ALLAH , hai Yerusalem!
Pade puji Tuhande, hai Sion!
13Séngaq Ie saq kukuhang jebak-jebak beléqde,
dait ngicanin pendudukde berkah.
14Ie jagaq daérahde adéq tetep aman,
dait besuhang side siq gandum saq paling solah.
15Ie ngicanin préntah tipaq gumi,
dait manik-Ne langsung telaksaneang.
16Ie nurunang salju maraq kapas,
dait nyangkurang awun-awun saq tegéng maraq kerepuk.
17Ie nurunang ujan és maraq gerisak;
nénten araq saq tahen siq nyetne.
18Beterus Ie bemanik, make és nike anyong;
Ie niup angin, make aiq ngélék.
19Ie nyampéang manik-Ne tipaq umat-Ne,
aturan-aturan dait hukum-hukum-Ne tipaq Israel.
20Ie nénten piaq maraq nike tipaq bangse-bangse lain,
ie pade nénten nenaoq hukum-hukum-Ne.
Pade puji ALLAH !
Currently Selected:
ZABUR 147: LAISAS
Highlight
Share
Copy
Want to have your highlights saved across all your devices? Sign up or sign in
