MATIUS 6

Naséhat mengenai sedekah

1 # Mat. 23:5 “Pade inget solah-solah, ndaq side ngelaksaneang ibadahde léq julun dengan siq maksut adéq teserioq siq ie pade. Lamun side pade maraq nike, side pade ndéq gen teican upaq siq Bapa side léq sorge.

2Jari, lamun side besedekah ojok dengan miskin, ndaq beléq-beléqang hal nike maraq saq tepiaq siq dengan munapik. Ie pade demen ngelaksaneang hal nike léq dalem balé ibadah dait léq rurung-rurung beléq adéqne teajum siq dengan. Pade inget, ie pade sampun nerimaq upaqne. 3Laguq lamun side pade ngebéng sedekah, béng secare tedoq-tedoq, adéq ndéq araq saq nenaoq. 4Alurang perbuatande nike ndéq tetaoq siq sai juaq, kecuali Bapa side saq léq sorge. Ie cingakin perbuatan side saq ndéq teserioq siq dengan, dait gen ngicanin upaq tipaq side pade.”

Pengajahan mengenai do'e

(Luk. 11:2-4)

5 # Luk. 18:10-14 “Lamun side pade bedo'e, ndaq bedo'e maraq dengan munapik. Ie pade demen bedo'e nganjeng léq balé ibadah dait léq perempatan adéqne teserioq siq dengan. Tiang badaq side, nike upaq saq sampun ie pade terimaq. 6Laguq lamun side pade bedo'e, tame ojok kamar dait impet lawangne, terus bedo'e tipaq Bapa side saq ndéq penggitan nike, make Bapa side saq cingakin perbuatande saq ndéq tetaoq siq dengan gen ngicanin upaq léq side.

7Lamun side pade bedo'e, ndaq bélo-bélo maraq dengan saq ndéq kenal Allah. Ie pade paran bahwe napi saq ie pade tunas nike gen tepirengang lantaran do'e ie pade saq bélo nike. 8Ndaq maraq ie pade. Bapa side sampun wikan napi saq side pade perluang, sendéqman side pade tunas. 9Jari, bedo'e maraq niki:

‘Bapa tiang pade saq araq léq sorge,

tesuciang peséngan Deside.

10Rauhang Kerajaan Deside,

jariang pekayunan Deside

léq gumi maraq léq sorge.

11Léq jelo niki icanin tiang pade keloran

saq tiang pade perluang.

12Ampunin tiang pade léman salaq tiang pade,

maraq tiang pade sampun ngampunin dengan

saq salaq tipaq tiang pade;

13dait sampunang gadingang tiang pade ojok dalem cobe,

laguq bébasang tiang pade léman kuase saq jahat.

[Séngaq Deside épén dowé Kerajaan dait kuase dait kemuliean jangke selaéq-laéqne. Amin.]’

14 # Mrk. 11:25-26 Séngaq lamun side pade ngampunin dengan saq salaq léq side pade, make Bapa side léq sorge éndah gen ngampunin kesalaqande. 15Laguq lamun side pade ndéq ngampunin salaq dengan lain, Bapa side saq léq sorge éndah ndéq gen ngampunin kesalaqande.”

Pengajahan mengenai puase

16“Lamun side pade puase, ndaq petitoqang ruende saq susah, maraq dengan munapik. Ie pade salin sebengne adéq selapuq dengan nenaoq bahwe ie pade puase. Pade inget, nike upaq saq ie pade sampun terimaq. 17Laguq lamun side pade puase, beseraup dait sisir bulunde, 18adéq ndéq araq saq nenaoq bahwe side pade puase, kecuali Bapa side saq ndéq penggitan nike doang. Ie cingakin perbuatande saq ndéq penggitan nike dait gen ngicanin upaq tipaq side pade.”

Harte léq sorge

(Luk. 12:33-34)

19 # Yak. 5:2-3 “Ndaq ngumpulang harte umaq diriqde léq gumi; léq gumi temeréné dait karat gen nyenyédaq dait maling gen dateng paling harte nike. 20Laguq, kumpulang harte umaq diriqde léq sorge; léq sorge temeréné dait karat ndéq gen nyenyédaq dait maling ndéq dateng paling harte nike. 21Séngaq léq mbé hartende araq, léq derike éndah angende!”

Cahaye léq awak

(Luk. 11:34-36)

22“Penenteng nike dilah léq awak. Lamun penentengde solah, selapuq awakde jari terang. 23Laguq lamun penentengde jahat, selapuq awakde jari peteng dedet. Jari lamun terang saq araq léq dalem diriqde nike peteng, berembé peteng dedetne peteng nike!”

Allah dait dowé bande

(Luk. 16:13, 12:22-31)

24“Ndéq araq sopoq dengan juaq saq bau begawéan léq due majikan. Séngaq lamun maraq nike ie gen meriq léq saq sopoq dait ngasihin saq lain, atao ie gen setie léq saq sopoq dait ndéq gen merhatiang saq lain. Maraq nike éndah halne side pade; side pade ndéq bau begawéan tipaq Allah dait tipaq dowé bande éndah.

25Keranaq nike Tiang badaq side pade: Ndaq side pade kuatir mengenai idupde, napi saq gen side pade kelor atao inem, atao napi saq gen side pade kadu. Tekan idup nike pentingan léman keloran dait awak pentingan léman kelambi? 26Pade serioq kedit léq langit. Ie pade ndéq uwah sawur binéq, ndéq uwah mataq dait ndéq uwah éndah ngumpulang hasil taletanne léq dalem lumbung, laguq Bapa side saq léq sorge peliharaq ie pade. Tekan side pade jaoq beléqan ajine ketimbang kedit? 27Sai léq antare side pade siq kuatirne bau ngeromboq umurne timaqne sekediq?

28Kembéq side pade kuatir mengenai kelambinde? Perhatiang berembé kembang bakung saq tiwoq léq lendang. Kembang-kembang nike ndéq uwah begawéan dait ndéq uwah nyésék; 29#1Raj. 10:4-7; 2Hik. 9:3-6 laguq Tiang badaq side: Nabi Sulaiman timaq ie sugih gati, ndéq ngengadu kelambi saq solahne maraq kembang-kembang nike! 30Pupaq léq lendang tiwoq jelo niki dait lémaq tesedut jangke bis. Laguq Allah payas pupaq nike solah gati. Lebih-lebih side pade! Laguq side pade kurang percaye! 31Keranaq nike, ndaq side pade kuatir dait bebase, ‘Napi saq gen ite kelor?’ atao ‘Napi saq gen ite inem?’ atao ‘Napi saq gen ite kadu?’ 32Selapuq nike teboyaq siq bangse-bangse saq ndéq kenal kance Allah. Padahal napi saq side pade perluang léq dalem idupde, selapuqne nike sampun tewikanang siq Bapa side pade. 33Laguq boyaq juluq Kerajaan Allah dait kebenaranne, make selapuq saq lain éndah gen teromboqang tipaq side pade siq Allah. 34Keranaq nike, ndaq kuatir mengenai jelo saq lémaq. Séngaq jelo saq lémaq araq kesusahanne mésaq. Jari, kesusahan sejelo cukup jari sejelo.”

Currently Selected:

MATIUS 6: LAISAS

Highlight

Copy