I Kor 12

A tinyiko ta Moya

1Vamakweru, mayelano ni tinyiko ta Moya, anidjuli leswaku n'wikohleka. 2N'waswitiva leswaku ankama afaka n'wili va-Matiko, afa n'wikokeliwa ku swikwembu swakuka-ndlela, leswi swingavulavuliki, n'wifambisiwa handle ka ndlela. 3Hileswo-ke nan'witivisa leswaku akuna mhunu lweyi avulavulaka hi Moya wa Xikwembu Nkulukumba, angahlayaka leswaku: Yesu i murukiwa. Nakone akuna mhunu lweyi anga kotaka kuhlaya leswaku: Yesu i Hosi, loko kungali hi Moya wa Kuxwenga.

4Atinyiko ta hambana, kambe a Moya i mun'we ntsena. 5Kuni matirela ya kuhambana, kambe a Hosi i yin'we ntsena. 6Nakone, kuni mintiro ya kuhambana, kambe i Xikwembu Nkulukumba mun'we ntsena, lweyi atiraka hinkwaswu ku hinkwavu. 7A kutivonekisa ka Moya kunyikiwa ku mun'wana-ni-mun'wana, akuva apfuna hinkwavu. 8Hikuva mun'we anyikiwa hikola ka Moya, a ritu dra vutlhari; mun'wana, hikola ka Moya wolowo, anyikiwa a ritu dra vutivi; 9mun'wana mfuri, ku Moya wolowo, a nyiko ya kupfumela, mun'wana a ntamu wa kuholisa mavabyi, ku Moya wolowo; 10mun'wana mfuri a ntamu wa kuyentxa mahlolana, mun'wana a vuprofeta, mun'wana a kutivisisa a mimoya hi vuyentelelo, mun'wana a kukhanela tindrimi ta tinxaka-xaka, mun'wana a kutitlhamuxela. 11Kambe hinkwaswu leswo switiriwa hi Moya wolowu wa wun'we, wuyavela ku mun'wana-ni-mun'wana hi laha wurandraka ha kone.

Hinkweru hivumba miri wun'we ntsena

12Hikuva swanga hi leswi a miri wunga wun'we ntsena, nambi leswi wungani swiro swinyingi, na swone swiro hinkwaswu, nambi swili swinyingi, swivumba a miri wun'we ntsena, xileswo, na yene Kriste swi tanu. 13Hileswo-ke, hinkweru hibabatisiwi ku Moya wolowu wa wun'we, akuva hiva miri wun'we, vangava va-Yuda kumbe va-Girika, swikarawa kumbe lava vantrhunxekiki. Nakone hinkweru hinwisiwi a Moya wun'we ntsena.

14Hikuva a miri ahi xiro xin'we ntsena, kambe i swiro swinyingi. 15Loko a nenge afa wungahlaya leswaku: Leswi mine ningaliki voko, ani wa miri, hinkonta ya leswo ahi wa miri, xana? 16Ni loko a ndleve afa yingaku: Leswi mine ningaliki tihlo, ani wa miri; hikola ka leswo ahi ya miri, xana? 17Loko afa a miri hinkwawu awova tihlu, a kuyingela afa kutava kwini, xana? Loko afa a miri hinkwawu awova ndleve, akunun'huta akutava kwini, xana? 18Kambe swoswi, Xikwembu Nkulukumba abeki a swiro: xin'wana-ni-xin'wana amirini, hi laha arandriki ha kone. 19Kambe loko afa hinkwaswu swova xiro xin'we ntsena, a miri afa wutava kwini, xana? 20Ke swoswi, a swiro i swinyingi, kambe a miri i wun'we ntsena.

21A tihlu adrina kuswikota a kubyela a voko driku: anikuvileli; na yone a nhloko, ku minenge: anin'wivileli. 22Kambe ngopfu-ngopfu, a swiro swa miri leswi swivonekaka na swili swa gome, hi leswi swivilelekaka ngopfu. 23Mfuri a swiro swa miri leswi hipimisaka leswaku switxhaviseka kutrongo, hi swone leswi hiswibekelaka a lisima hi kuhundrisa; ni leswi vonekaka swini tingana, hi swone leswi swiyentxeliwaka xitxhavu lexi hundrisaka; 24na kone a swiro sweru leswi switxhavisekaka, aswahavileli kubekeliwa xitxhavu. Kambe Xikwembu Nkulukumba ayentxi a miri, ava anyika a lisima drikulu ku swiro leswi afaka swidrivilela, 25akuva a kutravukana kungativa kone amirini, kambe a swiro switikaratela, swin'we ku swin'wana. 26Akuva loko xin'we xiro xixaniseka, na swone leswi swin'wana swixaniseka kun'we na xone. Ni loko xin'we xiro xitwalisiwa, hinkwaswu switrhava kun'we na xone.

27N'wine n'wi miri ya Kriste; na kone n'wi swiro swake, mun'wana-ni-mun'wana. 28Nakone, Xikwembu Nkulukumba abeki van'we, a Kerekeni, hi kusungula a vapostola; hi kulandra, a vaprofeta; a va vuraru, i vadondrisi; ntrhaku, kulandra a vayentxi va mahlolana; ntrhaku a tinyiko ta kuholisa, ni ta kupfuna, ni ta vurangeli, ni ta kuvulavula a tindrimi ta tinxaka-xaka. 29Xana hinkwavu vangava vapostola? Xana hinkwavu vangava vaprofeta? Xana hinkwavu vangava vadondrisi? Xana hinkwavu vangava vayentxi va mahlolana? 30Xana hinkwavu vangavani tinyiko ta kuholisa? Xana hinkwawu vavulavula a tindrimi ta tinxaka-xaka? Xana hinkwavu vakota a kutlhamuxela a tindrimi? 31Kambe djulisisani a tinyiko leti tingani lisima ngopfu. Nakone, nan'wikomba a ndlela leyi yinga yone swinene.

Currently Selected:

I Kor 12: NTX2007

Highlight

Copy